ಬೆಂಗಳೂರು: ಕ್ರಿಕೆಟ್ ಪ್ರೇಮಿಗಳ ಬಹುನಿರೀಕ್ಷಿತ ಇಂಡಿಯನ್ ಪ್ರೀಮಿಯರ್ ಲೀಗ್ (IPL) 2026ರ ಆರಂಭಕ್ಕೆ ಕ್ಷಣಗಣನೆ ಶುರುವಾಗಿದೆ. ಇದರ ನಡುವೆಯೇ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿ (BCCI) ಅಭಿಮಾನಿಗಳಿಗೆ ಸಿಹಿ ಸುದ್ದಿ ನೀಡಿದ್ದು, ಮೊದಲ ಹಂತದ 15 ನಗರಗಳ ‘ಫ್ಯಾನ್ ಪಾರ್ಕ್’ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ವಿಶೇಷವೆಂದರೆ ಈ ಪಟ್ಟಿಯಲ್ಲಿ ಕರ್ನಾಟಕದ ತುಮಕೂರು ಮತ್ತು ಮೈಸೂರು ನಗರಗಳು ಸ್ಥಾನ ಪಡೆದಿವೆ.
ಫ್ಯಾನ್ ಪಾರ್ಕ್ ಅಂದ್ರೇನು?
ಕ್ರೀಡಾಂಗಣಕ್ಕೆ ಹೋಗಿ ಪಂದ್ಯ ನೋಡಲು ಸಾಧ್ಯವಾಗದ ಅಭಿಮಾನಿಗಳಿಗೆ ಸ್ಟೇಡಿಯಂನಂತಹ ಅನುಭವ ನೀಡಲು ಬಿಸಿಸಿಐ ಈ ಫ್ಯಾನ್ ಪಾರ್ಕ್ಗಳನ್ನು ಆಯೋಜಿಸುತ್ತದೆ. ಇಲ್ಲಿ ಬೃಹತ್ ಪರದೆಗಳ ಮೇಲೆ ಪಂದ್ಯದ ನೇರ ಪ್ರಸಾರ ಇರುತ್ತದೆ. ಜೊತೆಗೆ ಸಂಗೀತ, ಮನರಂಜನೆ, ಆಹಾರ ಮಳಿಗೆಗಳು ಮತ್ತು ಮಕ್ಕಳಿಗಾಗಿ ಆಟದ ವಲಯಗಳನ್ನು ನಿರ್ಮಿಸಲಾಗಿರುತ್ತದೆ. ಪ್ರವೇಶ ಸಂಪೂರ್ಣ ಉಚಿತವಾಗಿರುತ್ತದೆ.
ಕರ್ನಾಟಕದ ನಗರಗಳಲ್ಲಿ ಯಾವಾಗ?
ತುಮಕೂರು: ಮೊದಲ ಹಂತದ ಭಾಗವಾಗಿ ತುಮಕೂರು ನಗರದಲ್ಲಿ ಐಪಿಎಲ್ ಫ್ಯಾನ್ ಪಾರ್ಕ್ ಆಯೋಜನೆಯಾಗಲಿದೆ. ಇಲ್ಲಿನ ಸರ್ಕಾರಿ ಜೂನಿಯರ್ ಕಾಲೇಜು ಮೈದಾನದಲ್ಲಿ ಮಾರ್ಚ್ 28 ಮತ್ತು 29 ರಂದು ಅಭಿಮಾನಿಗಳು ಪಂದ್ಯವನ್ನು ಸವಿಯಬಹುದು.
ಮೈಸೂರು: ಸಾಂಸ್ಕೃತಿಕ ನಗರಿ ಮೈಸೂರಿನಲ್ಲಿ ಏಪ್ರಿಲ್ 4 ಮತ್ತು 5 ರಂದು ಫ್ಯಾನ್ ಪಾರ್ಕ್ ನಡೆಯಲಿದೆ. ಮೈಸೂರಿನ ಎಸ್ ಬಿಆರ್ ಆರ್ ಮಹಾಜನ ಪದವಿ ಪೂರ್ವ ಕಾಲೇಜು ಮೈದಾನದಲ್ಲಿ ಇದರ ವ್ಯವಸ್ಥೆ ಮಾಡಲಾಗಿದೆ.
ಬಿಸಿಸಿಐ ಒಟ್ಟು ಮೂರು ವಾರಗಳ ವೇಳಾಪಟ್ಟಿಯನ್ನು ಪ್ರಕಟಿಸಿದೆ:
- ಮೊದಲ ವಾರ (ಮಾರ್ಚ್ 28-29): ರೋಹ್ಟಕ್ (ಹರಿಯಾಣ), ಭೋಪಾಲ್ (ಮಧ್ಯಪ್ರದೇಶ), ನಾಗ್ಪುರ (ಮಹಾರಾಷ್ಟ್ರ), ತುಮಕೂರು (ಕರ್ನಾಟಕ) ಮತ್ತು ಕೃಷ್ಣನಗರ (ಪಶ್ಚಿಮ ಬಂಗಾಳ).
- ಎರಡನೇ ವಾರ (ಏಪ್ರಿಲ್ 4-5): ಮಥುರಾ (ಉತ್ತರ ಪ್ರದೇಶ), ಜೋಧ್ಪುರ (ರಾಜಸ್ಥಾನ), ನಿಜಾಮಾಬಾದ್ (ತೆಲಂಗಾಣ), ಮೈಸೂರು (ಕರ್ನಾಟಕ) ಮತ್ತು ಭುವನೇಶ್ವರ (ಒಡಿಶಾ).
- ಮೂರನೇ ವಾರ (ಏಪ್ರಿಲ್ 11-12): ಮೀರತ್ (ಉತ್ತರ ಪ್ರದೇಶ), ನಡಿಯಾಡ್ (ಗುಜರಾತ್), ರತ್ನಗಿರಿ (ಮಹಾರಾಷ್ಟ್ರ) ಸೇರಿದಂತೆ ಇತರ ನಗರಗಳು.
2015 ರಲ್ಲಿ ಪ್ರಾರಂಭವಾದ ಈ ಫ್ಯಾನ್ ಪಾರ್ಕ್ ಪರಿಕಲ್ಪನೆಯು ಸಣ್ಣ ನಗರಗಳ ಕ್ರಿಕೆಟ್ ಅಭಿಮಾನಿಗಳನ್ನು ಐಪಿಎಲ್ ಸಂಭ್ರಮದಲ್ಲಿ ಒಳಗೊಳ್ಳುವಂತೆ ಮಾಡುವಲ್ಲಿ ಯಶಸ್ವಿಯಾಗಿದೆ. ಮುಂದಿನ ಹಂತದ ನಗರಗಳ ಪಟ್ಟಿಯನ್ನು ಬಿಸಿಸಿಐ ಶೀಘ್ರದಲ್ಲೇ ಪ್ರಕಟಿಸಲಿದೆ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/ISmeQjik4LbG9KvWhKlbCC