ತುಮಕೂರು: ಅಮೆರಿಕದ ಪ್ರತಿಷ್ಠಿತ ಸ್ಟ್ಯಾನ್‌ ಫೋರ್ಡ್ ವಿಶ್ವವಿದ್ಯಾಲಯ ಹಾಗೂ ಎಲ್ಸೆವಿಯರ್ ಸಂಸ್ಥೆ ಜಂಟಿಯಾಗಿ ಪ್ರಕಟಿಸಿರುವ 2026ನೇ ಸಾಲಿನ “ವಿಶ್ವದ ಅತ್ಯುನ್ನತ ಶೇಕಡಾ 2% ವಿಜ್ಞಾನಿಗಳ” ಜಾಗತಿಕ ದತ್ತಾಂಶದ ‘ಸಿಂಗಲ್–ಇಯರ್ ಸೈಂಟಿಫಿಕ್ ಇಂಪ್ಯಾಕ್ಟ್’ ವಿಭಾಗದಲ್ಲಿ ತುಮಕೂರಿನ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನ ಗಣಿತಶಾಸ್ತ್ರ ವಿಭಾಗದ ಮುಖ್ಯಸ್ಥರಾದ ಡಾ. ಯೋಗೀಶ್ ಎನ್. ಅವರು ಸ್ಥಾನ ಪಡೆದು ಜಿಲ್ಲೆಗೆ ಹಾಗೂ ರಾಜ್ಯಕ್ಕೆ ಅಪಾರ ಕೀರ್ತಿ ತಂದಿದ್ದಾರೆ.
ವಿಜ್ಞಾನಿಗಳ ಸಂಶೋಧನಾ ಪ್ರಕಟಣೆಗಳು, ಲೇಖನಗಳಿಗೆ ದೊರೆತ ಜಾಗತಿಕ ಉಲ್ಲೇಖಗಳು, H–Index, ಸಹಲೇಖಕತ್ವಕ್ಕೆ ಹೊಂದಾಣಿಕೆ ಮಾಡಿದ ಸೂಚ್ಯಂಕಗಳು ಹಾಗೂ ಇತರ ಪ್ರಮಾಣೀಕೃತ ಸಂಶೋಧನಾ ಪ್ರಭಾವದ ಆಧಾರದ ಮೇಲೆ ಈ ಅಂತರರಾಷ್ಟ್ರೀಯ ದತ್ತಾಂಶವನ್ನು ಸಿದ್ಧಪಡಿಸಲಾಗಿದೆ. ಈ ಪ್ರಸಿದ್ಧ ದತ್ತಾಂಶದಲ್ಲಿ ಇನ್ಫಾರ್ಮೇಷನ್ ಅಂಡ್ ಕಮ್ಯುನಿಕೇಷನ್ ಟೆಕ್ನಾಲಜೀಸ್ ಮುಖ್ಯ ಕ್ಷೇತ್ರದಲ್ಲಿ ಹಾಗೂ ಅನ್ವಯಿಕ ಗಣಿತಶಾಸ್ತ್ರ ಉಪ ಕ್ಷೇತ್ರದಲ್ಲಿ ಡಾ. ಯೋಗೀಶ್ ಎನ್. ಅವರ ಹೆಸರು ದಾಖಲಾಗಿದೆ. ಸ್ವಯಂ ಉಲ್ಲೇಖಗಳನ್ನು ಹೊರತುಪಡಿಸಿ ಅನ್ವಯಿಕ ಗಣಿತಶಾಸ್ತ್ರದ ಉಪ ಕ್ಷೇತ್ರದಲ್ಲಿ ಇವರು ಜಾಗತಿಕ ಮಟ್ಟದಲ್ಲಿ1,261ನೇ ಶ್ರೇಯಾಂಕ ಪಡೆದುಕೊಂಡಿದ್ದಾರೆ. ಪ್ರಸ್ತುತ 94 ಸಂಶೋಧನಾ ಪ್ರಕಟಣೆಗಳನ್ನು ಹೊಂದಿರುವ ಇವರ H–Index 9 ಆಗಿದೆ.
ಡಾ. ಯೋಗೀಶ್ ಎನ್. ಅವರು ಅನ್ವಯಿಕ ಗಣಿತಶಾಸ್ತ್ರ, ಸಂಖ್ಯಾತ್ಮಕ ವಿಶ್ಲೇಷಣೆ, ಫಝಿ ವ್ಯವಸ್ಥೆಗಳು, ಅನಿಶ್ಚಿತತೆಯ ಗಣಿತೀಯ ಮಾದರೀಕರಣ, ಆಪ್ಟಿಮೈಸೇಶನ್ ಹಾಗೂ ಅಂತರಶಿಸ್ತೀಯ ಅನ್ವಯಿಕ ಸಂಶೋಧನಾ ಕ್ಷೇತ್ರಗಳಲ್ಲಿ ಗಣನೀಯ ಕೊಡುಗೆ ನೀಡಿದ್ದಾರೆ. ತುಮಕೂರಿನ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜಿನಲ್ಲಿ ಬೋಧನೆ ಮತ್ತು ವಿದ್ಯಾರ್ಥಿಗಳ ಮಾರ್ಗದರ್ಶನದ ಶೈಕ್ಷಣಿಕ ಜವಾಬ್ದಾರಿಗಳ ಜೊತೆಗೆ ನಿರಂತರ ಸಂಶೋಧನೆಯಲ್ಲಿಯೂ ತೊಡಗಿಸಿಕೊಂಡು ಈ ಅಂತರರಾಷ್ಟ್ರೀಯ ಮಟ್ಟದ ಗೌರವಕ್ಕೆ ಭಾಜನರಾಗಿದ್ದಾರೆ.
ಸರ್ಕಾರಿ ಪದವಿ ಕಾಲೇಜಿನ ಅಧ್ಯಾಪಕರೊಬ್ಬರ ಸಂಶೋಧನಾ ಸಾಧನೆಯು ಜಾಗತಿಕ ಮಟ್ಟದ ಅಧಿಕೃತ ದತ್ತಾಂಶದಲ್ಲಿ ಗುರುತಿಸಲ್ಪಟ್ಟಿರುವುದು ತುಮಕೂರು ಜಿಲ್ಲೆಯ ವಿದ್ಯಾರ್ಥಿಗಳಿಗೆ, ಯುವ ಸಂಶೋಧಕರಿಗೆ ಹಾಗೂ ಅಧ್ಯಾಪಕ ವೃಂದಕ್ಕೆ ಹೆಮ್ಮೆಯ ವಿಷಯವಾಗಿದ್ದು, ಸಂಶೋಧನಾ ಕ್ಷೇತ್ರದಲ್ಲಿ ಮುನ್ನಡೆಯಲು ದೊಡ್ಡ ಪ್ರೇರಣೆಯಾಗಿದೆ. ಇವರ ಈ ಅಪೂರ್ವ ಸಾಧನೆಗೆ ಶೈಕ್ಷಣಿಕ ಕ್ಷೇತ್ರ ಹಾಗೂ ಸಾರ್ವಜನಿಕ ವಲಯದಿಂದ ವ್ಯಾಪಕ ಶ್ಲಾಘನೆ ಮತ್ತು ಅಭಿನಂದನೆಗಳು ವ್ಯಕ್ತವಾಗಿವೆ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI