ನವದೆಹಲಿ: ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಹಾಗೂ ಯುವ ವ್ಯವಹಾರಗಳು ಮತ್ತು ಕ್ರೀಡಾ ಸಚಿವರಾದ ಡಾ. ಮನ್ಸುಖ್ ಮಾಂಡವಿಯ ಅವರು ನವದೆಹಲಿಯ ಭಾರತ್ ಮಂಟಪದಲ್ಲಿ ನಡೆಯುತ್ತಿರುವ ಭಾರತ ಅಂತರರಾಷ್ಟ್ರೀಯ ವ್ಯಾಪಾರ ಮೇಳ (ಐಐಟಿಎಫ್) 2026 ರಲ್ಲಿ ನೌಕರರ ಭವಿಷ್ಯ ನಿಧಿ ಸಂಸ್ಥೆ (ಇ.ಪಿ.ಎಫ್.ಒ) ಲೌಂಜ್ ಮತ್ತು ನೌಕರರ ರಾಜ್ಯ ವಿಮಾ ನಿಗಮ (ಇ.ಎಸ್.ಐ.ಸಿ) ಪೆವಿಲಿಯನ್ ಅನ್ನು ಉದ್ಘಾಟಿಸಿದರು.
ಉದ್ಘಾಟನೆಯ ಬಳಿಕ ಕಿಯೋಸ್ಕ್ ಗಳಲ್ಲಿನ ಸೌಲಭ್ಯಗಳನ್ನು ವೀಕ್ಷಿಸಿ ಸಂದರ್ಶಕರೊಂದಿಗೆ ಸಂವಾದ ನಡೆಸಿದ ಸಚಿವರು, ಕಾರ್ಮಿಕರು, ಪಿಂಚಣಿದಾರರು ಮತ್ತು ಸಾರ್ವಜನಿಕರಿಗೆ ಸಾಮಾಜಿಕ ಭದ್ರತಾ ಸೇವೆಗಳನ್ನು ಸುಲಭವಾಗಿ ತಲುಪಿಸುವ ತಂತ್ರಜ್ಞಾನ ಆಧಾರಿತ ಹಾಗೂ ನಾಗರಿಕ-ಕೇಂದ್ರಿತ ಉಪಕ್ರಮಗಳಿಗೆ ಮೆಚ್ಚುಗೆ ವ್ಯಕ್ತಪಡಿಸಿದರು.



ಭಾರತ್ ಮಂಟಪದ ಹಾಲ್ ಸಂಖ್ಯೆ 4 ರ ನೆಲ ಮಹಡಿಯಲ್ಲಿರುವ (ಸ್ಟಾಲ್ ಸಂಖ್ಯೆ 8ಅ) ಇ.ಪಿ.ಎಫ್.ಒ ಲೌಂಜ್ನಲ್ಲಿ ಸಂಸ್ಥೆಯ ಪ್ರಯೋಜನಗಳನ್ನು ವಿವರಿಸುವ ‘ರಾಜಾ ರಾಂಚೊ’ ಬೊಂಬೆ ಪ್ರದರ್ಶನ ಆಕರ್ಷಣೆಯಾಗಿದೆ. ಜೊತೆಗೆ ಕುಂದುಕೊರತೆ ಪರಿಹಾರ, ಆನ್ಲೈನ್ ಮಾರ್ಗದರ್ಶನ, ಹಕ್ಕು ಸಲ್ಲಿಕೆ, ಕೆವೈಸಿ ತಿದ್ದುಪಡಿ, ಪ್ರಧಾನ ಮಂತ್ರಿ ವಿಕಸಿತ ಭಾರತ್ ರೋಜ್ಗಾರ್ ಯೋಜನೆ, ಮುಖ ದೃಢೀಕರಣ ತಂತ್ರಜ್ಞಾನ, ಡಿಜಿಟಲ್ ಲೈಫ್ ಪ್ರಮಾಣಪತ್ರ, ಪಿಂಚಣಿ ಸಹಾಯ ಹಾಗೂ ರಾಷ್ಟ್ರೀಯ ವೃತ್ತಿ ಸೇವೆಗಳು ಮತ್ತು ಇ–ಶ್ರಮ್ ಕಿಯೋಸ್ಕ್ ಗಳ ಮೂಲಕ ವ್ಯಾಪಕ ಬೆಂಬಲವನ್ನು ಒದಗಿಸಲಾಗುತ್ತಿದೆ.

ಇನ್ನು ಮೊದಲ ಮಹಡಿಯಲ್ಲಿರುವ (ಸ್ಟಾಲ್ ಸಂಖ್ಯೆ 4ಎಫ್—05–ಎ) ಇ.ಎಸ್.ಐ.ಸಿ ಪೆವಿಲಿಯನ್ನಲ್ಲಿ ಸಂದರ್ಶಕರಿಗೆ ಉಚಿತ ರಕ್ತದೊತ್ತಡ ಮತ್ತು ಗ್ಲೂಕೋಸ್ ತಪಾಸಣೆ, ಸ್ಥಳದಲ್ಲೇ ಆಧಾರ್ ಸೀಡಿಂಗ್, ದೂರು ಪರಿಹಾರ ಮತ್ತು ಹಿರಿಯ ಅಧಿಕಾರಿಗಳೊಂದಿಗೆ ನೇರ ಸಂವಾದದ ಸೌಲಭ್ಯ ಕಲ್ಪಿಸಲಾಗಿದೆ. ಸಾರ್ವಜನಿಕರಲ್ಲಿ ಜಾಗೃತಿ ಮೂಡಿಸಲು ಡಿಜಿಟಲ್ ಪರದೆಗಳು, ಆಡಿಯೋ-ದೃಶ್ಯ ಪ್ರಸ್ತುತಿಗಳು, ರಸಪ್ರಶ್ನೆ, ‘ವೈದ್ಯನಾಗು’ ಸಂವಾದಾತ್ಮಕ ಸೆಲ್ಫಿ ಚಟುವಟಿಕೆ ಹಾಗೂ ವಿಜೇತರಿಗೆ ದೈನಂದಿನ ಉಡುಗೊರೆಗಳನ್ನು ಆಯೋಜಿಸಲಾಗಿದೆ. ಇದಲ್ಲದೆ, ನಾಗರಿಕರ ಸಲಹೆಗಳು ನೇರವಾಗಿ ವಿಮಾ ಆಯುಕ್ತರಿಗೆ ತಲುಪುವಂತೆ ವಿಶಿಷ್ಟ ಕ್ಯೂಆರ್–ಕೋಡ್ ಆಧಾರಿತ ಪ್ರತಿಕ್ರಿಯೆ ವ್ಯವಸ್ಥೆಯನ್ನೂ ಪರಿಚಯಿಸಲಾಗಿದೆ. ನವೆಂಬರ್ 14 ರಿಂದ 27 ರವರೆಗೆ ನಡೆಯುವ ಈ ಮೇಳದಲ್ಲಿ ಕಾರ್ಮಿಕರು, ಪಿಂಚಣಿದಾರರು, ಉದ್ಯೋಗದಾತರು ಮತ್ತು ಸಾರ್ವಜನಿಕರು ಹೆಚ್ಚಿನ ಸಂಖ್ಯೆಯಲ್ಲಿ ಭೇಟಿ ನೀಡಿ ಸ್ಥಳದಲ್ಲೇ ಸೇವೆಗಳನ್ನು ಪಡೆಯುವಂತೆ ಆಹ್ವಾನಿಸಲಾಗಿದೆ.
“ಕಾರ್ಮಿಕರು ಮತ್ತು ಪಿಂಚಣಿದಾರರು ತಮ್ಮ ಹಕ್ಕಿನ ಪಿಎಫ್ ಹಾಗೂ ಇಎಸ್ ಐ ಸೌಲಭ್ಯಗಳಿಗಾಗಿ ಕಚೇರಿಗಳಿಗೆ ಅಲೆಯುವುದನ್ನು ತಪ್ಪಿಸಲು ಕೇಂದ್ರ ಸರ್ಕಾರ ಜಾರಿಗೆ ತಂದಿರುವ ಇಂತಹ ಡಿಜಿಟಲ್ ಮತ್ತು ನೇರ ಸೇವಾ ಕೇಂದ್ರಗಳು ಅತ್ಯಂತ ಸ್ವಾಗತಾರ್ಹ. ದೇಶದ ಎಲ್ಲಾ ಕೈಗಾರಿಕಾ ಪ್ರದೇಶಗಳಲ್ಲೂ ಇಂತಹ ನೇರ ಕುಂದುಕೊರತೆ ನಿವಾರಣಾ ಶಿಬಿರಗಳು ನಿರಂತರವಾಗಿ ನಡೆಯುವಂತಾಗಲಿ.”
— ನಟರಾಜು ಜಿ. ಎಲ್., ಪ್ರಧಾನ ಸಂಪಾದಕರು, ನಮ್ಮ ತುಮಕೂರು ಡಿಜಿಟಲ್ ಸುದ್ದಿ ಮಾಧ್ಯಮ.
ಈ ಸಂದರ್ಭದಲ್ಲಿ ಕೇಂದ್ರ ಭವಿಷ್ಯ ನಿಧಿ ಆಯುಕ್ತ ರಮೇಶ್ ಕೃಷ್ಣಮೂರ್ತಿ, ಇ.ಎಸ್.ಐ.ಸಿ ಮಹಾನಿರ್ದೇಶಕ ಅಶೋಕ್ ಕುಮಾರ್ ಸಿಂಗ್ ಹಾಗೂ ಎರಡೂ ಸಂಸ್ಥೆಗಳ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.
ನಿಮ್ಮ ಸುತ್ತಮುತ್ತಲಿನ ಸುದ್ದಿ, ಸಮಸ್ಯೆ ಹಾಗೂ ಭ್ರಷ್ಟಾಚಾರದ ವಿರುದ್ಧ ದನಿ ಎತ್ತಲು ನಮ್ಮನ್ನು ಸಂಪರ್ಕಿಸಿ:
ವಾಟ್ಸಾಪ್ ಸಹಾಯವಾಣಿ: 9741717400
ಇ-ಮೇಲ್: nammatumakuru9@gmail.com
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI
