ನವದೆಹಲಿ: ಉದ್ಯೋಗಿಗಳ ಭವಿಷ್ಯ ನಿಧಿ (ಪಿಎಫ್) ಪಾವತಿ ಹಾಗೂ ಮಾಸಿಕ ರಿಟರ್ನ್ ಸಲ್ಲಿಕೆಗೆ ಸಂಬಂಧಿಸಿದಂತೆ ನೌಕರರ ಭವಿಷ್ಯ ನಿಧಿ ಸಂಸ್ಥೆ (ಇಪಿಎಫ್‌ಒ) ಮಹತ್ವದ ನಿರ್ಧಾರ ಕೈಗೊಂಡಿದೆ. 2026ರ ಸೆಪ್ಟೆಂಬರ್ ತಿಂಗಳ ಪಿಎಫ್ ವಂತಿಕೆ ಪಾವತಿಸಲು ಮತ್ತು ಎಲೆಕ್ಟ್ರಾನಿಕ್ ಚಲನ್‌ ಕಮ್‌ ರಿಟರ್ನ್ (ಇಸಿಆರ್‌) ಸಲ್ಲಿಸಲು ನೀಡಲಾಗಿದ್ದ ಗಡುವನ್ನು ಅಕ್ಟೋಬರ್ 15ರಿಂದ ಅಕ್ಟೋಬರ್ 31ರವರೆಗೆ ವಿಸ್ತರಿಸಲಾಗಿದೆ. ಈ ಕುರಿತು ಅಕ್ಟೋಬರ್ 13ರಂದು ಸುತ್ತೋಲೆ ಹೊರಡಿಸಲಾಗಿದೆ.
ಪಿಎಫ್ ವ್ಯಾಪ್ತಿಗೆ ಕಡ್ಡಾಯವಾಗಿ ಒಳಪಡಲು ಅನ್ವಯಿಸುವ ವೇತನ ಮಿತಿಯನ್ನು ತಿಂಗಳಿಗೆ ₹15,000ರಿಂದ ₹25,000ಕ್ಕೆ ಹೆಚ್ಚಿಸಿರುವ ಹಿನ್ನೆಲೆಯಲ್ಲಿ ಉದ್ಯೋಗದಾತರಿಗೆ ವೇತನದ ಲೆಕ್ಕಾಚಾರ ಮತ್ತು ಪಾವತಿ ವಿವರಗಳನ್ನು ಪರಿಷ್ಕರಿಸುವ ಅಗತ್ಯ ಎದುರಾಗಿದೆ. ಈ ಬದಲಾವಣೆ 2026ರ ಸೆಪ್ಟೆಂಬರ್ 17ರಿಂದ ಜಾರಿಗೆ ಬಂದಿರುವುದರಿಂದ ವೇತನದ ದಾಖಲೆಗಳು, ಉದ್ಯೋಗಿಗಳ ವಂತಿಕೆ ಲೆಕ್ಕಾಚಾರ ಹಾಗೂ ಸಂಬಂಧಿತ ತಾಂತ್ರಿಕ ವ್ಯವಸ್ಥೆಗಳಲ್ಲಿ ಬದಲಾವಣೆ ಮಾಡಬೇಕಾಗಿದೆ.
ಈ ಪ್ರಕ್ರಿಯೆಯಲ್ಲಿ ಎದುರಾಗಿರುವ ತಾಂತ್ರಿಕ, ಆಡಳಿತಾತ್ಮಕ ಮತ್ತು ಕಾರ್ಯಾಚರಣೆಯ ಸಮಸ್ಯೆಗಳನ್ನು ಪರಿಹರಿಸಿಕೊಳ್ಳಲು ಉದ್ಯೋಗದಾತರಿಗೆ ಹೆಚ್ಚುವರಿ ಸಮಯ ನೀಡುವ ಉದ್ದೇಶದಿಂದ ಇಪಿಎಫ್‌ಒ ಗಡುವು ವಿಸ್ತರಿಸಿದೆ.
ಈ ವಿಸ್ತರಣೆ ಮುಖ್ಯವಾಗಿ ಉದ್ಯೋಗಿಗಳನ್ನು ಹೊಂದಿರುವ ಸಂಸ್ಥೆಗಳು ಮತ್ತು ಉದ್ಯೋಗದಾತರಿಗೆ ಅನ್ವಯಿಸುತ್ತದೆ. ಸೆಪ್ಟೆಂಬರ್ 2026ರ ವೇತನ ತಿಂಗಳಿಗೆ ಸಂಬಂಧಿಸಿದ ಇಸಿಆರ್‌ ಸಲ್ಲಿಕೆ ಹಾಗೂ ಕಾನೂನುಬದ್ಧ ಪಿಎಫ್ ವಂತಿಕೆ ಪಾವತಿಯನ್ನು ಅಕ್ಟೋಬರ್ 31ರೊಳಗೆ ಪೂರ್ಣಗೊಳಿಸಬೇಕು.
ಆದರೆ ಈ ಗಡುವು ವಿಸ್ತರಣೆಯು ಸೆಪ್ಟೆಂಬರ್ ತಿಂಗಳಿಗೆ ಮಾತ್ರ ಸೀಮಿತವಾಗಿದೆ. ಇತರ ತಿಂಗಳ ಪಿಎಫ್ ಪಾವತಿಗೆ ಸಾಮಾನ್ಯವಾಗಿ ಅನ್ವಯಿಸುವ ಗಡುವುಗಳಲ್ಲಿ ಬದಲಾವಣೆ ಮಾಡಲಾಗಿದೆ ಎಂದು ಇದನ್ನು ಪರಿಗಣಿಸಬಾರದು.
ಉದ್ಯೋಗಿಗಳ ಭವಿಷ್ಯ ನಿಧಿ (ಎಂಪ್ಲಾಯೀಸ್‌ ಪ್ರಾವಿಡೆಂಟ್‌ ಫಂಡ್‌ – ಇಪಿಎಫ್‌) ಎನ್ನುವುದು ಉದ್ಯೋಗಿಗಳ ನಿವೃತ್ತಿ ಜೀವನಕ್ಕೆ ಆರ್ಥಿಕ ಭದ್ರತೆ ಒದಗಿಸುವ ಉಳಿತಾಯ ಯೋಜನೆಯಾಗಿದೆ. ಇಪಿಎಫ್‌ಒ ಈ ಯೋಜನೆಯ ನಿರ್ವಹಣೆ ಮಾಡುತ್ತದೆ. ಅನ್ವಯಿಸುವ ನಿಯಮಗಳ ಪ್ರಕಾರ ಉದ್ಯೋಗಿ ಮತ್ತು ಉದ್ಯೋಗದಾತರು ಪಿಎಫ್‌ಗೆ ವಂತಿಗೆ ನೀಡುತ್ತಾರೆ.
ಪಿಎಫ್ ವ್ಯವಸ್ಥೆಯಡಿ ಪ್ರಮುಖವಾಗಿ ಮೂರು ಸೌಲಭ್ಯಗಳಿವೆ:
- ಇಪಿಎಫ್‌ (EPF): ಉದ್ಯೋಗಿಯ ಭವಿಷ್ಯಕ್ಕಾಗಿ ಉಳಿತಾಯ ಮತ್ತು ಅದರ ಮೇಲಿನ ಬಡ್ಡಿ.
- ಇಪಿಎಸ್‌ (EPS): ಅರ್ಹತೆ ಹಾಗೂ ಅನ್ವಯಿಸುವ ನಿಯಮಗಳಿಗೆ ಒಳಪಟ್ಟು ಪಿಂಚಣಿ ಸೌಲಭ್ಯ.
- ಇಡಿಎಲ್‌ಐ (EDLI): ಅರ್ಹ ಉದ್ಯೋಗಿ ಮೃತಪಟ್ಟ ಸಂದರ್ಭದಲ್ಲಿ ನಿಯಮಾನುಸಾರ ಕುಟುಂಬಕ್ಕೆ ವಿಮಾ ಪ್ರಯೋಜನ.
ಗಡುವು ವಿಸ್ತರಣೆಯು ಉದ್ಯೋಗದಾತರು ಪಿಎಫ್ ರಿಟರ್ನ್ ಸಲ್ಲಿಸಲು ಮತ್ತು ವಂತಿಕೆ ಪಾವತಿಸಲು ನೀಡಿರುವ ಹೆಚ್ಚುವರಿ ಸಮಯವಾಗಿದೆ. ಉದ್ಯೋಗಿಗಳು ಪ್ರತ್ಯೇಕವಾಗಿ ಈ ಗಡುವು ವಿಸ್ತರಣೆಗೆ ಅರ್ಜಿ ಸಲ್ಲಿಸುವ ಅಗತ್ಯವಿಲ್ಲ.ಆದರೆ ಉದ್ಯೋಗಿಗಳು ತಮ್ಮ ವೇತನ ಚೀಟಿ, ಪಿಎಫ್ ವಂತಿಕೆ ವಿವರಗಳು ಹಾಗೂ ಇಪಿಎಫ್‌ಒ ಪಾಸ್‌ ಬುಕ್‌ ನಲ್ಲಿ ಜಮೆಯಾಗಿರುವ ಮೊತ್ತವನ್ನು ಪರಿಶೀಲಿಸಬಹುದು. ವಂತಿಕೆ ಜಮೆಯಾಗದಿದ್ದರೆ ಅಥವಾ ವಿವರಗಳಲ್ಲಿ ವ್ಯತ್ಯಾಸ ಕಂಡುಬಂದರೆ ತಮ್ಮ ಸಂಸ್ಥೆಯ ಮಾನವ ಸಂಪನ್ಮೂಲ ವಿಭಾಗವನ್ನು ಸಂಪರ್ಕಿಸುವುದು ಸೂಕ್ತ.
ಉದ್ಯೋಗದಾತರು ಸೆಪ್ಟೆಂಬರ್ ತಿಂಗಳ ವೇತನ ಮತ್ತು ವಂತಿಕೆಗಳ ಲೆಕ್ಕಾಚಾರವನ್ನು ಪರಿಷ್ಕೃತ ನಿಯಮಗಳಿಗೆ ಅನುಗುಣವಾಗಿ ಪರಿಶೀಲಿಸಿ, ಇಸಿಆರ್‌ ಸಲ್ಲಿಕೆ ಹಾಗೂ ಪಾವತಿಯನ್ನು ಅಕ್ಟೋಬರ್ 31ರೊಳಗೆ ಪೂರ್ಣಗೊಳಿಸಬೇಕು.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI