ಮನೆಗೆ ಹೊಸದಾಗಿ ಬಣ್ಣ ಬಳಿಯುವುದು, ಅದರಲ್ಲೂ ವಿಶೇಷವಾಗಿ ಮರು ಪೇಂಟಿಂಗ್ ಮಾಡಿಸುವುದು ಹಲವರಿಗೆ ದೊಡ್ಡ ತಲೆನೋವಿನ ಕೆಲಸ. ಪೇಂಟಿಂಗ್ ಮುಗಿದ ನಂತರ ಫರ್ನಿಚರ್‌ಗಳು ಹಾಳಾಗುವುದು ಅಥವಾ ನೆಲದ ಮೇಲೆ ಬಣ್ಣ ಬಿದ್ದು ಕಲೆಯಾಗುವುದು ಬಹುತೇಕ ಮನೆಗಳಲ್ಲಿ ಕೇಳಿಬರುವ ಸಾಮಾನ್ಯ ದೂರು. ಆದರೆ, ಕೊಂಚ ಮುನ್ನೆಚ್ಚರಿಕೆ ವಹಿಸಿದರೆ ಕೋಣೆಯಲ್ಲಿರುವ ಬೆಲೆಬಾಳುವ ವಸ್ತುಗಳಿಗೆ ಹಾನಿಯಾಗದಂತೆ ತಡೆಯಬಹುದು. ಪೇಂಟಿಂಗ್ ಮಾಡುವಾಗ ನೆನಪಿನಲ್ಲಿಡಬೇಕಾದ ಕೆಲವು ಮುಖ್ಯವಾದ ಸಲಹೆಗಳು ಇಲ್ಲಿವೆ:
ವಸ್ತುಗಳ ರಕ್ಷಣೆ ಮೊದಲು:
ಪೇಂಟಿಂಗ್ ಆರಂಭಿಸುವ ಮುನ್ನ ಕೋಣೆಯಲ್ಲಿರುವ ಸಾಧ್ಯವಿರುವ ಎಲ್ಲಾ ವಸ್ತುಗಳನ್ನು ಬೇರೆಡೆಗೆ ಸ್ಥಳಾಂತರಿಸಿ. ಇನ್ನುಳಿದ ವಸ್ತುಗಳನ್ನು ಮತ್ತು ಇಡೀ ನೆಲವನ್ನು ಪ್ಲಾಸ್ಟಿಕ್ ಅಥವಾ ದಪ್ಪನೆಯ ಕ್ಯಾನ್ವಾಸ್ ಬಟ್ಟೆಯಿಂದ ಸಂಪೂರ್ಣವಾಗಿ ಮುಚ್ಚಿ. ಪೇಂಟಿಂಗ್ ವೇಳೆ ಬರುವ ಕಸವನ್ನು ಹಾಕಲು ಮೊದಲೇ ಒಂದು ದೊಡ್ಡ ಡಸ್ಟ್‌ಬಿನ್ ರೆಡಿ ಇಟ್ಟುಕೊಳ್ಳಿ.
ಗೋಡೆಗಳ ಸ್ವಚ್ಛತೆ ಮತ್ತು ರಿಪೇರಿ:
ಬಣ್ಣ ಹಚ್ಚುವ ಮುನ್ನ ಗೋಡೆಗಳನ್ನು ಚೆನ್ನಾಗಿ ತೊಳೆಯಬೇಕು. ಗೋಡೆಗೆ ಅಂಟಿಕೊಂಡಿರುವ ಕಲೆಗಳು ಅಥವಾ ಹಳೆಯ ಪೇಂಟ್ ಅವಶೇಷಗಳನ್ನು ಸ್ಕ್ರಾಪರ್ ಬಳಸಿ ತೆಗೆದುಹಾಕಿ. ಮೊಳೆ ಹೊಡೆದಿದ್ದರಿಂದ ಉಂಟಾದ ರಂಧ್ರಗಳು ಮತ್ತು ಗೋಡೆಯ ಬಿರುಕುಗಳನ್ನು ಪ್ಲಾಸ್ಟರ್ ಆಫ್ ಪ್ಯಾರಿಸ್ ಅಥವಾ ಸಿಮೆಂಟ್ ಬಳಸಿ ಮುಚ್ಚಿ, ಒಣಗಿದ ನಂತರವೇ ಪೇಂಟಿಂಗ್ ಆರಂಭಿಸಬೇಕು. ಇಲ್ಲದಿದ್ದರೆ ಗೋಡೆ ಅಂದಗೆಡುತ್ತದೆ.
ಇಂಟೀರಿಯರ್ ಪ್ಲಾನ್ ಮುಖ್ಯ:
ನಿಮ್ಮ ಮನೆಯ ಒಳಾಂಗಣ ವಿನ್ಯಾಸಕ್ಕೆ (Interior) ಹೊಂದುವಂತಹ ಬಣ್ಣಗಳನ್ನೇ ಆಯ್ಕೆ ಮಾಡಿ. ಇದಕ್ಕಾಗಿ ಪೇಂಟಿಂಗ್ ಕೆಲಸ ಶುರುವಾಗುವ ಮುನ್ನವೇ ಇಂಟೀರಿಯರ್ ಮಾಸ್ಟರ್ ಪ್ಲಾನ್ ಸಿದ್ಧವಾಗಿರಲಿ.
ಪೇಂಟಿಂಗ್ ಮಾಡುವ ಸರಿಯಾದ ಕ್ರಮ:
ಸೀಲಿಂಗ್ ಮತ್ತು ಗೋಡೆಯ ಮೇಲ್ಭಾಗಕ್ಕೆ ಬಣ್ಣ ಹಚ್ಚಲು ‘ರೋಲರ್ ಸ್ಟಿಕ್’ಗಳನ್ನು ಬಳಸಿ. ಇದು ಕೆಲಸವನ್ನು ಸುಲಭಗೊಳಿಸುತ್ತದೆ. ಯಾವಾಗಲೂ ಪೇಂಟಿಂಗ್ ಅನ್ನು ಮೇಲಿನಿಂದ ಕೆಳಮುಖವಾಗಿ ಮಾಡಬೇಕು. ಮೊದಲು ಸೀಲಿಂಗ್, ನಂತರ ಗೋಡೆಗಳು, ಬಾಗಿಲು ಮತ್ತು ಕ್ಯಾಬಿನೆಟ್‌ಗಳ ಕ್ರಮದಲ್ಲಿ ಬಣ್ಣ ಬಳಿಯಬೇಕು. ಗೋಡೆಯ ಒಂದು ಭಾಗವನ್ನು ಸಂಪೂರ್ಣವಾಗಿ ಪೇಂಟ್ ಮಾಡಿದ ನಂತರವೇ ಮುಂದಿನ ಭಾಗಕ್ಕೆ ಕೈ ಹಾಕಿ.
ಗುಣಮಟ್ಟ ಮತ್ತು ಅನುಭವಕ್ಕೆ ಆದ್ಯತೆ ನೀಡಿ:
ಯಾವಾಗಲೂ ಉತ್ತಮ ಅನುಭವವಿರುವ ಪೇಂಟರ್‌ ಗಳಿಗೆ ಮಾತ್ರ ಕೆಲಸವನ್ನು ವಹಿಸಿಕೊಡಿ. ಕಾಂಟ್ರಾಕ್ಟ್ ನೀಡುವಾಗ ಗೋಡೆಗೆ ಎರಡು ಕೋಟ್ ಪ್ರೈಮರ್ (Primer) ಹಾಕುತ್ತಿರುವುದನ್ನು ಖಚಿತಪಡಿಸಿಕೊಳ್ಳಿ. ಗೋಡೆಯ ಮೇಲೆ ಬ್ರಷ್ ನ ಕಲೆಗಳು ಬೀಳದಂತೆ ತಡೆಯಲು ಉತ್ತಮ ಗುಣಮಟ್ಟದ ಬ್ರಷ್ ಮತ್ತು ರೋಲರ್ ಗಳನ್ನೇ ಬಳಸಿ. ಹೊರಗಿನ ಗೋಡೆಗಳನ್ನು ತೊಳೆಯಲು ಸಾಮಾನ್ಯ ಬ್ರಷ್‌ಗಳ ಬದಲಿಗೆ ‘ಹೈ ಪ್ರೆಶರ್ ಕ್ಲೀನರ್’ ಮೆಷಿನ್ ಬಳಸುವುದು ಗೋಡೆಯನ್ನು ಗರಿಷ್ಠವಾಗಿ ಸ್ವಚ್ಛಗೊಳಿಸಲು ಸಹಾಯ ಮಾಡುತ್ತದೆ.
ನಿಮ್ಮ ಮನೆಗೆ ಮರು ಪೇಂಟಿಂಗ್ ಮಾಡುವಾಗ ಈ ಸರಳ ಸಂಗತಿಗಳನ್ನು ಗಮನದಲ್ಲಿಟ್ಟುಕೊಂಡರೆ, ಯಾವುದೇ ಗೊಂದಲವಿಲ್ಲದೆ ನಿಮ್ಮ ಮನೆಗೆ ವೃತ್ತಿಪರ ಹಾಗೂ ಸುಂದರ ನೋಟವನ್ನು ನೀಡಬಹುದು.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/ISmeQjik4LbG9KvWhKlbCC