ಕೊರಟಗೆರೆ: ಸನಾತನ ಧರ್ಮದಲ್ಲಿ ಕುಂಭಾಭಿಷೇಕಕ್ಕೆ ತನ್ನದೇ ಆದ ಮಹತ್ವ ಇದೆ. ಶಿವನಿಗೆ ಕುಂಭಾಭಿಷೇಕ ಮಾಡಿದರೆ, ಇಡೀ ನಾಡಿಗೆ ಮಳೆ, ಬೆಳೆ ಸಮೃದ್ಧಿಯಾಗುತ್ತದೆ. ಧರ್ಮವನ್ನು ನಾವು ಉಳಿಸಿಕೊಂಡರೆ, ಧರ್ಮ ನಮ್ಮನ್ನು ಉಳಿಸುತ್ತದೆ” ಎಂದು ಸಿದ್ದರಬೆಟ್ಟದ ಶ್ರೀ ವೀರಭದ್ರ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.
2ನೇ ದಕ್ಷಿಣ ಕಾಶಿ ಎಂದೇ ಪ್ರಖ್ಯಾತಿ ಪಡೆದಿರುವ ಪಟ್ಟಣದ ಶ್ರೀಗಂಗಾಧರೇಶ್ವರ ಸ್ವಾಮಿ ದೇವಾಲಯದಲ್ಲಿ ಕುಂಭಾಭಿಷೇಕ ಸಮಿತಿ ವತಿಯಿಂದ ಮಳೆಗಾಗಿ ಆಯೋಜಿಸಿದ್ದ ವಿಶೇಷ ರುದ್ರಾಭಿಷೇಕ, ಮಹಾಕುಂಭಾಭಿಷೇಕ, ಹೋಮ–ಹವನ ಕಾರ್ಯಕ್ರಮದಲ್ಲಿ ದಿವ್ಯ ಸಾನಿಧ್ಯ ವಹಿಸಿ ಪೂಜೆ ಸಲ್ಲಿಸಿ ಮಾತನಾಡಿದರು.
ಮಹಾ ಕುಂಭಾಭಿಷೇಕದ ಈ ಪವಿತ್ರ ಸಂದರ್ಭದಲ್ಲಿ ನಾವೆಲ್ಲರೂ ಸೇರಿ ಮಳೆಗಾಗಿ ಪ್ರಾರ್ಥಿಸಿದರೆ, ಆ ಗಂಗಾಧರೇಶ್ವರ ಖಂಡಿತ ಒಲಿಯುತ್ತಾನೆ. ಮಳೆ ಬಾರದಿದ್ದರೆ ರೈತ ಬದುಕುವುದಿಲ್ಲ, ರೈತ ಬದುಕದಿದ್ದರೆ ದೇಶ ಬದುಕುವುದಿಲ್ಲ ಎಂದು ತಿಳಿಸಿದರು.
ಎಲೆರಾಂಪುರ ಶ್ರೀಗಳಾದ ಡಾ.ಹನುಮಂತನಾಥ ಸ್ವಾಮೀಜಿ ಮಾತನಾಡಿ, “ದೇವಾಲಯದ ಮಹಾಕುಂಭಾಭಿಷೇಕಕ್ಕೆ ಸಾವಿರಾರು ವರ್ಷಗಳ ಪುಣ್ಯ ಬೇಕು. ಈ ಸಂದರ್ಭದಲ್ಲಿ ನಡೆಯುವ ಹೋಮ-ಹವನ, ರುದ್ರಾಭಿಷೇಕದಿಂದ ವಾತಾವರಣ ಶುದ್ಧಿಯಾಗಿ, ಮಳೆ ಬರಲು ಅನುಕೂಲವಾಗುತ್ತದೆ. ಕುಂಭಾಭಿಷೇಕದ ಜೊತೆಗೆ ಪ್ರಕೃತಿಯನ್ನು ಕಾಪಾಡುವ ಕೆಲಸವನ್ನೂ ನಾವು ಮಾಡಬೇಕು” ಎಂದು ಹೇಳಿದರು.
ಬೆಳಗ್ಗೆಯಿಂದಲೇ ರುದ್ರಾಭಿಷೇಕ, ಕುಂಭಾಭಿಷೇಕ, ಪರ್ಜನ್ಯ ಜಪ, ಋಷ್ಯಶೃಂಗ ಜಪ, ಸೂರ್ಯ ನಮಸ್ಕಾರ, ಮಹಾರುದ್ರ ಹೋಮ, ರುದ್ರಪಠಣ, ಮಹಾಮಂಗಳಾರತಿ ಮುಗಿಯುತ್ತಿದ್ದಂತೆ ಕೊರಟಗೆರೆಯಲ್ಲಿ ದಟ್ಟ ಮೋಡ ಕವಿದ ವಾತಾವರಣ ಸೃಷ್ಟಿಯಾಗಿ, ಮಳೆ ಬರುವ ಸೂಚನೆ ಕಂಡುಬಂದಿದ್ದು ಭಕ್ತರಲ್ಲಿ ಭಕ್ತಿ ಭಾವ ಇನ್ನಷ್ಟು ಹೆಚ್ಚಿಸಿತು. ಕಾರ್ಯಕ್ರಮದಲ್ಲಿ 2 ಸಾವಿರಕ್ಕೂ ಅಧಿಕ ಭಕ್ತರಿಗೆ ಪ್ರಸಾದ ವ್ಯವಸ್ಥೆ ಮಾಡಲಾಗಿತ್ತು.
ಈ ವೇಳೆ ಕೋಳಾಲ ಜಿ.ಪಂ ಮಾಜಿ ಸದಸ್ಯ ಪಿ.ಎನ್ ಕೃಷ್ಣಮೂರ್ತಿ, ತಹಶೀಲ್ದಾರ್ ಮಂಜುನಾಥ್, ಪುರಸಭೆ ಮುಖ್ಯಾಧಿಕಾರಿ ಉಮೇಶ್, ಎಂಜಿ ಜ್ಯೂವೆಲೆರ್ಸ್ ಮಾಲೀಕ ಸುಧೀರ್, ಬದ್ರಿಪ್ರಸಾದ್, ಬಿಜೆಪಿ ಅಧ್ಯಕ್ಷ ರುದ್ರೇಶ್, ಮಾಜಿ ಅಧ್ಯಕ್ಷ ಪವನ್ ಕುಮಾರ್, ಎಚ್.ಎಂ ರುದ್ರಪ್ರಸಾದ್, ಮಾಜಿ ಪ.ಪಂ ಸದಸ್ಯ ಕೆ.ಆರ್ ಓಬಳರಾಜು, ಕುಂಭಾಭಿಷೇಕ ಸಮಿತಿ ಅಧ್ಯಕ್ಷ ಲಕ್ಷ್ಮೀನಾರಾಯಣ್, ಅಶ್ವತ್ಥ ನಾರಾಯಣ್ ರಾಜು, ಚಂದ್ರಶೇಖರ್ ಅರಸ್, ಕೆ.ವಿ ಪುರುಷೋತ್ತಮ್, ಸುರೇಶ್, ರಾಘವೇಂದ್ರ, ರವಿಕುಮಾರ್, ತಿಮ್ಮರಾಜು, ಮಂಜುನಾಥ್, ಆಟೋ ಕುಮಾರ್, ಅರ್ಚಕರಾದ ಬಾಲಾಜಿ, ದತ್ತಾತ್ರೇಯ ದೀಕ್ಷೀತ್ ಸೇರಿದಂತೆ ಇತರರು ಉಪಸ್ಥಿತರಿದ್ದರು.
ವರದಿ: ಮಂಜುಸ್ವಾಮಿ ಎಂ.ಎನ್.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI