ಸತ್ತ ನಂತರ ಆತ್ಮ ಎಲ್ಲಿಗೆ ಹೋಗುತ್ತದೆ? ಭೂತ-ಪ್ರೇತಗಳು ನಿಜವಾಗಿಯೂ ಇವೆಯೇ? ನಿಗೂಢ ಶಕ್ತಿಗಳು ಮನುಷ್ಯನ ಮೇಲೆ ಪ್ರಭಾವ ಬೀರುತ್ತವೆಯೇ? ಇಂತಹ ಪ್ರಶ್ನೆಗಳು ಇಂದಿಗೂ ಜನರಲ್ಲಿ ಕುತೂಹಲ ಮತ್ತು ಆತಂಕ ಮೂಡಿಸುತ್ತವೆ. ಈ ವಿಚಾರಗಳ ಕುರಿತು ದೇಶದ ಪ್ಯಾರಾನಾರ್ಮಲ್ ಸಂಶೋಧಕ ಸೌರಭ್ ಪುನಿಯಾ ಅವರು ಸಂದರ್ಶನವೊಂದರಲ್ಲಿ ತಮ್ಮ ಅನುಭವಗಳನ್ನು ಹಂಚಿಕೊಂಡಿದ್ದಾರೆ. ಆತ್ಮಗಳು, ನಕಾರಾತ್ಮಕ ಶಕ್ತಿಗಳು ಹಾಗೂ ತಾವು ನಡೆಸಿದ ಅತೀಂದ್ರಿಯ ಶಕ್ತಿ ಸಂಶೋಧನೆಗಳ ಬಗ್ಗೆ ಹಲವು ಕುತೂಹಲಕಾರಿ ಘಟನೆಗಳನ್ನು ವಿವರಿಸಿದ್ದಾರೆ.
ಸೌರಭ್ ಪುನಿಯಾ ಅವರ ಹೇಳಿಕೆಗಳ ಪ್ರಕಾರ, ಜನರು ಸಾಮಾನ್ಯವಾಗಿ ದೆವ್ವ ಎಂದು ಕರೆಯುವ ಸಂಗತಿಗಳು ನಕಾರಾತ್ಮಕ ಶಕ್ತಿಗಳ ರೂಪದಲ್ಲಿರುತ್ತವೆ. ಅವರ ಸಂದರ್ಶನದಲ್ಲಿ ಪ್ರಸ್ತಾಪವಾದ ಪ್ರಮುಖ ವಿಚಾರಗಳು ಇಲ್ಲಿವೆ. ಆದರೆ ಇವು ಅವರ ವೈಯಕ್ತಿಕ ಅನುಭವಗಳು ಮತ್ತು ನಂಬಿಕೆಗಳಾಗಿದ್ದು, ವೈಜ್ಞಾನಿಕವಾಗಿ ಸಾಬೀತಾಗಿರುವ ಸಂಗತಿಗಳೆಂದು ಪರಿಗಣಿಸಬಾರದು.
ಸಾವಿನ ನಂತರ 13 ದಿನ ಆತ್ಮ ಮನೆಯಲ್ಲೇ ಇರುತ್ತದೆಯೇ?
ಅಪಘಾತ, ನೀರಿನಲ್ಲಿ ಮುಳುಗಿ ಸಾವು ಅಥವಾ ಇತರ ಅಸಹಜ ಸಾವು ಸಂಭವಿಸಿದಾಗ ಆತ್ಮ ತಕ್ಷಣವೇ ದೇಹವನ್ನು ಬಿಟ್ಟು ಹೋಗುವುದಿಲ್ಲ ಎಂಬುದು ಸೌರಭ್ ಅವರ ನಂಬಿಕೆ. ಸಾವು ಸಂಭವಿಸಿದ ಆರಂಭದಲ್ಲಿ ತಾನು ಮೃತಪಟ್ಟಿದ್ದೇನೆ ಎಂಬ ಅರಿವು ಆತ್ಮಕ್ಕೆ ಇರುವುದಿಲ್ಲ. ತನ್ನ ಸುತ್ತಮುತ್ತಲಿನವರನ್ನು ಸಂಪರ್ಕಿಸಲು ಪ್ರಯತ್ನಿಸುತ್ತದೆ ಹಾಗೂ ಹಳೆಯ ನೆನಪುಗಳೊಂದಿಗೆ ಸಂಬಂಧ ಹೊಂದಿರುತ್ತದೆ ಎಂದು ಅವರು ಹೇಳಿದ್ದಾರೆ.
ಕೆಲವು ಪ್ರಕರಣಗಳಲ್ಲಿ ಸಾವಿನ ನಂತರ 13 ದಿನಗಳವರೆಗೆ ಆತ್ಮವು ತನ್ನ ಆಪ್ತರ ಸುತ್ತಮುತ್ತ ಇರುತ್ತದೆ ಎಂಬ ನಂಬಿಕೆಯನ್ನೂ ಅವರು ಹಂಚಿಕೊಂಡಿದ್ದಾರೆ.
ತಮ್ಮ ಪರಿಚಿತರೊಬ್ಬರ ತಂದೆ ನಿಧನರಾದ ಸಂದರ್ಭದಲ್ಲಿ ನಡೆದ ಘಟನೆಯನ್ನು ಉದಾಹರಿಸಿದ ಅವರು, 13ನೇ ದಿನದಂದು ಮೃತ ವ್ಯಕ್ತಿ ಕೊನೆಯದಾಗಿ ಧರಿಸಿದ್ದ ನೀಲಿ ಬಣ್ಣದ ಚೌಕಳಿ ಅಂಗಿಯಲ್ಲೇ ಕುರ್ಚಿಯ ಮೇಲೆ ಕುಳಿತಿರುವಂತೆ ಕಂಡ ಅನುಭವವಾಗಿತ್ತು ಎಂದು ವಿವರಿಸಿದ್ದಾರೆ. ಮೃತ ವ್ಯಕ್ತಿಯೊಂದಿಗೆ ಅತಿಯಾದ ಪ್ರೀತಿ ಮತ್ತು ಭಾವನಾತ್ಮಕ ಸಂಬಂಧ ಹೊಂದಿದ್ದವರಿಗೆ ಇಂತಹ ಅನುಭವಗಳಾಗಬಹುದು ಎಂಬುದು ಅವರ ಅಭಿಪ್ರಾಯ.
ಭಾನ್‌ ಗಢ್ ಕೋಟೆ ರಸ್ತೆಯಲ್ಲಿ ಎದುರಾದ ಅದೃಶ್ಯ ನಾಯಿ!
ತಮ್ಮ ಸಂಶೋಧನೆಯ ಆರಂಭಿಕ ದಿನಗಳಲ್ಲಿ ಎದುರಾದ ವಿಚಿತ್ರ ಘಟನೆಯೊಂದನ್ನು ಸೌರಭ್ ನೆನಪಿಸಿಕೊಂಡಿದ್ದಾರೆ. ಒಮ್ಮೆ ರಾತ್ರಿ ಭಾನ್‌ ಗಢ್ ಕೋಟೆಯ ರಸ್ತೆಯಲ್ಲಿ ಕಾರಿನಲ್ಲಿ ಪ್ರಯಾಣಿಸುತ್ತಿದ್ದಾಗ, ವೇಗವಾಗಿ ಬಂದ ನಾಯಿಯೊಂದು ಕಾರಿಗೆ ಡಿಕ್ಕಿ ಹೊಡೆದಂತೆ ಕಂಡಿತಂತೆ. ನಾಯಿ ಕಾರಿನ ಕೆಳಗೆ ಬಿದ್ದಿರುವುದನ್ನೂ ಅವರು ನೋಡಿದ್ದರಂತೆ.
ಗಾಬರಿಯಿಂದ ಕಾರಿನಿಂದ ಕೆಳಗಿಳಿದು ಪರಿಶೀಲಿಸಿದಾಗ ಅಲ್ಲಿ ನಾಯಿಯೇ ಇರಲಿಲ್ಲ. ಮತ್ತೊಂದು ಅಚ್ಚರಿಯ ಸಂಗತಿಯೆಂದರೆ, ನಾಯಿ ಬಂದ ದಿಕ್ಕಿನಲ್ಲಿ ರಸ್ತೆಯ ಬದಲಿಗೆ ಗೋಡೆಯಿತ್ತು ಎಂದು ಅವರು ಹೇಳಿದ್ದಾರೆ.
ಗ್ರಾಮೀಣ ಪ್ರದೇಶಗಳಲ್ಲಿ ಇಂತಹ ಭ್ರಮೆ ಹುಟ್ಟಿಸುವ ಅನುಭವಗಳನ್ನು ‘ಛಲಾವಾ’ ಎಂದು ಕರೆಯಲಾಗುತ್ತದೆ. ಈ ಘಟನೆ ತಮ್ಮನ್ನು ಪ್ಯಾರಾನಾರ್ಮಲ್ ಸಂಶೋಧನೆಯತ್ತ ಹೆಚ್ಚು ಆಸಕ್ತಿ ವಹಿಸುವಂತೆ ಮಾಡಿತು ಎಂದು ಸೌರಭ್ ತಿಳಿಸಿದ್ದಾರೆ.
ಗೌರವ್ ತಿವಾರಿ ಸಾವು ಮತ್ತು 400 ಆತ್ಮಗಳ ಕಥೆ!
ಭಾರತದ ಪ್ರಸಿದ್ಧ ಪ್ಯಾರಾನಾರ್ಮಲ್ ತನಿಖಾಧಿಕಾರಿ ದಿವಂಗತ ಗೌರವ್ ತಿವಾರಿ ಅವರ ನಿಗೂಢ ಸಾವಿನ ಬಗ್ಗೆಯೂ ಸೌರಭ್ ಮಾತನಾಡಿದ್ದಾರೆ.ತಮ್ಮ ತಂಡವು ‘ಸ್ಪಿರಿಟ್ ಬಾಕ್ಸ್’ ಎಂಬ ಸಾಧನದ ಮೂಲಕ ಸಂಪರ್ಕಿಸಲು ಪ್ರಯತ್ನಿಸಿದಾಗ, ಗೌರವ್ ಎಂಬ ಹೆಸರಿನೊಂದಿಗೆ ಬೆದರಿಕೆಯ ಧ್ವನಿಗಳೂ ಕೇಳಿಬಂದಿದ್ದವು ಎಂದು ಅವರು ಹೇಳಿದ್ದಾರೆ. ಗೌರವ್ ಅವರ ಅಂತ್ಯಕ್ರಿಯೆ ಹರಿದ್ವಾರದಲ್ಲಿ ನಡೆದ ಸಂದರ್ಭದಲ್ಲಿ ಸುಮಾರು 400 ನಕಾರಾತ್ಮಕ ಆತ್ಮಗಳ ಪ್ರಭಾವ ಅವರ ಮೇಲಿತ್ತು ಎಂದು ಪುರೋಹಿತರು ಹೇಳಿದ್ದಾಗಿ ಸೌರಭ್ ಸಂದರ್ಶನದಲ್ಲಿ ಉಲ್ಲೇಖಿಸಿದ್ದಾರೆ.
ನಕಾರಾತ್ಮಕ ಶಕ್ತಿಗಳೊಂದಿಗೆ ಸಂಪರ್ಕ ಸಾಧಿಸಲು ಪ್ರಯತ್ನಿಸುವುದರಿಂದ ಮಾನಸಿಕವಾಗಿ ತೊಂದರೆ ಉಂಟಾಗಬಹುದು ಎಂಬ ಅಭಿಪ್ರಾಯವನ್ನೂ ಅವರು ವ್ಯಕ್ತಪಡಿಸಿದ್ದಾರೆ. ಇಂತಹ ಶಕ್ತಿಗಳು ವ್ಯಕ್ತಿಯ ಮನಸ್ಸಿನ ಮೇಲೆ ಪ್ರಭಾವ ಬೀರಿ ಆತ್ಮಹತ್ಯೆಯಂತಹ ಆಲೋಚನೆಗಳಿಗೆ ಪ್ರಚೋದಿಸಬಹುದು ಎಂಬುದು ಅವರ ಹೇಳಿಕೆ. ಆದರೆ ಗೌರವ್ ತಿವಾರಿ ಅವರ ಸಾವಿಗೆ ಅತೀಂದ್ರಿಯ ಶಕ್ತಿಗಳೇ ಕಾರಣ ಎಂಬುದಕ್ಕೆ ದೃಢಪಟ್ಟ ವೈಜ್ಞಾನಿಕ ಸಾಕ್ಷ್ಯಗಳಿಲ್ಲ.
ತಮ್ಮ ಮನೆಯಲ್ಲೇ ಕಂಡ 6.2 ಅಡಿ ಎತ್ತರದ ಕಪ್ಪು ನೆರಳು!
ದೆಹಲಿಯ ಅಪಾರ್ಟ್‌ಮೆಂಟ್‌ ವೊಂದರ 11ನೇ ಮಹಡಿಯಲ್ಲಿ ಬಾಡಿಗೆಗೆ ವಾಸವಿದ್ದಾಗ ನಡೆದ ಘಟನೆಯನ್ನೂ ಸೌರಭ್ ಹಂಚಿಕೊಂಡಿದ್ದಾರೆ.ಅವರ ಪತ್ನಿಗೆ ಮನೆಯಲ್ಲಿ ಕಪ್ಪು ನೆರಳೊಂದು ಓಡಾಡುತ್ತಿರುವಂತೆ ಭಾಸವಾಗುತ್ತಿತ್ತಂತೆ. ಲಾಕ್‌ ಡೌನ್ ಸಮಯದಲ್ಲಿ ತಾವೂ ದೇವರ ಕೋಣೆಯ ಎದುರು ಸುಮಾರು 6.2 ಅಡಿ ಎತ್ತರದ ಕಪ್ಪು ನೆರಳನ್ನು ನೋಡಿದ್ದಾಗಿ ಅವರು ಹೇಳಿದ್ದಾರೆ.
ನಂತರ ಅಪಾರ್ಟ್‌ಮೆಂಟ್‌ ನ ಭದ್ರತಾ ಸಿಬ್ಬಂದಿಯನ್ನು ವಿಚಾರಿಸಿದಾಗ, ತಾವು ಆ ಮನೆಗೆ ಬರುವ ಕೆಲವೇ ದಿನಗಳ ಮೊದಲು ಅಲ್ಲಿ ವಾಸವಿದ್ದ ಸುಮಾರು 6.2 ಅಡಿ ಎತ್ತರದ ವೃದ್ಧರೊಬ್ಬರು ಮೃತಪಟ್ಟಿದ್ದರು ಎಂಬ ಮಾಹಿತಿ ಸಿಕ್ಕಿತಂತೆ. ಈ ಘಟನೆ ತಮ್ಮನ್ನು ಅಚ್ಚರಿಗೊಳಿಸಿತ್ತು ಎಂದು ಸೌರಭ್ ವಿವರಿಸಿದ್ದಾರೆ.
ದೆವ್ವಗಳು ರಾತ್ರಿ 3 ಗಂಟೆಗೆ ಮಾತ್ರ ಬರುತ್ತವೆಯೇ?
ಸಾಮಾನ್ಯವಾಗಿ ದೆವ್ವಗಳು ಅಥವಾ ಆತ್ಮಗಳು ರಾತ್ರಿ 3 ಗಂಟೆಗೆ ಮಾತ್ರ ಕಾಣಿಸಿಕೊಳ್ಳುತ್ತವೆ ಎಂಬ ನಂಬಿಕೆ ಇದೆ. ಆದರೆ ಈ ಅಭಿಪ್ರಾಯವನ್ನು ಸೌರಭ್ ಒಪ್ಪುವುದಿಲ್ಲ. ಆತ್ಮಗಳಿಗೆ ಹಗಲು–ರಾತ್ರಿ ಎಂಬ ವ್ಯತ್ಯಾಸವಿಲ್ಲ ಎಂಬುದು ಅವರ ವಾದ. ತಮ್ಮ ತಂಡ ಮಧ್ಯಾಹ್ನ 1 ಗಂಟೆಯ ವೇಳೆಯಲ್ಲಿಯೂ ತನಿಖೆ ನಡೆಸಿ ಆಡಿಯೋ ಮತ್ತು ಇತರ ಪ್ರತಿಕ್ರಿಯೆಗಳನ್ನು ದಾಖಲಿಸಿದೆ ಎಂದು ಅವರು ಹೇಳಿದ್ದಾರೆ. ರಾತ್ರಿ ವೇಳೆ ಜನರ ಓಡಾಟ, ವಾಹನಗಳ ಶಬ್ದ ಹಾಗೂ ಇತರ ಬಾಹ್ಯ ಅಡಚಣೆಗಳು ಕಡಿಮೆ ಇರುವುದರಿಂದ ಧ್ವನಿ ದಾಖಲಿಸುವುದು ಸುಲಭವಾಗುತ್ತದೆ. ಇದೇ ಕಾರಣಕ್ಕೆ ಸಾಮಾನ್ಯವಾಗಿ ರಾತ್ರಿ ವೇಳೆ ತನಿಖೆ ನಡೆಸಲಾಗುತ್ತದೆ ಎಂದು ವಿವರಿಸಿದ್ದಾರೆ.
ಸಾರ್ವಜನಿಕರಿಗೆ ಸೌರಭ್ ನೀಡಿದ ಎಚ್ಚರಿಕೆ
ಅತೀಂದ್ರಿಯ ಶಕ್ತಿಗಳ ಕುರಿತು ಕುತೂಹಲ ಹೊಂದಿರುವವರು ಸ್ವತಃ ಇಂತಹ ಪ್ರಯೋಗಗಳನ್ನು ನಡೆಸಲು ಮುಂದಾಗಬಾರದು ಎಂದು ಸೌರಭ್ ಎಚ್ಚರಿಸಿದ್ದಾರೆ. ಮನಸ್ಸು ದುರ್ಬಲವಾಗಿದ್ದರೆ ನಕಾರಾತ್ಮಕ ಶಕ್ತಿಗಳು ವ್ಯಕ್ತಿಯ ಮೇಲೆ ಪ್ರಭಾವ ಬೀರಬಹುದು ಎಂಬುದು ಅವರ ಅಭಿಪ್ರಾಯ. ಸಕಾರಾತ್ಮಕ ಆಲೋಚನೆ ಮತ್ತು ದೇವರ ಮೇಲಿನ ನಂಬಿಕೆ ಮುಖ್ಯ ಎಂದು ಅವರು ಹೇಳಿದ್ದಾರೆ.ಆತ್ಮ, ಭೂತ-ಪ್ರೇತ ಹಾಗೂ ನಿಗೂಢ ಶಕ್ತಿಗಳ ಕುರಿತು ಸೌರಭ್ ಪುನಿಯಾ ಹಂಚಿಕೊಂಡಿರುವ ಅನುಭವಗಳು ಜನರಲ್ಲಿ ಹಲವು ಪ್ರಶ್ನೆಗಳನ್ನು ಹುಟ್ಟುಹಾಕಿವೆ. ಇವು ಅವರ ವೈಯಕ್ತಿಕ ಹೇಳಿಕೆಗಳಾಗಿದ್ದು, ಅತೀಂದ್ರಿಯ ಶಕ್ತಿಗಳ ಅಸ್ತಿತ್ವಕ್ಕೆ ವೈಜ್ಞಾನಿಕ ಪುರಾವೆಗಳೆಂದು ಪರಿಗಣಿಸಲಾಗುವುದಿಲ್ಲ. ಇಂತಹ ಘಟನೆಗಳನ್ನು ಕುತೂಹಲದಿಂದ ನೋಡುವುದರ ಜೊತೆಗೆ ವೈಜ್ಞಾನಿಕ ದೃಷ್ಟಿಕೋನದಿಂದಲೂ ಪರಿಶೀಲಿಸುವುದು ಅಗತ್ಯ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI