ಜಿರಳೆ ಹಾಲು ಸಾಮಾನ್ಯ ಹಾಲಿಗಿಂತ ಮೂರು ಪಟ್ಟು ಶಕ್ತಿ ಹೊಂದಿದೆಯಂತೆ: ನೋಡಿ ಎಂತಹ ಚರ್ಚೆ ಹುಟ್ಟು ಹಾಕಿದೆ ಜಿರಳೆ!

ಹಾಲು ಎಂದಾಕ್ಷಣ ಸಾಮಾನ್ಯವಾಗಿ ಹಸು, ಎಮ್ಮೆ ಅಥವಾ ಮೇಕೆಯ ಹಾಲು ನೆನಪಾಗುತ್ತದೆ. ಆದರೆ ಜಿರಳೆಗಳಿಂದಲೂ ಹಾಲಿನಂತಹ ಪೋಷಕಾಂಶಯುಕ್ತ ದ್ರವ ಉತ್ಪತ್ತಿಯಾಗುತ್ತದೆ ಎಂದರೆ ಅಚ್ಚರಿಯಾಗಬಹುದು. ಅಷ್ಟೇ ಅಲ್ಲ, ಈ ದ್ರವದಲ್ಲಿರುವ ಪ್ರೋಟೀನ್ ಹರಳುಗಳು ಸಾಮಾನ್ಯ ಹಾಲಿಗಿಂತ ಮೂರು ಪಟ್ಟು ಹೆಚ್ಚು ಶಕ್ತಿಯನ್ನು ಹೊಂದಿರಬಹುದು ಎಂಬ ಸಂಶೋಧನಾ ವರದಿ ಈಗ ಮತ್ತೆ ಚರ್ಚೆಗೆ ಗ್ರಾಸವಾಗಿದೆ. ಈ ವಿಷಯದ ಕುರಿತು ಉದ್ಯಮಿ ಎಲಾನ್ ಮಸ್ಕ್ ನೀಡಿರುವ ಪ್ರತಿಕ್ರಿಯೆಯೂ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.

ಜಿರಳೆ ಹಾಲು ಎಂದರೇನು? ಯಾವ ಜಾತಿಯಿಂದ ಸಿಗುತ್ತದೆ?

ಎಲ್ಲಾ ಜಿರಳೆಗಳು ಹಾಲು ಉತ್ಪಾದಿಸುವುದಿಲ್ಲ. ಪೆಸಿಫಿಕ್ ಬೀಟಲ್ ಕಾಕ್ರೋಚ್ (Diploptera punctata) ಎಂಬ ವಿಶೇಷ ಜಾತಿಯ ಹೆಣ್ಣು ಜಿರಳೆ ತನ್ನ ಮರಿಗಳಿಗೆ ಆಹಾರ ಒದಗಿಸಲು ಹಾಲಿನಂತಹ ಪೋಷಕ ದ್ರವವನ್ನು ಉತ್ಪಾದಿಸುತ್ತದೆ. ಈ ದ್ರವದಲ್ಲಿ ಪ್ರೋಟೀನ್, ಕೊಬ್ಬು ಮತ್ತು ಸಕ್ಕರೆಯ ಅಂಶಗಳಿರುತ್ತವೆ. ಮರಿಗಳು ಇದನ್ನು ಸೇವಿಸಿದ ಬಳಿಕ ಅವುಗಳ ದೇಹದಲ್ಲಿ ಸಣ್ಣ ಪ್ರೋಟೀನ್ ಹರಳುಗಳಾಗಿ ರೂಪುಗೊಳ್ಳುತ್ತವೆ. ಈ ಹರಳುಗಳಲ್ಲಿ ಹೆಚ್ಚಿನ ಪ್ರಮಾಣದ ಪೋಷಕಾಂಶಗಳು ಸಂಗ್ರಹವಾಗಿರುತ್ತವೆ.

2016ರಲ್ಲಿ ‘ಇಂಟರ್‌ ನ್ಯಾಷನಲ್ ಯೂನಿಯನ್ ಆಫ್ ಕ್ರಿಸ್ಟಲೋಗ್ರಫಿ ಜರ್ನಲ್’ ನಲ್ಲಿ ಪ್ರಕಟವಾದ ಸಂಶೋಧನೆಯಲ್ಲಿ ವಿಜ್ಞಾನಿಗಳು ಈ ಪ್ರೋಟೀನ್ ಹರಳುಗಳ ರಚನೆಯನ್ನು ಅಧ್ಯಯನ ಮಾಡಿದ್ದರು. ಸಾಮಾನ್ಯ ಡೈರಿ ಹಾಲಿನ ಸಮಾನ ಪ್ರಮಾಣಕ್ಕೆ ಹೋಲಿಸಿದಾಗ, ಈ ಹರಳುಗಳು ಸುಮಾರು ಮೂರು ಪಟ್ಟು ಹೆಚ್ಚು ಶಕ್ತಿಯನ್ನು ಹೊಂದಿರಬಹುದು ಎಂಬ ಅಂಶ ಸಂಶೋಧನೆಯಲ್ಲಿ ಗಮನ ಸೆಳೆದಿತ್ತು.ಇವುಗಳಲ್ಲಿ ಅಗತ್ಯ ಅಮೈನೋ ಆಮ್ಲಗಳು, ಪ್ರೋಟೀನ್, ಕೊಬ್ಬು ಸೇರಿದಂತೆ ಹಲವು ಪೋಷಕಾಂಶಗಳಿವೆ. ಕಡಿಮೆ ಸಂಪನ್ಮೂಲ ಬಳಸಿ ಹೆಚ್ಚಿನ ಪೋಷಕಾಂಶಗಳನ್ನು ಪಡೆಯುವ ಸಾಧ್ಯತೆ ಇರುವುದರಿಂದ ಭವಿಷ್ಯದ ಆಹಾರ ಕ್ಷೇತ್ರದಲ್ಲಿ ಇದರ ಬಳಕೆಯ ಬಗ್ಗೆ ವಿಜ್ಞಾನಿಗಳು ಆಸಕ್ತಿ ತೋರಿಸುತ್ತಿದ್ದಾರೆ.

ಜಿರಳೆ ಹಾಲಿನ ಬಗ್ಗೆ ಎಲಾನ್ ಮಸ್ಕ್ ಹೇಳಿದ್ದೇನು?

ಜಿರಳೆ ಹಾಲನ್ನು ಭವಿಷ್ಯದ ಸೂಪರ್‌ಫುಡ್ ಆಗಿ ಬಳಸುವ ಸಾಧ್ಯತೆಯ ಕುರಿತು ವರದಿಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆದಿದೆ. ನ್ಯೂಯಾರ್ಕ್ ಪೋಸ್ಟ್ ಹಂಚಿಕೊಂಡ ಈ ವರದಿಗೆ ಉದ್ಯಮಿ ಎಲಾನ್ ಮಸ್ಕ್ ಪ್ರತಿಕ್ರಿಯಿಸಿದ್ದು, ‘Gross’ (ಅಸಹ್ಯ) ಎಂದು ಒಂದೇ ಪದದಲ್ಲಿ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಅವರ ಈ ಪ್ರತಿಕ್ರಿಯೆ ಕೂಡ ಈಗ ವೈರಲ್ ಆಗಿದೆ.

ಮಾನವರು ಕುಡಿಯಬಹುದೇ ಈ ಜಿರಳೆ ಹಾಲು?

ಜಿರಳೆ ಹಾಲಿನಲ್ಲಿ ಪೋಷಕಾಂಶಗಳಿವೆ ಎಂಬ ಸಂಶೋಧನೆಯಿದ್ದರೂ, ಅದನ್ನು ಮಾನವರು ಸೇವಿಸುವ ಆಹಾರವಾಗಿ ಬಳಸುವ ಹಂತಕ್ಕೆ ಇನ್ನೂ ತಲುಪಿಲ್ಲ. ಇದರ ಉತ್ಪಾದನೆ, ಸಂಗ್ರಹಣೆ, ಸುರಕ್ಷತೆ ಹಾಗೂ ಮಾನವನ ಆರೋಗ್ಯದ ಮೇಲಿನ ಪರಿಣಾಮಗಳ ಕುರಿತು ಹೆಚ್ಚಿನ ಸಂಶೋಧನೆ ಅಗತ್ಯವಿದೆ.ಹೀಗಾಗಿ ಜಿರಳೆ ಹಾಲು ಭವಿಷ್ಯದ ಆಹಾರ ಕ್ಷೇತ್ರದಲ್ಲಿ ಹೊಸ ಸಾಧ್ಯತೆಯಾಗಿರಬಹುದು. ಆದರೆ ಇದನ್ನು ಈಗಲೇ ಮಾನವರಿಗೆ ಸೂಕ್ತವಾದ ಸೂಪರ್‌ ಫುಡ್ ಎಂದು ಪರಿಗಣಿಸುವುದು ಸರಿಯಲ್ಲ. ಪೋಷಕಾಂಶಗಳ ಬಗ್ಗೆ ಕುತೂಹಲ ಮೂಡಿಸಿರುವ ಈ ಸಂಶೋಧನೆ, ವಿಚಿತ್ರ ಆಹಾರ ಮೂಲಗಳ ಕುರಿತ ಚರ್ಚೆಗೆ ಮತ್ತೊಮ್ಮೆ ನಾಂದಿ ಹಾಡಿದೆ.

ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.

ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI