ಮೊಬೈಲ್ ಫೋನ್ ಇಂದು ನಮ್ಮ ದೈನಂದಿನ ಬದುಕಿನ ಅವಿಭಾಜ್ಯ ಭಾಗವಾಗಿದೆ. ಕೆಲವರು ಸುಲಭವಾಗಿ ಬಳಸಲು ಶರ್ಟ್‌ನ ಎಡಭಾಗದ ಜೇಬಿನಲ್ಲಿ ಮೊಬೈಲ್ ಇಟ್ಟುಕೊಳ್ಳುತ್ತಾರೆ. ಆದರೆ ಹೃದಯದ ಸಮೀಪದಲ್ಲೇ ಫೋನ್ ಇರುವುದರಿಂದ ಹೃದಯದ ಬಡಿತದ ಮೇಲೆ ಪರಿಣಾಮ ಬೀರುತ್ತದೆಯೇ ಎಂಬ ಅನುಮಾನ ಹಲವರಲ್ಲಿದೆ.
ಸಾಮಾನ್ಯವಾಗಿ ಮೊಬೈಲ್‌ಗಳು ನೆಟ್‌ ವರ್ಕ್ ಸಂಪರ್ಕಕ್ಕಾಗಿ ರೇಡಿಯೊಫ್ರೀಕ್ವೆನ್ಸಿ (RF) ತರಂಗಗಳನ್ನು ಬಳಸುತ್ತವೆ. ಇವು ಅಯಾನೀಕರಿಸದ ವಿಕಿರಣವಾಗಿದ್ದು, ಎಕ್ಸ್‌ರೇಯಂತಹ ಅಯಾನೀಕರಿಸುವ ವಿಕಿರಣದಂತೆ ಡಿಎನ್‌ಎಗೆ ನೇರ ಹಾನಿ ಮಾಡುವಷ್ಟು ಶಕ್ತಿ ಹೊಂದಿಲ್ಲ ಎಂದು FDA ತಿಳಿಸಿದೆ. ಮೊಬೈಲ್ ಫೋನ್‌ಗಳಿಂದ ಉಂಟಾಗುವ RF ವಿಕಿರಣ ಆರೋಗ್ಯಕ್ಕೆ ಅಪಾಯಕಾರಿಯೇ ಎಂಬ ಕುರಿತು ವೈಜ್ಞಾನಿಕ ಸಾಕ್ಷ್ಯವನ್ನು ಸಂಸ್ಥೆ ನಿರಂತರವಾಗಿ ಪರಿಶೀಲಿಸುತ್ತಿದೆ. ಹೀಗಾಗಿ, ಆರೋಗ್ಯವಂತ ವ್ಯಕ್ತಿ ಶರ್ಟ್‌ನ ಎಡ ಜೇಬಿನಲ್ಲಿ ಮೊಬೈಲ್ ಇಟ್ಟುಕೊಂಡಿದ್ದಾನೆ ಎಂಬ ಕಾರಣಕ್ಕೇ ಹೃದಯದ ಬಡಿತದಲ್ಲಿ ಏರುಪೇರಾಗುತ್ತದೆ ಎಂದು ಹೇಳಲು ಸಾಕಷ್ಟು ಪುರಾವೆಗಳಿಲ್ಲ.
ಮೊಬೈಲ್ ಜೇಬಿನಲ್ಲಿದ್ದಾಗ ವೈಬ್ರೇಟ್ ಆದರೆ ಎದೆ ಭಾಗದಲ್ಲಿ ಅದರ ಕಂಪನವನ್ನು ನೇರವಾಗಿ ಅನುಭವಿಸಬಹುದು. ಇದನ್ನು ಕೆಲವರು ಹೃದಯ ಬಡಿತ ಹೆಚ್ಚಾಗಿದೆ ಅಥವಾ ಲಯದಲ್ಲಿ ಏರುಪೇರಾಗಿದೆ ಎಂದು ಭಾವಿಸಬಹುದು. ಆದರೆ ಮೊಬೈಲ್‌ನ ಕಂಪನವನ್ನು ಅನುಭವಿಸುವುದೇ ಹೃದಯದ ಲಯ ಅಸಹಜವಾಗಿದೆ ಎಂಬುದಕ್ಕೆ ಸಾಕ್ಷಿಯಲ್ಲ.
ಪೇಸ್‌ ಮೇಕರ್ ಅಥವಾ ಇಂಪ್ಲಾಂಟೆಡ್ ಕಾರ್ಡಿಯೋವೆರ್ಟರ್ ಡಿಫಿಬ್ರಿಲೇಟರ್ (ICD) ಅಳವಡಿಸಿಕೊಂಡಿರುವವರು ಮೊಬೈಲ್ ಅನ್ನು ಹೃದಯದ ಸಾಧನದ ಸಮೀಪದಲ್ಲಿ ಇಡದಿರುವುದು ಮುಖ್ಯ. ಕೆಲವು ಮೊಬೈಲ್‌ಗಳು ಮತ್ತು ಅವುಗಳ ಮ್ಯಾಗ್ನೆಟಿಕ್ ಆಕ್ಸೆಸರಿಗಳಲ್ಲಿರುವ ಆಯಸ್ಕಾಂತಗಳು ಇಂತಹ ಸಾಧನಗಳ ಕಾರ್ಯನಿರ್ವಹಣೆಗೆ ತಾತ್ಕಾಲಿಕವಾಗಿ ಅಡ್ಡಿಪಡಿಸುವ ಸಾಧ್ಯತೆ ಇದೆ ಎಂದು FDA ಎಚ್ಚರಿಸಿದೆ. ಆದ್ದರಿಂದ ಪೇಸ್‌ಮೇಕರ್ ಅಥವಾ ICD ಹೊಂದಿರುವವರು ಮೊಬೈಲ್ ಅನ್ನು ಅಳವಡಿಸಿರುವ ಸಾಧನದಿಂದ ಕನಿಷ್ಠ 15 ಸೆಂ.ಮೀ. (6 ಇಂಚು) ದೂರದಲ್ಲಿ ಇಡಬೇಕು. ಹೃದಯದ ಸಾಧನ ಇರುವ ಭಾಗದ ಮೇಲಿನ ಎದೆ ಜೇಬಿನಲ್ಲಿ ಮೊಬೈಲ್ ಇಡುವುದನ್ನು ತಪ್ಪಿಸುವಂತೆ ಅಮೆರಿಕನ್ ಹಾರ್ಟ್ ಅಸೋಸಿಯೇಷನ್ ಕೂಡ ಸಲಹೆ ನೀಡುತ್ತದೆ.
ಆರೋಗ್ಯವಂತರು ಎಡ ಜೇಬಿನಲ್ಲಿ ಮೊಬೈಲ್ ಇಡುವುದರಿಂದಲೇ ಹೃದಯಕ್ಕೆ ಹಾನಿಯಾಗುತ್ತದೆ ಎಂಬ ಆತಂಕಕ್ಕೆ ಪ್ರಸ್ತುತ ದೃಢವಾದ ವೈಜ್ಞಾನಿಕ ಆಧಾರವಿಲ್ಲ. ಆದರೆ ಪೇಸ್‌ಮೇಕರ್ ಅಥವಾ ICD ಹೊಂದಿರುವವರು ಮೊಬೈಲ್ ಮತ್ತು ಸಾಧನದ ನಡುವೆ ಸುರಕ್ಷಿತ ಅಂತರ ಕಾಯ್ದುಕೊಳ್ಳುವುದು ಅಗತ್ಯ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI