2026–27ನೇ ಮೌಲ್ಯಮಾಪನ ವರ್ಷಕ್ಕೆ (AY 2026–27) ಸಂಬಂಧಿಸಿದಂತೆ ತೆರಿಗೆ ಆಡಿಟ್ ವರದಿ (Tax Audit Report) ಸಲ್ಲಿಸಲು ನೀಡಲಾಗಿರುವ ವಿಸ್ತರಿತ ಗಡುವು ಅಕ್ಟೋಬರ್ 21ಕ್ಕೆ ಮುಕ್ತಾಯವಾಗಲಿದೆ. ಈ ಹಿಂದೆ ಸೆಪ್ಟೆಂಬರ್ 30 ಕೊನೆಯ ದಿನಾಂಕವಾಗಿತ್ತು. ಬಳಿಕ ಗಡುವನ್ನು ಅಕ್ಟೋಬರ್ 21ರವರೆಗೆ ವಿಸ್ತರಿಸಲಾಗಿತ್ತು. ಇನ್ನು ತೆರಿಗೆ ಆಡಿಟ್‌ಗೆ ಒಳಪಡುವ ತೆರಿಗೆದಾರರು ತಮ್ಮ ಆದಾಯ ತೆರಿಗೆ ರಿಟರ್ನ್ (ITR) ಸಲ್ಲಿಸಲು ನವೆಂಬರ್ 21ರವರೆಗೆ ಕಾಲಾವಕಾಶ ನೀಡಲಾಗಿದೆ ಎಂಬ ಮಾಹಿತಿ ಇದೆ.
ಅಂತಿಮ ಗಡುವು ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ವ್ಯಾಪಾರಸ್ಥರು, ವೃತ್ತಿಪರರು ಹಾಗೂ ತೆರಿಗೆ ಆಡಿಟ್ ಕಡ್ಡಾಯವಾಗಿರುವ ಇತರರು ಅಗತ್ಯ ದಾಖಲೆಗಳನ್ನು ಸಿದ್ಧಪಡಿಸಿಕೊಳ್ಳುವುದು ಮುಖ್ಯವಾಗಿದೆ. ವರದಿ ಸಲ್ಲಿಕೆಯಲ್ಲಿ ವಿಳಂಬವಾದರೆ ದಂಡ ವಿಧಿಸುವ ಸಾಧ್ಯತೆಯಿರುವುದರಿಂದ, ಕೊನೆಯ ಕ್ಷಣದ ಗೊಂದಲಗಳನ್ನು ತಪ್ಪಿಸಲು ಲೆಕ್ಕಪತ್ರಗಳು ಮತ್ತು ತೆರಿಗೆ ವಿವರಗಳನ್ನು ಮುಂಚಿತವಾಗಿಯೇ ಪರಿಶೀಲಿಸಬೇಕು.
ಯಾರಿಗೆ ತೆರಿಗೆ ಆಡಿಟ್ ಕಡ್ಡಾಯ?
ಆದಾಯ ತೆರಿಗೆ ಕಾಯ್ದೆ, 1961ರ ಪ್ರಕಾರ ನಿರ್ದಿಷ್ಟ ವಹಿವಾಟು ಮತ್ತು ಆದಾಯದ ಮಿತಿಗಳನ್ನು ಮೀರಿದ ವ್ಯಾಪಾರಸ್ಥರು ಹಾಗೂ ವೃತ್ತಿಪರರಿಗೆ ತೆರಿಗೆ ಆಡಿಟ್ ಕಡ್ಡಾಯವಾಗುತ್ತದೆ.ಸಾಮಾನ್ಯವಾಗಿ ವಾರ್ಷಿಕ ವಹಿವಾಟು ₹1 ಕೋಟಿಗಿಂತ ಹೆಚ್ಚಿರುವ ವ್ಯಾಪಾರಸ್ಥರು ತೆರಿಗೆ ಆಡಿಟ್ ಮಾಡಿಸಬೇಕು. ಆದರೆ ನಗದು ಸ್ವೀಕೃತಿ ಮತ್ತು ಪಾವತಿಗಳು ನಿಗದಿತ ಮಿತಿಯೊಳಗಿದ್ದರೆ, ಕೆಲವು ಷರತ್ತುಗಳ ಅಡಿಯಲ್ಲಿ ಈ ವಹಿವಾಟಿನ ಮಿತಿಯನ್ನು ₹10 ಕೋಟಿವರೆಗೆ ಹೆಚ್ಚಿಸಲಾಗಿದೆ. ವೃತ್ತಿಪರರಿಗೆ ವಾರ್ಷಿಕ ಒಟ್ಟು ವೃತ್ತಿಪರ ಸ್ವೀಕೃತಿಗಳು ₹50 ಲಕ್ಷ ಮೀರಿದಾಗ ತೆರಿಗೆ ಆಡಿಟ್ ಅನ್ವಯಿಸಬಹುದು. ಆದಾಯ ತೆರಿಗೆ ಕಾಯ್ದೆಯ ಇತರ ಷರತ್ತುಗಳನ್ನೂ ಪರಿಶೀಲಿಸುವುದು ಅಗತ್ಯ.
ಈಗಾಗಲೇ ಮತ್ತೊಂದು ಕಾಯ್ದೆಯಡಿ ಲೆಕ್ಕಪರಿಶೋಧನೆಗೆ ಒಳಪಟ್ಟಿರುವವರು ಸಾಮಾನ್ಯವಾಗಿ ಫಾರ್ಮ್ 3CA ಜೊತೆಗೆ ಫಾರ್ಮ್ 3CD ಸಲ್ಲಿಸಬೇಕು. ಇತರ ಅರ್ಹ ಪ್ರಕರಣಗಳಲ್ಲಿ ಫಾರ್ಮ್ 3CB ಜೊತೆಗೆ ಫಾರ್ಮ್ 3CD ಸಲ್ಲಿಸಲಾಗುತ್ತದೆ.
ವಿಭವಾಂಗಲ್ ಅನುಕೂಲರ ಸಂಸ್ಥೆಯ ಸಂಸ್ಥಾಪಕ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಸಿದ್ಧಾರ್ಥ್ ಮೌರ್ಯ ಅವರ ಸಲಹೆಯ ಪ್ರಕಾರ, ಚಾರ್ಟರ್ಡ್ ಅಕೌಂಟೆಂಟ್‌ (CA) ತೆರಿಗೆ ಆಡಿಟ್ ವರದಿಯನ್ನು ಪೋರ್ಟಲ್‌ನಲ್ಲಿ ಸಲ್ಲಿಸುವ ಮೊದಲು ತೆರಿಗೆದಾರರು ಕೆಲವು ಪ್ರಮುಖ ಅಂಶಗಳತ್ತ ಗಮನ ಹರಿಸಬೇಕು.ಮೊದಲನೆಯದಾಗಿ, ಸಂಸ್ಥೆಯ ಲೆಕ್ಕಪತ್ರ ಪುಸ್ತಕಗಳನ್ನು ಅಂತಿಮಗೊಳಿಸಿ, ಆದಾಯ, ವೆಚ್ಚ, ಆಸ್ತಿ ಮತ್ತು ಸಾಲಗಳಿಗೆ ಸಂಬಂಧಿಸಿದ ವಿವರಗಳು ಸರಿಯಾಗಿವೆಯೇ ಎಂಬುದನ್ನು ಖಚಿತಪಡಿಸಿಕೊಳ್ಳಬೇಕು.
ಎರಡನೆಯದಾಗಿ, ಲೆಕ್ಕಪತ್ರಗಳಲ್ಲಿ ತೋರಿಸಿರುವ ಒಟ್ಟು ವಹಿವಾಟನ್ನು ಜಿಎಸ್‌ಟಿ ರಿಟರ್ನ್ಸ್, ಮಾರಾಟದ ಇನ್‌ವಾಯ್ಸ್‌ಗಳು ಹಾಗೂ ಬ್ಯಾಂಕ್ ಸ್ಟೇಟ್‌ಮೆಂಟ್‌ಗಳೊಂದಿಗೆ ಹೋಲಿಕೆ ಮಾಡಬೇಕು. ಕ್ರೆಡಿಟ್ ನೋಟ್‌ಗಳು ಅಥವಾ ಮುಂಗಡ ಪಾವತಿಗಳಿಂದ ವ್ಯತ್ಯಾಸ ಕಂಡುಬಂದರೆ ಅದಕ್ಕೆ ಸಂಬಂಧಿಸಿದ ದಾಖಲೆಗಳನ್ನು ಸಿದ್ಧವಾಗಿಟ್ಟುಕೊಳ್ಳಬೇಕು.
ಮೂರನೆಯದಾಗಿ, ವೆಚ್ಚದ ಕ್ಲೇಮ್‌ ಗಳು, ಬಾಕಿ ಸಾಲಗಳು ಮತ್ತು ಸ್ಥಿರಾಸ್ತಿಗಳ ವಿವರಗಳನ್ನು ಪರಿಶೀಲಿಸಬೇಕು. ತೆರಿಗೆ ನಿಯಮಗಳ ಪ್ರಕಾರ ಸವಕಳಿ (Depreciation) ಲೆಕ್ಕ ಹಾಕಲಾಗಿದೆಯೇ ಎಂಬುದನ್ನೂ ಖಚಿತಪಡಿಸಿಕೊಳ್ಳಬೇಕು.
ನಾಲ್ಕನೆಯದಾಗಿ, ಮೂಲದಲ್ಲಿಯೇ ತೆರಿಗೆ ಕಡಿತ (TDS) ಮತ್ತು ಮೂಲದಲ್ಲಿಯೇ ತೆರಿಗೆ ಸಂಗ್ರಹ (TCS) ವಿವರಗಳನ್ನು ಸಂಬಂಧಿತ ಚಲನ್‌ಗಳು ಹಾಗೂ ರಿಟರ್ನ್ಸ್‌ಗಳೊಂದಿಗೆ ತಾಳೆ ಮಾಡಬೇಕು. ತಪ್ಪುಗಳು ಅಥವಾ ವಿಳಂಬವಾಗಿ ಜಮೆಯಾದ ಮೊತ್ತಗಳಿದ್ದರೆ ಅವುಗಳನ್ನು ಸರಿಪಡಿಸಿಕೊಳ್ಳಬೇಕು.
ತೆರಿಗೆ ಆಡಿಟ್ ವರದಿಯ ಭಾಗವಾಗಿರುವ ಫಾರ್ಮ್ 3CDಯಲ್ಲಿ ಮಾಡಿರುವ ಬದಲಾವಣೆಗಳ ಬಗ್ಗೆಯೂ ತೆರಿಗೆದಾರರು ಮತ್ತು ಲೆಕ್ಕಪರಿಶೋಧಕರು ಗಮನ ಹರಿಸಬೇಕು.ಕ್ಲಾಸ್ 22ರಲ್ಲಿ ಸೂಕ್ಷ್ಮ, ಸಣ್ಣ ಮತ್ತು ಮಧ್ಯಮ ಉದ್ಯಮಗಳಿಗೆ (MSME) ಸಂಬಂಧಿಸಿದ ಪಾವತಿಗಳ ವಿವರಗಳನ್ನು ವರದಿ ಮಾಡುವ ಅಂಶ ಮಹತ್ವದ್ದಾಗಿದೆ. ಕ್ಲಾಸ್ 31ರಲ್ಲಿ ಸಾಲಗಳು, ಠೇವಣಿಗಳು ಮತ್ತು ನಿರ್ದಿಷ್ಟ ಹಣಕಾಸು ವಹಿವಾಟುಗಳಿಗೆ ಸಂಬಂಧಿಸಿದ ಮಾಹಿತಿಯನ್ನು ದಾಖಲಿಸಬೇಕಾಗುತ್ತದೆ.
ಕ್ಲಾಸ್ 36ರಲ್ಲಿ ಷೇರುಗಳ ಮರುಖರೀದಿ (Share Buyback) ಮತ್ತು ಅದಕ್ಕೆ ಸಂಬಂಧಿಸಿದ ವಿವರಗಳ ವರದಿಗೆ ಸಂಬಂಧಿಸಿದ ಬದಲಾವಣೆಗಳನ್ನು ಗಮನಿಸಬೇಕು. ಇದರ ಜತೆಗೆ ಕ್ಲಾಸ್ 12, 19, 21 ಮತ್ತು 26ರಲ್ಲಿನ ಪರಿಷ್ಕರಣೆಗಳು ಹಾಗೂ ಕ್ಲಾಸ್ 28 ಮತ್ತು 29ಕ್ಕೆ ಸಂಬಂಧಿಸಿದ ಬದಲಾವಣೆಗಳನ್ನೂ ಅನ್ವಯವಾಗುವ ನಿಯಮಗಳ ಪ್ರಕಾರ ಪರಿಶೀಲಿಸಬೇಕು.
ತೆರಿಗೆ ಆಡಿಟ್ ವರದಿಯನ್ನು ಸಿಎ ಆದಾಯ ತೆರಿಗೆ ಇ–ಫೈಲಿಂಗ್ ಪೋರ್ಟಲ್‌ನಲ್ಲಿ ಅಪ್‌ಲೋಡ್ ಮಾಡಿದ ಮಾತ್ರಕ್ಕೆ ಪ್ರಕ್ರಿಯೆ ಪೂರ್ಣಗೊಳ್ಳುವುದಿಲ್ಲ. ತೆರಿಗೆದಾರರು ತಮ್ಮ ಲಾಗಿನ್ ಮೂಲಕ ವರದಿಯನ್ನು ಪರಿಶೀಲಿಸಿ ಸ್ವೀಕರಿಸುವ ಪ್ರಕ್ರಿಯೆಯನ್ನೂ ಪೂರ್ಣಗೊಳಿಸಬೇಕು.ಇದಕ್ಕಾಗಿ ತೆರಿಗೆದಾರರು ಪೋರ್ಟಲ್‌ಗೆ ಲಾಗಿನ್ ಆಗಿ ‘Pending Actions’ ವಿಭಾಗದಲ್ಲಿನ ‘Worklist’ ಆಯ್ಕೆಗೆ ಹೋಗಬೇಕು. ನಂತರ ‘Pending for Acceptance’ ವಿಭಾಗದಲ್ಲಿ ಸಿಎ ಸಲ್ಲಿಸಿರುವ ಫಾರ್ಮ್ 3CA-3CD ವರದಿಯನ್ನು ಪರಿಶೀಲಿಸಿ, ಅಗತ್ಯ ದೃಢೀಕರಣದೊಂದಿಗೆ ‘Accept’ ಆಯ್ಕೆಯನ್ನು ಬಳಸಬೇಕು.
ವರದಿ ಬಾಕಿ ಉಳಿದಿದ್ದರೆ ಅಥವಾ ತಿರಸ್ಕೃತಗೊಂಡಿದ್ದರೆ ತಕ್ಷಣವೇ ಸಿಎ ಅವರನ್ನು ಸಂಪರ್ಕಿಸಿ ಸಮಸ್ಯೆಯನ್ನು ಸರಿಪಡಿಸಿಕೊಳ್ಳಬೇಕು. ಪೋರ್ಟಲ್‌ನಲ್ಲಿ ತಾಂತ್ರಿಕ ತೊಂದರೆ ಎದುರಾದರೆ ದೋಷ ಸಂದೇಶಗಳ ಸ್ಕ್ರೀನ್‌ ಶಾಟ್‌ ಗಳು ಹಾಗೂ ಸಂಬಂಧಿತ ಇಮೇಲ್‌ಗಳನ್ನು ಸಾಕ್ಷ್ಯವಾಗಿ ಉಳಿಸಿಕೊಳ್ಳುವುದು ಸೂಕ್ತ.ಆದಾಯ ತೆರಿಗೆ ಕಾಯ್ದೆಯ ಸೆಕ್ಷನ್ 271B ಅಡಿಯಲ್ಲಿ, ಅನ್ವಯವಾಗುವ ಸಂದರ್ಭಗಳಲ್ಲಿ ನಿಗದಿತ ಗಡುವಿನೊಳಗೆ ತೆರಿಗೆ ಆಡಿಟ್ ವರದಿ ಸಲ್ಲಿಸಲು ವಿಫಲವಾದರೆ ಒಟ್ಟು ವಹಿವಾಟು ಅಥವಾ ಒಟ್ಟು ಸ್ವೀಕೃತಿಗಳ ಶೇ. 0.5ರಷ್ಟು ಅಥವಾ ₹1.5 ಲಕ್ಷ, ಇವೆರಡರಲ್ಲಿ ಕಡಿಮೆ ಮೊತ್ತದ ದಂಡ ವಿಧಿಸಲು ಅವಕಾಶವಿದೆ.ಆದರೆ, ವಿಳಂಬಕ್ಕೆ ಸಮರ್ಥನೀಯ ಕಾರಣಗಳಿದ್ದರೆ ಸೆಕ್ಷನ್ 273B ಅಡಿಯಲ್ಲಿ ದಂಡದಿಂದ ವಿನಾಯಿತಿ ಕೋರಲು ಅವಕಾಶವಿದೆ. ವಿನಾಯಿತಿ ನೀಡುವ ನಿರ್ಧಾರವು ಸಂಬಂಧಪಟ್ಟ ತೆರಿಗೆ ಅಧಿಕಾರಿಗಳ ಪರಿಶೀಲನೆಗೆ ಒಳಪಟ್ಟಿರುತ್ತದೆ.
ಹೀಗಾಗಿ ತೆರಿಗೆ ಆಡಿಟ್ ಕಡ್ಡಾಯವಾಗಿರುವವರು ಅಕ್ಟೋಬರ್ 21ರ ಗಡುವನ್ನು ಗಮನದಲ್ಲಿಟ್ಟುಕೊಂಡು ಲೆಕ್ಕಪತ್ರಗಳನ್ನು ಅಂತಿಮಗೊಳಿಸುವುದು, ಸಿಎ ಮೂಲಕ ವರದಿ ಸಲ್ಲಿಸುವುದು ಹಾಗೂ ಇ-ಫೈಲಿಂಗ್ ಪೋರ್ಟಲ್‌ನಲ್ಲಿ ವರದಿಯನ್ನು ಸ್ವೀಕರಿಸುವ ಪ್ರಕ್ರಿಯೆಯನ್ನು ಪೂರ್ಣಗೊಳಿಸುವುದು ಮುಖ್ಯವಾಗಿದೆ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI