ಜಿಯೋ ಪ್ರಿಪೇಯ್ಡ್ ಗ್ರಾಹಕರಿಗೆ ಮಹತ್ವದ ಬದಲಾವಣೆಯೊಂದು ಎದುರಾಗಿದೆ. ಅಕ್ಟೋಬರ್ 18ರ ಬೆಳಗ್ಗೆಯಿಂದ MyJio ಆ್ಯಪ್‌ನಲ್ಲಿ ಪ್ರಿಪೇಯ್ಡ್ ರೀಚಾರ್ಜ್ ಪ್ಲಾನ್‌ಗಳ ಮೇಲೆ ಕಾಣಿಸುತ್ತಿದ್ದ ಡಿಸ್ನಿ+ ಹಾಟ್‌ಸ್ಟಾರ್ (Disney+ Hotstar) ಸೌಲಭ್ಯದ ಟ್ಯಾಗ್‌ಗಳು ಕಣ್ಮರೆಯಾಗಿವೆ. ಇದಕ್ಕೂ ಮುನ್ನ ಜಿಯೋ ₹1,499 ಮತ್ತು ₹4,199 ಬೆಲೆಯ ಹಾಟ್‌ಸ್ಟಾರ್ ಸೌಲಭ್ಯ ಹೊಂದಿದ್ದ ತನ್ನ ಕೊನೆಯ ಎರಡು ರೀಚಾರ್ಜ್ ಪ್ಲಾನ್‌ಗಳನ್ನು ಹಿಂಪಡೆದಿದೆ ಎನ್ನಲಾಗಿದೆ.
ಇದರ ಪರಿಣಾಮವಾಗಿ, ಪ್ರಸ್ತುತ ಜಿಯೋದ ಯಾವುದೇ ಪ್ರಿಪೇಯ್ಡ್ ಪ್ಲಾನ್‌ನಲ್ಲಿ ಉಚಿತ ಹಾಟ್‌ಸ್ಟಾರ್ ಚಂದಾದಾರಿಕೆ ಲಭ್ಯವಿಲ್ಲ ಎಂಬ ಮಾಹಿತಿ ಹೊರಬಿದ್ದಿದೆ. ಕ್ರಿಕೆಟ್ ಸೇರಿದಂತೆ ಪ್ರಮುಖ ಕ್ರೀಡಾಕೂಟಗಳನ್ನು ವೀಕ್ಷಿಸಲು OTT ಸೌಲಭ್ಯವಿರುವ ರೀಚಾರ್ಜ್ ಪ್ಲಾನ್‌ಗಳನ್ನು ಹುಡುಕುತ್ತಿದ್ದ ಗ್ರಾಹಕರು ಈಗ ಏರ್‌ಟೆಲ್ ಅಥವಾ ವೊಡಾಫೋನ್ ಐಡಿಯಾ (Vi) ಪರ್ಯಾಯಗಳನ್ನು ಪರಿಶೀಲಿಸಬೇಕಾಗಿದೆ.
ಕಳೆದ ವಾರಾಂತ್ಯದಿಂದಲೇ ದೇಶದ ವಿವಿಧ ಟೆಲಿಕಾಂ ವಲಯಗಳಲ್ಲಿ MyJio ಆ್ಯಪ್‌ನ ಪ್ಲಾನ್‌ಗಳಿಂದ ಹಾಟ್‌ಸ್ಟಾರ್ ಟ್ಯಾಗ್‌ಗಳು ಹಂತಹಂತವಾಗಿ ಮಾಯವಾಗಲು ಆರಂಭಿಸಿದ್ದವು. ಈ ಕುರಿತು ಜಿಯೋ ಅಧಿಕೃತ ಪ್ರಕಟಣೆ ನೀಡಿಲ್ಲ ಎನ್ನಲಾಗಿದ್ದು, ಹಳೆಯ ಹಾಟ್‌ಸ್ಟಾರ್ ಆಫರ್‌ಗಳ ವೆಬ್‌ಪುಟಗಳು ಇನ್ನೂ ಲಭ್ಯವಿರುವುದರಿಂದ ಗ್ರಾಹಕರಲ್ಲಿ ಗೊಂದಲ ಉಂಟಾಗಿದೆ. ಹೀಗಾಗಿ ರೀಚಾರ್ಜ್ ಮಾಡುವ ಮೊದಲು ಆ್ಯಪ್‌ನಲ್ಲಿ ತೋರಿಸುವ ಸಕ್ರಿಯ ಪ್ಲಾನ್ ವಿವರಗಳನ್ನು ಪರಿಶೀಲಿಸುವುದು ಅಗತ್ಯ. ಪಾವತಿ ಮಾಡುವ ಸಂದರ್ಭದಲ್ಲಿ ಹಾಟ್‌ಸ್ಟಾರ್ ಸೌಲಭ್ಯದ ಉಲ್ಲೇಖ ಇಲ್ಲದಿದ್ದರೆ, ಹಳೆಯ ಆಫರ್‌ಗಳನ್ನು ನಂಬಿ ರೀಚಾರ್ಜ್ ಮಾಡದಿರುವುದು ಉತ್ತಮ.
ಈಗಾಗಲೇ ಹಾಟ್‌ ಸ್ಟಾರ್ ಪಡೆದಿರುವ ಗ್ರಾಹಕರಿಗೆ ಏನಾಗಲಿದೆ?
ಈಗಾಗಲೇ ಹಾಟ್‌ಸ್ಟಾರ್ ಚಂದಾದಾರಿಕೆ ಸಕ್ರಿಯವಾಗಿರುವ ಗ್ರಾಹಕರಿಗೆ ಪ್ಲಾನ್‌ನ ಮಾನ್ಯತೆ ಮುಗಿಯುವವರೆಗೆ ಸೌಲಭ್ಯ ಮುಂದುವರಿಯುವ ಸಾಧ್ಯತೆಯಿದೆ. ಜಿಯೋಫೈಬರ್ (JioFiber) OTT ಬಂಡಲ್ ಮೂಲಕ ಟಿವಿಯಲ್ಲಿ ಹಾಟ್‌ಸ್ಟಾರ್ ವೀಕ್ಷಿಸುತ್ತಿರುವವರಿಗೂ ಪ್ರಸ್ತುತ ಯಾವುದೇ ಬದಲಾವಣೆ ವರದಿಯಾಗಿಲ್ಲ.ಇನ್ನು ಜಿಯೋ ಪೋಸ್ಟ್‌ಪೇಯ್ಡ್ ಪ್ಲಸ್‌ನ ಆಯ್ದ ಪ್ಲಾನ್‌ಗಳಲ್ಲಿ ನೆಟ್‌ಫ್ಲಿಕ್ಸ್ ಮತ್ತು ಅಮೆಜಾನ್ ಪ್ರೈಮ್‌ನಂತಹ OTT ಸೌಲಭ್ಯಗಳು ಮುಂದುವರಿದಿವೆ ಎನ್ನಲಾಗಿದೆ. ಹೀಗಾಗಿ ಹೊಸ ರೀಚಾರ್ಜ್ ಮಾಡುವ ಅಥವಾ ಬೇರೆ ಟೆಲಿಕಾಂ ನೆಟ್‌ವರ್ಕ್‌ಗೆ ಪೋರ್ಟ್ ಆಗುವ ಮೊದಲು ನಿಮ್ಮ ನಂಬರ್‌ಗೆ ಲಭ್ಯವಿರುವ ಸೌಲಭ್ಯಗಳನ್ನು ಪರಿಶೀಲಿಸುವುದು ಸೂಕ್ತ.
ಜಿಯೋದಲ್ಲಿ ಹಾಟ್‌ ಸ್ಟಾರ್ ಸೌಲಭ್ಯ ಕಾಣಿಸದ ಹಿನ್ನೆಲೆಯಲ್ಲಿ ಏರ್‌ ಟೆಲ್ ಮತ್ತು ವೊಡಾಫೋನ್ ಐಡಿಯಾ ಗ್ರಾಹಕರಿಗೆ ಪರ್ಯಾಯ ಆಯ್ಕೆಗಳಿವೆ. ನೀಡಿರುವ ಮಾಹಿತಿಯ ಪ್ರಕಾರ, ಏರ್‌ ಟೆಲ್ ನ ₹499 ಪ್ರಿಪೇಯ್ಡ್ ಪ್ಲಾನ್ ನಲ್ಲಿ 28 ದಿನಗಳ ಮಾನ್ಯತೆಯೊಂದಿಗೆ ಹಾಟ್‌ ಸ್ಟಾರ್ ಮೊಬೈಲ್ ಮತ್ತು ಎಕ್ಸ್‌ಸ್ಟ್ರೀಮ್ ಸೌಲಭ್ಯಗಳು ಲಭ್ಯವಿವೆ. ₹839 ಪ್ಲಾನ್ 84 ದಿನಗಳ ಮಾನ್ಯತೆ ನೀಡುತ್ತದೆ. ಏರ್‌ ಟೆಲ್ ನ ₹3,359 ವಾರ್ಷಿಕ ಪ್ಲಾನ್ ನಲ್ಲಿಯೂ ಹಾಟ್‌ ಸ್ಟಾರ್ ಸೌಲಭ್ಯ ಇರುವುದಾಗಿ ತಿಳಿಸಲಾಗಿದೆ.
ವೊಡಾಫೋನ್ ಐಡಿಯಾದ ₹901 ಪ್ರಿಪೇಯ್ಡ್ ಪ್ಲಾನ್‌ನಲ್ಲಿ 70 ದಿನಗಳ ಮಾನ್ಯತೆಯೊಂದಿಗೆ ಹಾಟ್‌ಸ್ಟಾರ್ ಮೊಬೈಲ್ ಸೌಲಭ್ಯ ಲಭ್ಯವಿರಬಹುದು. ಆದರೆ ಈ ಆಫರ್‌ ಗಳು ಟೆಲಿಕಾಂ ವಲಯ ಹಾಗೂ ಪ್ಲಾನ್‌ನ ಪ್ರಸ್ತುತ ಲಭ್ಯತೆಗೆ ಅನುಗುಣವಾಗಿ ಬದಲಾಗಬಹುದು. ಆದ್ದರಿಂದ ರೀಚಾರ್ಜ್ ಮಾಡುವ ಮುನ್ನ ಸಂಬಂಧಪಟ್ಟ ಕಂಪನಿಯ ಅಧಿಕೃತ ಆ್ಯಪ್ ಅಥವಾ ವೆಬ್‌ ಸೈಟ್‌ ನಲ್ಲಿ ಖಚಿತಪಡಿಸಿಕೊಳ್ಳಬೇಕು.
ವಾರ್ಷಿಕ ಪ್ಲಾನ್ ಆಯ್ಕೆ ಮಾಡಿಕೊಳ್ಳುವುದು ಲಾಭದಾಯಕವೇ?
ವರ್ಷವಿಡೀ OTT ಕಂಟೆಂಟ್ ವೀಕ್ಷಿಸುವವರಿಗೆ ವಾರ್ಷಿಕ ರೀಚಾರ್ಜ್ ಪ್ಲಾನ್‌ಗಳು ಅನುಕೂಲಕರವಾಗಬಹುದು. ಏರ್‌ಟೆಲ್‌ನ ₹3,359 ಪ್ಲಾನ್ ದೀರ್ಘಾವಧಿಯ ಮಾನ್ಯತೆಯನ್ನು ಬಯಸುವವರಿಗೆ ಒಂದು ಆಯ್ಕೆಯಾಗಿದ್ದು, ಪದೇಪದೇ ರೀಚಾರ್ಜ್ ಮಾಡುವ ಅಗತ್ಯವನ್ನು ಕಡಿಮೆ ಮಾಡುತ್ತದೆ. ಆದರೆ ವಾರ್ಷಿಕ ಪ್ಲಾನ್ ಆಯ್ಕೆ ಮಾಡುವ ಮೊದಲು ಅದರಲ್ಲಿ ಹಾಟ್‌ಸ್ಟಾರ್ ಸೌಲಭ್ಯ ನಿಜವಾಗಿಯೂ ಲಭ್ಯವಿದೆಯೇ, ಡೇಟಾ ಪ್ರಮಾಣ ಎಷ್ಟು ಮತ್ತು ಇತರ ಪ್ರಯೋಜನಗಳೇನು ಎಂಬುದನ್ನು ಪರಿಶೀಲಿಸಬೇಕು.
ವೊಡಾಫೋನ್ ಐಡಿಯಾದಲ್ಲಿಯೂ ಹಾಟ್‌ಸ್ಟಾರ್ ಸೌಲಭ್ಯ ಹೊಂದಿರುವ ಪ್ಲಾನ್‌ಗಳು ಲಭ್ಯವಿರಬಹುದು. ಆದರೆ ಕೇವಲ OTT ಚಂದಾದಾರಿಕೆಗಾಗಿ ದುಬಾರಿ ಪ್ಲಾನ್ ಆಯ್ಕೆ ಮಾಡಿಕೊಳ್ಳುವ ಬದಲು, ನಿಮ್ಮ ಬಳಕೆಗೆ ತಕ್ಕ ಡೇಟಾ, ಕರೆ ಸೌಲಭ್ಯ, ಮಾನ್ಯತೆ ಮತ್ತು OTT ಪ್ರಯೋಜನಗಳನ್ನು ಹೋಲಿಕೆ ಮಾಡುವುದು ಉತ್ತಮ.
ಜಿಯೋ ಪ್ರಿಪೇಯ್ಡ್ ಪ್ಲಾನ್‌ಗಳಲ್ಲಿ ಹಾಟ್‌ಸ್ಟಾರ್ ಸೌಲಭ್ಯಕ್ಕೆ ಸಂಬಂಧಿಸಿದ ಬದಲಾವಣೆಯಿಂದಾಗಿ OTT ಪ್ರಿಯರು ತಮ್ಮ ಆಯ್ಕೆಗಳನ್ನು ಮರುಪರಿಶೀಲಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ಹಾಟ್‌ಸ್ಟಾರ್‌ಗಾಗಿ ಮಾತ್ರ ನೆಟ್‌ವರ್ಕ್ ಬದಲಾಯಿಸುವ ಮೊದಲು ಜಿಯೋ, ಏರ್‌ಟೆಲ್ ಮತ್ತು ವೊಡಾಫೋನ್ ಐಡಿಯಾದ ಅಧಿಕೃತ ಪ್ಲಾನ್ ವಿವರಗಳನ್ನು ಅಪರಿಶೀಲಿಸಿ ನಿರ್ಧಾರ ಕೈಗೊಳ್ಳುವುದು ಸೂಕ್ತ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI