- ದಾಖಲೆ ನೀಡುವುದಾಗಿ ಭರವಸೆ ನೀಡಿ ಕೈಕೊಟ್ಟ ಅಧಿಕಾರಿಗಳು
- ಕೊರೆಯುವ ಚಳಿಯಲ್ಲಿ ನರಳಾಡಿದ ದೊಡ್ಡಮಾಲೂರಿನ ನಾಗರಾಜಪ್ಪ
- ಆಡಳಿತ ವ್ಯವಸ್ಥೆಯ ವಿರುದ್ಧ ಸಾರ್ವಜನಿಕರ ತೀವ್ರ ಆಕ್ರೋಶ
ಮಧುಗಿರಿ: ಸಾರ್ವಜನಿಕರ ಕೆಲಸಗಳನ್ನು ಸುಗಮವಾಗಿ ಮಾಡಿಕೊಡಬೇಕಾದ ಸರ್ಕಾರಿ ಕಚೇರಿಗಳು, ಜನಸಾಮಾನ್ಯರನ್ನು ಅಲೆದಾಡಿಸುವ ಮತ್ತು ಬೀದಿಯಲ್ಲಿ ಮಲಗಿಸುವ ಕೇಂದ್ರಗಳಾಗಿ ಮಾರ್ಪಡುತ್ತಿವೆಯೇ ಎಂಬ ಪ್ರಶ್ನೆ ಮಧುಗಿರಿಯಲ್ಲಿ ಎದ್ದಿದೆ. ಜಮೀನಿನ ದಾಖಲೆಗಾಗಿ ಬಂದ ವ್ಯಕ್ತಿಯೊಬ್ಬರಿಗೆ ಅಧಿಕಾರಿಗಳು ಸ್ಪಂದಿಸದ ಕಾರಣ, ಕೊರೆಯುವ ಚಳಿಯಲ್ಲಿ ತಹಸೀಲ್ದಾರ್ ಕಚೇರಿ ಮುಂಭಾಗವೇ ಗೋಣಿ ಚೀಲ ಹೊದ್ದು ರಾತ್ರಿ ಕಳೆದ ಮನಕಲಕುವ ಘಟನೆ ನಡೆದಿದೆ.
ಮಧುಗಿರಿ ತಾಲ್ಲೂಕಿನ ದೊಡ್ಡಮಾಲೂರು ಗ್ರಾಮದ ನಿವಾಸಿ ನಾಗರಾಜಪ್ಪ ಎಂಬುವವರು ತಮ್ಮ ಜಮೀನಿನ ಅಗತ್ಯ ದಾಖಲೆಗಳನ್ನು ಪಡೆಯುವ ಸಲುವಾಗಿ ನವೆಂಬರ್ 19ರ ಬೆಳಿಗ್ಗೆ ಮಧುಗಿರಿ ತಹಸೀಲ್ದಾರ್ ಕಚೇರಿಗೆ ಆಗಮಿಸಿದ್ದರು. ಈ ವೇಳೆ ನಾಗರಾಜಪ್ಪ ಅವರ ಸಮಸ್ಯೆ ಆಲಿಸಿದ್ದ ತಹಸೀಲ್ದಾರ್, ಸಂಜೆಯೊಳಗೆ ದಾಖಲೆಗಳನ್ನು ನೀಡುವುದಾಗಿ ಭರವಸೆ ನೀಡಿದ್ದರು ಎನ್ನಲಾಗಿದೆ.
ಅಧಿಕಾರಿಗಳ ಮಾತನ್ನು ನಂಬಿ ಕಚೇರಿ ಆವರಣದಲ್ಲೇ ಕಾದು ಕುಳಿತ ನಾಗರಾಜಪ್ಪ ಅವರಿಗೆ ಸಂಜೆ ಕಳೆದು ರಾತ್ರಿ 8 ಗಂಟೆಯಾದರೂ ದಾಖಲೆಗಳು ಸಿಗಲಿಲ್ಲ. ಸಂಬಂಧಪಟ್ಟ ಅಧಿಕಾರಿಗಳೂ ಕಚೇರಿಯಲ್ಲಿ ಲಭ್ಯವಿರಲಿಲ್ಲ. ಊರಿಗೆ ಮರಳಲು ಸಾಧ್ಯವಾಗದೆ, ಅತ್ತ ಕೆಲಸವೂ ಆಗದೆ ಅಸಹಾಯಕರಾದ ನಾಗರಾಜಪ್ಪ, ಕೊನೆಗೆ ತಹಸೀಲ್ದಾರ್ ಕಚೇರಿಯ ಗೇಟ್ ಬಳಿಯೇ ರಾತ್ರಿ ಕಳೆಯಲು ನಿರ್ಧರಿಸಿದರು. ನವೆಂಬರ್ ತಿಂಗಳ ಕೊರೆಯುವ ಚಳಿಯಿಂದ ರಕ್ಷಿಸಿಕೊಳ್ಳಲು ಗೋಣಿ ಚೀಲವನ್ನೇ ಹೊದಿಕೆಯನ್ನಾಗಿ ಮಾಡಿಕೊಂಡು ಕಚೇರಿ ಮುಂದೆ ಮಲಗಿದ್ದ ದೃಶ್ಯ ಕಂಡು ಸಾರ್ವಜನಿಕರು ಮರುಕ ವ್ಯಕ್ತಪಡಿಸಿದ್ದಾರೆ.
“ಸರ್ಕಾರಿ ಅಧಿಕಾರಿಗಳಿಗೆ ಎಲ್ಲಾ ಸೌಲಭ್ಯಗಳಿವೆ. ಆದರೆ ತಮ್ಮ ಹಕ್ಕಿನ ದಾಖಲೆಗಾಗಿ ಬರುವ ಸಾಮಾನ್ಯ ರೈತರು ಗೋಣಿ ಚೀಲ ಹೊದ್ದು ಬೀದಿಯಲ್ಲಿ ಮಲಗಬೇಕಾದ ದುಸ್ಥಿತಿ ಬಂದಿರುವುದು ಆಡಳಿತ ವ್ಯವಸ್ಥೆಯ ವೈಫಲ್ಯಕ್ಕೆ ಸಾಕ್ಷಿ. ದಾಖಲೆ ನೀಡಲು ಸಾಧ್ಯವಾಗದಿದ್ದರೆ ಕನಿಷ್ಠ ಆ ಬಗ್ಗೆ ಮಾಹಿತಿ ನೀಡುವ ಸೌಜನ್ಯವನ್ನಾದರೂ ಅಧಿಕಾರಿಗಳು ತೋರಬೇಕಿತ್ತು,” ಎಂದು ಸ್ಥಳೀಯರು ಆಕ್ರೋಶ ಹೊರಹಾಕಿದ್ದಾರೆ.
ತುಮಕೂರು ಜಿಲ್ಲಾಧಿಕಾರಿಗಳು ತಕ್ಷಣವೇ ಈ ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಬೇಕು. ನಾಗರಾಜಪ್ಪ ಅವರಿಗೆ ಬಾಕಿ ಇರುವ ದಾಖಲೆಗಳನ್ನು ಶೀಘ್ರವೇ ಒದಗಿಸುವುದರ ಜೊತೆಗೆ, ಸಾರ್ವಜನಿಕರನ್ನು ಅನಗತ್ಯವಾಗಿ ಕಾಯಿಸುವ ಮತ್ತು ನಿರ್ಲಕ್ಷ್ಯ ತೋರುವ ಅಧಿಕಾರಿಗಳಿಂದ ಸ್ಪಷ್ಟನೆ ಪಡೆದು ಸೂಕ್ತ ಕ್ರಮ ಕೈಗೊಳ್ಳಬೇಕು ಎಂಬ ಒತ್ತಾಯ ಕೇಳಿಬಂದಿದೆ.
ವರದಿ: ಮಂಜುಸ್ವಾಮಿ ಎಂ.ಎನ್.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI
