- ನಟರಾಜು ಜಿ. ಎಲ್., ನಮ್ಮ ತುಮಕೂರು ಡಿಜಿಟಲ್ ಸುದ್ದಿ ಮಾಧ್ಯಮ
ಹಬ್ಬಗಳು ಬರುತ್ತವೆ, ಸಂಭ್ರಮ-ಸಡಗರವನ್ನು ಹೊತ್ತು ತರುತ್ತವೆ. ಜನ ಪರಸ್ಪರ ಶುಭ ಕೋರುತ್ತಾರೆ, ಮನೆ–ಮನ ಬೆಳಗುತ್ತದೆ. ಆದರೆ ಹಬ್ಬ ಮುಗಿದ ಮರುದಿನವೇ ನಮ್ಮ ನಗರದ ರಸ್ತೆಗಳು ಎದುರಿಸುವ ದುಸ್ಥಿತಿ ನೋಡಿದರೆ, ನಮ್ಮ ಆಚರಣೆಗಳಲ್ಲಿ ‘ನಾಗರಿಕ ಪ್ರಜ್ಞೆ’ ಎಂಬುದು ಎಲ್ಲಿಯಾದರೂ ಜೀವಂತವಾಗಿದೆಯೇ ಎಂಬ ನೋವಿನ ಪ್ರಶ್ನೆ ಕಾಡದೇ ಇರದು. ಇದಕ್ಕೆ ತಾಜಾ ಮತ್ತು ಕಣ್ಣಿಗೆ ರಾಚುವ ಉದಾಹರಣೆ ನಮ್ಮ ತುಮಕೂರಿನ ಶಿರಾಗೇಟ್ ಮುಖ್ಯರಸ್ತೆ.
ಆಯುಧ ಪೂಜೆ ಮತ್ತು ವಿಜಯದಶಮಿಯ ಸಡಗರ ಮುಗಿದು ದಿನಗಳೇ ಕಳೆದಿವೆ. ಆದರೆ ಶಿರಾಗೇಟ್ ರಸ್ತೆಯ ಬದಿಯಲ್ಲಿ ಮಾತ್ರ ನೂರಾರು ಬೂದುಗುಂಬಳಕಾಯಿಗಳು ಕೊಳೆತು, ಗಬ್ಬು ನಾರುತ್ತಾ ಬಿದ್ದಿವೆ. ಹಬ್ಬದ ದಿನಗಳಲ್ಲಿ ಭರ್ಜರಿ ವ್ಯಾಪಾರದ ನಿರೀಕ್ಷೆಯಲ್ಲಿ ನೂರಾರು ಕ್ವಿಂಟಾಲ್ ಕುಂಬಳಕಾಯಿಗಳನ್ನು ರಸ್ತೆ ಬದಿಗೆ ತಂದು ಸುರಿದಿದ್ದ ವ್ಯಾಪಾರಿಗಳು, ವ್ಯಾಪಾರ ಮುಗಿದ ಮೇಲೆ ಮಾರಾಟವಾಗದೆ ಉಳಿದ ಸರಕನ್ನು ಅಲ್ಲೇ ಅನಾಥವಾಗಿ ಬಿಟ್ಟು ಜಾಗ ಖಾಲಿ ಮಾಡಿದ್ದಾರೆ.
ದುರ್ನಾತ, ಅಪಘಾತದ ಆಪತ್ತು:
ಬಿಸಿಲಿನ ಬೇಗೆಗೆ ಈ ಕುಂಬಳಕಾಯಿಗಳು ಸಂಪೂರ್ಣವಾಗಿ ಕೊಳೆತು ನಾರುತ್ತಿವೆ. ಅವುಗಳಿಂದ ಹರಿಯುತ್ತಿರುವ ಕಪ್ಪು ಬಣ್ಣದ, ಜಿಡ್ಡಿನಿಂದ ಕೂಡಿದ ದ್ರವ ರಸ್ತೆಯುದ್ದಕ್ಕೂ ಹರಡಿಕೊಂಡಿದೆ. ಅತ್ತ ಕಡೆಯಿಂದ ಬೀಸುವ ಗಾಳಿಯಲ್ಲಿ ಹೊಲಸು ವಾಸನೆ ತುಂಬಿದ್ದು, ಪಾದಚಾರಿಗಳು ಹಾಗೂ ಸ್ಥಳೀಯ ನಿವಾಸಿಗಳು ಮೂಗು ಮುಚ್ಚಿಕೊಂಡು ಓಡಾಡುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದಕ್ಕಿಂತ ದೊಡ್ಡ ಅಪಾಯವೆಂದರೆ, ರಸ್ತೆಯಲ್ಲಿ ವೇಗವಾಗಿ ಚಲಿಸುವ ವಾಹನಗಳು ಈ ಕೊಳೆತ ತಿರುಳಿನ ಮೇಲೆ ಹರಿದು ರಸ್ತೆ ಜಾರುವಂತಾಗಿದೆ. ಪರಿಣಾಮವಾಗಿ, ದ್ವಿಚಕ್ರ ವಾಹನ ಸವಾರರು ಸ್ಕಿಡ್ ಆಗಿ ಬಿದ್ದು ಕೈ-ಕಾಲು ಮುರಿದುಕೊಳ್ಳುತ್ತಿದ್ದಾರೆ. ಸಣ್ಣ ಅಪಘಾತಗಳಂತೂ ನಿತ್ಯದ ಕಥೆಯಾಗಿವೆ. ರಾತ್ರಿ ವೇಳೆಯಲ್ಲಿ ಈ ರಸ್ತೆಯಲ್ಲಿ ಸಂಚರಿಸುವ ಸವಾರರಿಗೆ ಇದು ಅಕ್ಷರಶಃ ಮೃತ್ಯುಕೂಪವಾಗಿ ಮಾರ್ಪಟ್ಟಿದೆ.
ಸಾರ್ವಜನಿಕರ ಜಾಗವನ್ನು, ಪಾದಚಾರಿ ರಸ್ತೆಗಳನ್ನು ವ್ಯಾಪಾರಕ್ಕೆ ಬಳಸಿಕೊಳ್ಳುವ ವ್ಯಾಪಾರಿಗಳಿಗೆ ಸಮಾಜದ ಬಗ್ಗೆ ಕನಿಷ್ಠ ಕಾಳಜಿ ಇರಬೇಕಲ್ಲವೇ? ಹಬ್ಬದ ಸಮಯದಲ್ಲಿ ದುಡ್ಡು ಮಾಡಿಕೊಂಡು ಹೋದವರು, ಮಾರಾಟವಾಗದ ಕುಂಬಳಕಾಯಿಗಳನ್ನು ಸೂಕ್ತ ಕಸದ ತೊಟ್ಟಿಗೆ ಅಥವಾ ಗೊಬ್ಬರ ತಯಾರಿಕಾ ಘಟಕಕ್ಕೆ ಸಾಗಿಸುವ ಬದಲು, ರಸ್ತೆಯಲ್ಲೇ ಬಿಟ್ಟು ಹೋಗಿರುವುದು ಎಷ್ಟು ಸಮಂಜಸ? ತಾವು ಮಾಡಿದ ಕಸವನ್ನು ಬೇರೆಯವರು ಸ್ವಚ್ಛ ಮಾಡಬೇಕು ಎಂಬ ಈ ಮನಸ್ಥಿತಿಯೇ ಇಡೀ ನಗರದ ಅಂದಗೆಡಿಸುತ್ತಿದೆ.
ಜಿಲ್ಲಾಡಳಿತ-ಮಹಾನಗರ ಪಾಲಿಕೆ ನಿರ್ಲಕ್ಷ್ಯ!
ವ್ಯಾಪಾರಿಗಳ ಹೊಣೆಗೇಡಿತನ ಒಂದೆಡೆಯಾದರೆ, ನಗರದ ಸ್ವಚ್ಛತೆ ಮತ್ತು ಜನರ ಸುರಕ್ಷತೆಯ ಹೊಣೆ ಹೊತ್ತಿರುವ ಮಹಾನಗರ ಪಾಲಿಕೆ ಹಾಗೂ ಜಿಲ್ಲಾಡಳಿತದ ನಡೆ ಅದಕ್ಕಿಂತಲೂ ಆಘಾತಕಾರಿಯಾಗಿದೆ. ಸಾಮಾಜಿಕ ಜಾಲತಾಣಗಳಲ್ಲಿ ಶಿರಾಗೇಟ್ ರಸ್ತೆಯ ಈ ದುರವಸ್ಥೆಯ ವಿಡಿಯೋಗಳು, ಫೋಟೋಗಳು ವೈರಲ್ ಆಗುತ್ತಿದ್ದರೂ, ಅಧಿಕಾರಿಗಳು ಮಾತ್ರ ಕಣ್ಣಿದ್ದೂ ಕುರುಡರಂತೆ, ಕಿವಿಯಿದ್ದೂ ಕಿವುಡರಂತೆ ವರ್ತಿಸುತ್ತಿದ್ದಾರೆ.
ಹಬ್ಬ ಮುಗಿದ ತಕ್ಷಣವೇ ವಿಶೇಷ ಸ್ವಚ್ಛತಾ ಕಾರ್ಯ ಕೈಗೊಳ್ಳಬೇಕಾಗಿದ್ದ ಪೌರಕಾರ್ಮಿಕರ ಪಡೆಯನ್ನು ಇಲ್ಲಿ ಇನ್ನೂ ನಿಯೋಜಿಸಿಲ್ಲ. ಇಷ್ಟೆಲ್ಲಾ ಸಾರ್ವಜನಿಕ ಆಕ್ರೋಶ ವ್ಯಕ್ತವಾದ ಮೇಲೂ ಅಧಿಕಾರಿಗಳು ಸ್ಥಳ ಪರಿಶೀಲನೆ ನಡೆಸಿಲ್ಲ ಎಂದರೆ ಇವರ ಕರ್ತವ್ಯ ಪ್ರಜ್ಞೆ ಎಲ್ಲಿಗೆ ತಲುಪಿದೆ?
ತುಮಕೂರು ಮಹಾನಗರ ಪಾಲಿಕೆ ಇನ್ನಾದರೂ ಕುಂಭಕರ್ಣ ನಿದ್ದೆಯಿಂದ ಎದ್ದು, ತಕ್ಷಣವೇ ಶಿರಾಗೇಟ್ ರಸ್ತೆಯ ಕಸವನ್ನು ಯುದ್ಧೋಪಾದಿಯಲ್ಲಿ ತೆರವುಗೊಳಿಸಬೇಕು. ರೋಗಾಣುಗಳು ಹರಡದಂತೆ ಮತ್ತು ದುರ್ನಾತ ತಡೆಯಲು ಬ್ಲೀಚಿಂಗ್ ಪೌಡರ್ ಹಾಗೂ ಸೋಂಕುನಿವಾರಕಗಳನ್ನು ಸಿಂಪಡಿಸಬೇಕು. ಜೊತೆಗೆ ಮುಂದಿನ ದಿನಗಳಲ್ಲಿ ಹಬ್ಬದ ಹೆಸರಿನಲ್ಲಿ ರಸ್ತೆಗಳನ್ನು ಗಬ್ಬೆಬ್ಬಿಸಿ ಹೋಗುವ ವ್ಯಾಪಾರಿಗಳ ವಿರುದ್ಧ ದಂಡ ವಿಧಿಸುವ ಕಟ್ಟುನಿಟ್ಟಿನ ನಿಯಮ ಜಾರಿಗೆ ತರಬೇಕು.
ನಗರದ ಸ್ವಚ್ಛತೆ ಕೇವಲ ಅಧಿಕಾರಿಗಳ ಜವಾಬ್ದಾರಿಯಷ್ಟೇ ಅಲ್ಲ, ಪ್ರತಿಯೊಬ್ಬ ನಾಗರಿಕನ ಹಾಗೂ ವ್ಯಾಪಾರಿಯ ಕರ್ತವ್ಯವೂ ಹೌದು. ಸಾರ್ವಜನಿಕರ ಸುರಕ್ಷತೆ ಮತ್ತು ಆರೋಗ್ಯದ ಜೊತೆ ಚೆಲ್ಲಾಟವಾಡುವುದನ್ನು ಇನ್ನಾದರೂ ನಿಲ್ಲಿಸಬೇಕಿದೆ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI