ಬೆಂಗಳೂರು ಮತ್ತು ಕರಾವಳಿ ನಗರಿ ಮಂಗಳೂರಿನ ನಡುವಿನ ಪ್ರಯಾಣದ ಅವಧಿಯನ್ನು ಗಣನೀಯವಾಗಿ ತಗ್ಗಿಸುವ ಬಹುನಿರೀಕ್ಷಿತ ಯಶವಂತಪುರ–ಮಂಗಳೂರು–ಮಡಗಾಂವ್ ವಂದೇ ಭಾರತ್ ಎಕ್ಸ್‌ ಪ್ರೆಸ್ ರೈಲಿಗೆ ಪ್ರಧಾನಿ ನರೇಂದ್ರ ಮೋದಿ ಅವರು ನವೆಂಬರ್ 13ರಂದು ಹಸಿರು ನಿಶಾನೆ ತೋರಿಸಿದ್ದಾರೆ.
ಈ ನೂತನ ರೈಲು ಸೇವೆಯ ನಿಯಮಿತ ವಾಣಿಜ್ಯ ಸಂಚಾರವು ನವೆಂಬರ್ 15, 2026ರಿಂದ ಅಧಿಕೃತವಾಗಿ ಆರಂಭವಾಗಲಿದೆ. ರಾಜಧಾನಿಯಿಂದ ಕರಾವಳಿ ಭಾಗಕ್ಕೆ ವಿಶ್ವದರ್ಜೆಯ ಸಂಪರ್ಕ ಕಲ್ಪಿಸುವ ಈ ರೈಲಿನಿಂದ ಪ್ರಯಾಣಿಕರಿಗೆ ಸಾಮಾನ್ಯ ರೈಲುಗಳಿಗೆ ಹೋಲಿಸಿದರೆ ಬರೋಬ್ಬರಿ 2 ರಿಂದ 9 ಗಂಟೆಗಳವರೆಗೆ ಸಮಯ ಉಳಿತಾಯವಾಗಲಿದೆ.
ಪ್ರಾಯೋಗಿಕ ಸಂಚಾರದ ವೇಳೆ 16 ಬೋಗಿಗಳ ಈ ವಂದೇ ಭಾರತ್ ರೈಲು ಯಶವಂತಪುರದಿಂದ ಹೊರಟು ಕೇವಲ 7 ಗಂಟೆ 5 ನಿಮಿಷಗಳಲ್ಲಿ ಮಂಗಳೂರು ಜಂಕ್ಷನ್ ತಲುಪುವ ಮೂಲಕ ದಾಖಲೆ ನಿರ್ಮಿಸಿದೆ. ಮರಳಿ ಮಂಗಳೂರಿನಿಂದ ಯಶವಂತಪುರಕ್ಕೆ ಕೇವಲ 6 ಗಂಟೆ 49 ನಿಮಿಷಗಳಲ್ಲಿ ಪ್ರಯಾಣ ಪೂರ್ಣಗೊಳಿಸಿದೆ. ಸಾಮಾನ್ಯವಾಗಿ ಬೆಂಗಳೂರು-ಮಂಗಳೂರು ನಡುವಿನ ಇತರ ರೈಲು ಪ್ರಯಾಣಕ್ಕೆ 9 ರಿಂದ 16 ಗಂಟೆಗಳವರೆಗೆ ಬೇಕಾಗುತ್ತಿತ್ತು. ಈ ವಂದೇ ಭಾರತ್ ರೈಲು ವಾರದಲ್ಲಿ ಆರು ದಿನಗಳ ಕಾಲ ಸಂಚರಿಸಲಿದ್ದು, ಯಶವಂತಪುರದಿಂದ ಮಡಗಾಂವ್ ಗೆ ಸಂಚರಿಸುವ ರೈಲು ಸಂಖ್ಯೆ 26655 ಬೆಳಗ್ಗೆ 7:35ಕ್ಕೆ ಹೊರಟು ರಾತ್ರಿ 8:55ಕ್ಕೆ ತಲುಪಲಿದೆ ಮತ್ತು ಇದು ಬುಧವಾರದಂದು ರಜೆ ಹೊಂದಿರುತ್ತದೆ. ಹಾಗೆಯೇ ಮಡಗಾಂವ್‌ನಿಂದ ಯಶವಂತಪುರಕ್ಕೆ ಬರುವ ರೈಲು ಸಂಖ್ಯೆ 26656 ಬೆಳಗ್ಗೆ 8:20ಕ್ಕೆ ಹೊರಟು ರಾತ್ರಿ 9:15ಕ್ಕೆ ತಲುಪಲಿದ್ದು, ಗುರುವಾರದಂದು ರಜೆ ಇರಲಿದೆ.
ಈ ರೈಲು ಶ್ರವಣಬೆಳಗೊಳ, ಹಾಸನ, ಸಕಲೇಶಪುರ, ಸುಬ್ರಹ್ಮಣ್ಯ ರೋಡ್, ಕಬಕ ಪುತ್ತೂರು, ಮಂಗಳೂರು ಜಂಕ್ಷನ್, ಉಡುಪಿ, ಕುಂದಾಪುರ, ಬೈಂದೂರು ಮೂಕಾಂಬಿಕಾ ರೋಡ್, ಮುರುಡೇಶ್ವರ, ಗೋಕರ್ಣ ರೋಡ್ ಮತ್ತು ಕಾರವಾರ ಸೇರಿದಂತೆ ಒಟ್ಟು 12 ನಿಲ್ದಾಣಗಳಲ್ಲಿ ವಾಣಿಜ್ಯ ನಿಲುಗಡೆ ನೀಡಲಿದೆ. ಪಶ್ಚಿಮ ಘಟ್ಟದ ರಮಣೀಯ ಪ್ರಕೃತಿ ಮತ್ತು ಕರಾವಳಿಯ ತೀರ ಪ್ರದೇಶದ ಮೂಲಕ ಸಾಗುವ ಈ ರೈಲು ಪ್ರಯಾಣಿಕರಿಗೆ ಅತ್ಯುತ್ತಮ ಅನುಭವ ನೀಡಲಿದೆ.
ವಿಮಾನ ಪ್ರಯಾಣಕ್ಕೆ ಹೋಲಿಸಿದರೆ ವಿಮಾನ ನಿಲ್ದಾಣಕ್ಕೆ ತೆರಳುವ ಪ್ರಯಾಣ, ಚೆಕ್–ಇನ್ ಹಾಗೂ ಭದ್ರತಾ ತಪಾಸಣೆಯ ಸಮಯವನ್ನು ಪರಿಗಣಿಸಿದರೆ ನಗರದ ಮಧ್ಯಭಾಗದಿಂದಲೇ ಹೊರಡುವ ಈ ವಂದೇ ಭಾರತ್ ರೈಲು ಹೆಚ್ಚು ಆರಾಮದಾಯಕ ಹಾಗೂ ಲಾಭದಾಯಕವಾಗಿದೆ. ಪ್ರಯಾಣಿಕರು ಐಆರ್‌ ಸಿಟಿಸಿ ವೆಬ್‌ ಸೈಟ್ ಅಥವಾ ಮೊಬೈಲ್ ಆ್ಯಪ್ ಮೂಲಕ ಟಿಕೆಟ್ ಕಾಯ್ದಿರಿಸಬಹುದು.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI