ಕೈ ಚೀಲಕ್ಕೆ 20 ರೂ. ವಸೂಲಿ ಮಾಡಿ ಭಾರೀ ಮುಜುಗರಕ್ಕೀಡಾದ ದೈತ್ಯ ಐಕಿಯಾ! ಐಕಿಯಾ ಲೋಗೋ ಹೊಂದಿರುವ ಕ್ಯಾರಿ ಬ್ಯಾಗ್‌ಗೆ 20 ರೂ. ಶುಲ್ಕ ವಿಧಿಸಿದ್ದ ಹೈದರಾಬಾದ್‌ನ ಐಕಿಯಾ ಮಳಿಗೆಗೆ ಗ್ರಾಹಕ ನ್ಯಾಯಾಲಯ 6,000 ರೂ. ದಂಡ ವಿಧಿಸಿದೆ.
35 ವರ್ಷ ವಯಸ್ಸಿನ ಸಿಕಂದರಾಬಾದ್‌ನ ಕಾನೂನು ವಿದ್ಯಾರ್ಥಿ ಕೆವಿನ್ ಸುಕೀರ್ತಿ ಅವರು 2020ರ ಜನವರಿಯಲ್ಲಿ ಹೈದರಾಬಾದ್‌ನ ಐಕಿಯಾ ಮಳಿಗೆಗೆ ಭೇಟಿ ನೀಡಿ 1071 ರೂ. ಮೌಲ್ಯದ ವಸ್ತುಗಳನ್ನು ಖರೀದಿಸಿದ್ದರು. ಈ ವೇಳೆ ಐಕಿಯಾ ತನ್ನದೇ ಹೆಸರಿರುವ ಕೈ ಚೀಲವನ್ನು ನೀಡಿ ಅದಕ್ಕೆ 20 ರೂ. ವಸೂಲಿ ಮಾಡಿತ್ತು. ಇದರ ವಿರುದ್ಧ ಕೆವಿನ್ ಗ್ರಾಹಕ ಸಂರಕ್ಷಣಾ ಕಾಯ್ದೆಯ ಸೆಕ್ಷನ್ 12ರ ಅಡಿಯಲ್ಲಿ ದೂರು ದಾಖಲಿಸಿದ್ದರು.
ಇದರ ವಿಚಾರಣೆ ನಡೆಸಿದ ನ್ಯಾಯಾಲಯ, ಕ್ಯಾರಿ ಬ್ಯಾಗ್‌ಗೆ 20 ರೂ. ಶುಲ್ಕ ವಿಧಿಸಿದ್ದರಿಂದ ಗ್ರಾಹಕರು “ಸೇವೆಯ ಕೊರತೆಯಿಂದ ಮಾನಸಿಕ ನೋವನ್ನು ಅನುಭವಿಸಿದ್ದಾರೆ.” ಮತ್ತು ಗ್ರಾಹಕರ ವೆಚ್ಚದಲ್ಲಿ ಐಕಿಯಾ ತನ್ನ ಬ್ರ್ಯಾಂಡ್‌ನ ಹೆಸರನ್ನು ಜಾಹೀರಾತು ಮಾಡುವುದು ಅನೈತಿಕ ವ್ಯಾಪಾರ ಅಭ್ಯಾಸವಾಗಿದೆ ಎಂದು ಹೇಳಿದೆ.
ಈ ಸಂಬಂಧ ರಂಗಾರೆಡ್ಡಿ ಜಿಲ್ಲೆಯ ಜಿಲ್ಲಾ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗವು ಕಂಪನಿಯ ಲೋಗೋ ಹೊಂದಿರುವ ಕ್ಯಾರಿ ಬ್ಯಾಗ್‌ಗಳಿಗೆ ಶುಲ್ಕ ವಿಧಿಸದಂತೆ ಐಕಿಯಾಗೆ ಸೂಚಿಸಿದೆ. ಜತೆಗೆ ಬ್ಯಾಗ್‌ಗೆ ವಿಧಿಸಿದ್ದ 20 ರೂ.ಗಳನ್ನು ದೂರುದಾರರಿಗೆ ಮರುಪಾವತಿಸಿ, ಮಾನಸಿಕ ಸಂಕಟಕ್ಕೆ ಪರಿಹಾರವಾಗಿ 1000 ರೂ.ಗಳನ್ನು ಪಾವತಿಸುವಂತೆ ಹೇಳಿದೆ. ಹಾಗೂ ಗ್ರಾಹಕ ಸಂರಕ್ಷಣಾ ಕಾಯ್ದೆಯ ಅರಿವು ಮೂಡಿಸುವ ಸಂಕೇತವಾಗಿ ಗ್ರಾಹಕ ಕಾನೂನು ನೆರವು ಖಾತೆಯಲ್ಲಿ 5000 ರೂ.ಗಳನ್ನು ಠೇವಣಿ ಮಾಡುವಂತೆ ಐಕಿಯಾಗೆ ನಿರ್ದೇಶನ ನೀಡಿದೆ.
ಆಗಿದ್ದೇನು?
ದೂರುದಾರ ಕೆವಿನ್ ಅವರು ಜನವರಿ 26, 2020ರಂದು ಹೈದರಾಬಾದ್‌ನಲ್ಲಿರುವ ಐಕಿಯಾ ಮಳಿಗೆಗೆ ಭೇಟಿ ನೀಡಿದ್ದರು. ಅವರು 1,071 ರೂ. ಮೌಲ್ಯದ ಕೆಲವು ವಸ್ತುಗಳನ್ನು ಖರೀದಿಸಿದ್ದರು. ತಮ್ಮ ಬಳಿ ಬ್ಯಾಗ್ ಇಲ್ಲದ ಕಾರಣ ಬಿಲ್ಲಿಂಗ್ ಕೌಂಟರ್‌ನಲ್ಲಿದ್ದ ವ್ಯಕ್ತಿ ಬ್ಯಾಗ್ ಬೇಕಾ? ಎಂದು ಕೇಳಿದ್ದ. ‘ವಿಧಿ ಇಲ್ಲದೆ ಕ್ಯಾರಿ ಬ್ಯಾಗ್ ಖರೀದಿಸಬೇಕಾಯಿತು’ ಎಂದು ಕೆವಿನ್ ಹೇಳಿದ್ದು, ಬ್ಯಾಗ್‌ನಲ್ಲಿ ಐಕಿಯಾ ಲೊಗೋ ಇರುವುದು ನಂತರ ಗಮನಕ್ಕೆ ಬಂತು. ನಂತರ ಈ ಸಂಬಂಧ ನ್ಯಾಯಾಲಯದ ಮೆಟ್ಟಿಲೇರಿದ ಅವರು, ಲೋಗೋ ಮುದ್ರಿಸಲಾದ ಬ್ಯಾಗ್‌ಗೆ ಶುಲ್ಕ ವಿಧಿಸುವುದು ಅನೈತಿಕ ವ್ಯಾಪಾರ ಅಭ್ಯಾಸ ಎಂದು ವಾದಿಸಿ ಜಯ ಸಾಧಿಸಿದ್ದಾರೆ.
ಆಯೋಗಕ್ಕೆ ಪ್ರತಿಕ್ರಿಯಿಸಿದ್ದ ಐಕಿಯಾ, ಗ್ರಾಹಕರನ್ನು ಕೇಳಿಯೇ ನಾವು ಶುಲ್ಕ ವಿಧಿಸುತ್ತೇವೆ. ದೂರುದಾರರು 20 ರೂ. ಬ್ಯಾಗ್ ಖರೀದಿಸಲು ಇಚ್ಛೆ ವ್ಯಕ್ತಪಡಿಸಿ, ಒಪ್ಪಿಕೊಂಡಿದ್ದಾರೆ ಎಂದು ವಾದಿಸಿತ್ತು.
ತಾನು ಇತರ ಉತ್ಪನ್ನಗಳಂತೆಯೇ ಪೇಪರ್‌ ಬ್ಯಾಗ್‌ಗಳನ್ನು ಮಾರಾಟ ಮಾಡುವುದಾಗಿ ಹೇಳಿದ ಐಕಿಯಾ, ಮಳಿಗೆಯಲ್ಲಿರುವ ಹೆಚ್ಚಿನ ವಸ್ತುಗಳು ಮೊದಲೇ ಪ್ಯಾಕ್‌ ಆಗಿರುತ್ತವೆ. ಇವುಗಳನ್ನು ಗ್ರಾಹಕರು ಖರೀದಿಸಿ ಪಾರ್ಕಿಂಗ್ ಸ್ಥಳ ಅಥವಾ ಅಂಗಡಿಯ ನಿರ್ಗಮನದವರೆಗೂ ಕೈಗಾಡಿಯಲ್ಲಿ ಕೊಂಡೊಯ್ಯಬಹುದು ಎಂದು ಹೇಳಿತ್ತು.
ಆದರೆ ಐಕಿಯಾದ ವಾದವನ್ನು ಒಪ್ಪದ ಗ್ರಾಹಕರ ವ್ಯಾಜ್ಯಗಳ ಪರಿಹಾರ ಆಯೋಗದ ಆಯುಕ್ತರು “ಕ್ಯಾರಿ ಬ್ಯಾಗ್‌ಗಳಿಗೆ ಶುಲ್ಕ ವಿಧಿಸಲು ಅನುಮತಿ ನೀಡಲು ಸಾಧ್ಯವಿಲ್ಲ. ಅದೂ ಕಂಪನಿಯ ಲೋಗೋವನ್ನು ಹೊಂದಿರುವಾಗ,” ಎಂದು ಜುಲೈ 18, 2022ರ ಆದೇಶದಲ್ಲಿ ಹೇಳಿದ್ದಾರೆ. ಬ್ಯಾಗ್‌ಗಳು ಕಂಪನಿಯ ಲೋಗೋವನ್ನು ಹೊಂದಿರುವುದರಿಂದ, ಪ್ರವೇಶ ದ್ವಾರದಲ್ಲಿ ಪ್ಲಾಸ್ಟಿಕ್ ಕ್ಯಾರಿ ಬ್ಯಾಗ್‌ಗಳಿಗೆ ಶುಲ್ಕ ವಿಧಿಸಲಾಗುತ್ತದೆ ಎಂದು ಹೇಳಿರುವುದು ಅದರ ವಾದಕ್ಕೆ ವಿರುದ್ಧವಾಗಿದೆ ಎಂದು ಆಯೋಗ ಹೇಳಿದೆ.
ನಮ್ಮತುಮಕೂರು.ಕಾಂನ ಕ್ಷಣ ಕ್ಷಣದ ಸುದ್ದಿಗಳನ್ನು ಪಡೆದುಕೊಳ್ಳಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗಳಿಗೆ 9686399493 ನಂಬರ್ ಸೇರಿಸಿಕೊಳ್ಳಿ.
ವಾಟ್ಸಾಪ್ ಗ್ರೂಪ್ ಗೆ ಸೇರಿ: https://chat.whatsapp.com/L4EDpegaxhmLTkOnd50sAy