ಬೆಂಗಳೂರು: ರಾಜಾಜಿನಗರದಲ್ಲಿ ಇತ್ತೀಚೆಗೆ ನಡೆದಿದ್ದ ಒಂದೇ ಕುಟುಂಬದ ಏಳು ಜನರ ಭೀಕರ ಸರಣಿ ಹತ್ಯೆ ಪ್ರಕರಣದ ತನಿಖೆಯನ್ನು ಪೊಲೀಸರು ಮತ್ತಷ್ಟು ಚುರುಕುಗೊಳಿಸಿದ್ದಾರೆ. ಪತ್ನಿ ಸುನೀತಾ ಹಾಗೂ ಆಕೆಯ ತವರು ಮನೆಯವರು ನೀಡುತ್ತಿದ್ದ ಕಿರುಕುಳ ತಾಳಲಾರದೆ ಹತ್ಯೆ ಮಾಡಿರುವುದಾಗಿ ಆರೋಪಿ ಇಂದುಶೇಖರ್ ಈ ಹಿಂದೆ ಹೇಳಿಕೆ ನೀಡಿದ್ದನು. ಆದರೆ, ಹೆಚ್ಚಿನ ವಿಚಾರಣೆಯ ವೇಳೆ ಕೋಟ್ಯಂತರ ರೂಪಾಯಿ ಮೌಲ್ಯದ ಆಸ್ತಿಗಾಗಿ ಈ ಕೊಲೆಗಳನ್ನು ಮಾಡಿರುವ ಶಂಕೆ ವ್ಯಕ್ತವಾಗಿದ್ದು, ಉತ್ತರ ವಿಭಾಗದ ಡಿಸಿಪಿ ಬಿ.ಎಸ್. ನ್ಯಾಮಗೌಡ ಅವರ ನೇತೃತ್ವದಲ್ಲಿ ಪೊಲೀಸರು ಈ ಆಯಾಮದಲ್ಲಿ ತೀವ್ರ ತನಿಖೆ ನಡೆಸುತ್ತಿದ್ದಾರೆ.
ಶ್ರೀರಾಮಪುರದಲ್ಲಿ ಆರೋಪಿಯ ಅತ್ತೆಯ ಹೆಸರಿನಲ್ಲಿ ಕೋಟ್ಯಂತರ ರೂಪಾಯಿ ಮೌಲ್ಯದ ಆಸ್ತಿಯಿದ್ದು, ಅದು ಕುಟುಂಬದ ಸದಸ್ಯರೆಲ್ಲರಿಗೂ ಪಾಲಾಗಬೇಕಿತ್ತು. ಪತ್ನಿಯ ಮನೆಯವರ ಕಿರುಕುಳದ ಜೊತೆಗೆ, ಕುಟುಂಬದ ಎಲ್ಲರನ್ನೂ ಹತ್ಯೆ ಮಾಡಿದರೆ ಆಸ್ತಿ ಯಾರಿಗೂ ಪಾಲಾಗದೆ ಸಂಪೂರ್ಣವಾಗಿ ತನಗೇ ಲಭಿಸಲಿದೆ ಎಂದು ಇಂದುಶೇಖರ್ ಸಂಚು ರೂಪಿಸಿದ್ದ ಎನ್ನಲಾಗಿದೆ. ಇದರಂತೆ ಸಂಬಂಧಿಕರನ್ನು ಪ್ರತ್ಯೇಕವಾಗಿ ಮನೆಗೆ ಕರೆಯಿಸಿಕೊಂಡು, ಊಟದಲ್ಲಿ ಮತ್ತುಬರುವ ಔಷಧ ಬೆರೆಸಿ ಪ್ರಜ್ಞಾಹೀನರನ್ನಾಗಿ ಮಾಡಿ, ಬಳಿಕ ರುಬ್ಬುಗುಂಡಿನಿಂದ ತಲೆಗೆ ಜಜ್ಜಿ ಭೀಕರವಾಗಿ ಹತ್ಯೆ ಮಾಡಿದ್ದಾನೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.
ತಂದೆಗೆ ಸಾಥ್ ನೀಡಿದ ಮಗಳು!
ಈ ಸರಣಿ ಹತ್ಯೆ ಪ್ರಕರಣದಲ್ಲಿ ಆರೋಪಿ ಇಂದುಶೇಖರ್ ನೊಂದಿಗೆ ಆತನ ಅಪ್ರಾಪ್ತ ಮಗಳು ಕೂಡ ಭಾಗಿಯಾಗಿರುವುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಬಾಲಕಿಯನ್ನು ಬಾಲ ನ್ಯಾಯಮಂಡಳಿಗೆ ಹಾಜರುಪಡಿಸಿ 10 ದಿನಗಳ ಕಾಲ ವಶಕ್ಕೆ ಪಡೆದಿರುವ ಪೊಲೀಸರು ಪ್ರತ್ಯೇಕವಾಗಿ ವಿಚಾರಣೆ ನಡೆಸುತ್ತಿದ್ದಾರೆ. ಕೊಲೆಗೆ ತಯಾರಿ, ಸಂಚು ಮತ್ತು ಅದನ್ನು ಕಾರ್ಯಗತಗೊಳಿಸಿದ ರೀತಿ, ಮುಖ್ಯವಾಗಿ ಮಗಳಿಗೆ ತಂದೆ ಯಾವ ರೀತಿ ‘ಬ್ರೈನ್ ವಾಶ್’ ಮಾಡಿದ್ದ ಎಂಬುದರ ಕುರಿತು ವಿಚಾರಣೆ ನಡೆಯುತ್ತಿದೆ. ಕೃತ್ಯ ನಡೆದಾಗ ಬಾಲಕಿಗೆ 17 ವರ್ಷ ವಯಸ್ಸಾಗಿದ್ದು, ನವೆಂಬರ್ 8ರಂದು 18 ವರ್ಷ ತುಂಬಿದೆ. ಈ ಹಿನ್ನೆಲೆಯಲ್ಲಿ ಮುಂದಿನ ಕ್ರಮದ ಕುರಿತು ಕಾನೂನು ತಜ್ಞರ ಜೊತೆ ಚರ್ಚಿಸಲಾಗುವುದು ಎಂದು ಪೊಲೀಸರು ಮಾಹಿತಿ ನೀಡಿದ್ದಾರೆ.
ಒಣಮೆಣಸಿನಕಾಯಿ ತಂತ್ರ!
ಆರೋಪಿ ಇಂದುಶೇಖರ್ ತನ್ನ ಭಾವ ಶಂಕರ್ ಹಾಗೂ ನಾದಿನಿ ನಳಿನಿ ದಂಪತಿಯನ್ನು ಹತ್ಯೆ ಮಾಡಿದ ಬಳಿಕ, ಮೃತದೇಹಗಳನ್ನು ಚೀಲಗಳಲ್ಲಿ ತುಂಬುವಾಗ ಒಣಮೆಣಸಿನಕಾಯಿ ತುರುಕಿದ್ದನು. ಕಾಡು ಪ್ರಾಣಿ ಹಾಗೂ ಪಕ್ಷಿಗಳು ಮೃತದೇಹಗಳನ್ನು ಕಿತ್ತು ತಿನ್ನಬಾರದು ಎಂಬುದು ಇದರ ಒಂದು ಉದ್ದೇಶವಾಗಿದ್ದರೆ, ಖಾರದ ಪುಡಿ ಅಥವಾ ಒಣಮೆಣಸಿನಕಾಯಿ ಹಾಕುವುದರಿಂದ ಪೊಲೀಸ್ ಶ್ವಾನಗಳು ಮೃತದೇಹದ ವಾಸನೆ ಹಿಡಿಯಲು ಸಾಧ್ಯವಾಗುವುದಿಲ್ಲ ಮತ್ತು ತಾನು ಸಿಕ್ಕಿಬೀಳುವುದಿಲ್ಲ ಎಂಬ ಲೆಕ್ಕಾಚಾರವನ್ನು ಆರೋಪಿ ಹಾಕಿದ್ದನು. ಈ ಇಬ್ಬರ ಮೃತದೇಹಗಳು ನವೆಂಬರ್ 9ರಂದು ಶಿರಾಡಿಘಾಟ್ ನ ಮಾರನಹಳ್ಳಿ ಸಮೀಪದ 100 ಅಡಿ ಆಳದ ಕಂದಕದಲ್ಲಿ ಪತ್ತೆಯಾಗಿದ್ದವು.
‘ಲುಮಿನಾಲ್ ಟೆಸ್ಟ್’!
ಪ್ರಕರಣದಲ್ಲಿ ಮೃತಪಟ್ಟವರ ಮರಣೋತ್ತರ ಪರೀಕ್ಷೆ ವರದಿಗಾಗಿ ಪೊಲೀಸರು ಎದುರು ನೋಡುತ್ತಿದ್ದಾರೆ. ಮತ್ತೊಂದೆಡೆ, ಎಫ್ ಎಸ್ ಎಲ್ (FSL) ಮತ್ತು ಸೋಕೋ (SOCO) ತಂಡಗಳು ಹಂತಕನ ಮನೆಯಲ್ಲಿ ತಾಂತ್ರಿಕ ಹಾಗೂ ವೈಜ್ಞಾನಿಕ ಸಾಕ್ಷ್ಯಾಧಾರಗಳನ್ನು ಕಲೆಹಾಕಿವೆ. ಕೊಲೆ ಮಾಡಿದ ಬಳಿಕ ಸಾಕ್ಷ್ಯ ನಾಶಪಡಿಸಲು ಆರೋಪಿಯು ಮನೆಯ ಹಾಲ್, ಬಾತ್ರೂಮ್ ಹಾಗೂ ಕೃತ್ಯಕ್ಕೆ ಬಳಸಿದ ರುಬ್ಬುಗುಂಡಿನ ಮೇಲಿದ್ದ ರಕ್ತದ ಕಲೆಗಳನ್ನು ಸಂಪೂರ್ಣವಾಗಿ ಸ್ವಚ್ಛಗೊಳಿಸಿದ್ದನು. ಹೀಗಾಗಿ ಕಣ್ಣಿಗೆ ಕಾಣದ ರಕ್ತದ ಮಾದರಿಗಳನ್ನು ಪತ್ತೆಹಚ್ಚಲು ತಜ್ಞರ ಮೂಲಕ ಮನೆಯಲ್ಲಿ ‘ಲುಮಿನಾಲ್ ಟೆಸ್ಟ್’ (Luminol Test) ನಡೆಸಲಾಗಿದೆ.
ಏನಿದು ಲುಮಿನಾಲ್ ಟೆಸ್ಟ್?:
ರಕ್ತದ ಕಲೆಗಳಿರುವ ನೆಲ ಅಥವಾ ವಸ್ತುಗಳನ್ನು ನೀರಿನಿಂದ ತೊಳೆದು ಸ್ವಚ್ಛಗೊಳಿಸಿದರೂ, ಅದರಲ್ಲಿ ರಕ್ತದ ಹೀಮೋಗ್ಲೋಬಿನ್ ಅಂಶ ಸೂಕ್ಷ್ಮವಾಗಿ ಉಳಿದಿರುತ್ತದೆ. ಈ ಜಾಗದಲ್ಲಿ ಲುಮಿನಾಲ್ ರಾಸಾಯನಿಕವನ್ನು ಸಿಂಪಡಿಸಿದಾಗ, ಅದು ಹೀಮೋಗ್ಲೋಬಿನ್ನೊಂದಿಗೆ ರಾಸಾಯನಿಕ ಕ್ರಿಯೆ ನಡೆಸಿ ನೀಲಿ ಅಥವಾ ಹಸಿರು ಬಣ್ಣದ ಬೆಳಕನ್ನು (ದ್ರಾವಣ) ಉಂಟುಮಾಡುತ್ತದೆ. ಇದರಿಂದ ಅಳಿಸಿಹಾಕಿದ ರಕ್ತದ ಕಲೆಗಳನ್ನು ಸುಲಭವಾಗಿ ಪತ್ತೆಹಚ್ಚಬಹುದು. ಸದ್ಯ ಈ ಪರೀಕ್ಷೆಯ ಮೂಲಕ ಸಂಗ್ರಹಿಸಲಾದ ಮಾದರಿಗಳನ್ನು ಹೆಚ್ಚಿನ ಪರೀಕ್ಷೆಗಾಗಿ ಎಫ್ಎಸ್ಎಲ್ಗೆ ರವಾನಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI