ತುಮಕೂರು: ಕಳೆದ ನಾಲ್ಕು ತಿಂಗಳಿಂದ ವೇತನವಿಲ್ಲದೆ ಆಶಾ ಕಾರ್ಯಕರ್ತೆಯರ ಜೀವನ ನಡೆಸುವುದು ಕಷ್ಟಕರವಾಗಿದೆ. ಕೇಂದ್ರ ಹಾಗೂ ರಾಜ್ಯ ಸರ್ಕಾರದ ಎರಡು ವೇತನಗಳು ಬಾಕಿ ಇದ್ದು ಈ ಬಗ್ಗೆ ವಿಳಂಬ ನೀತಿ ತೋರಿಸಿರುವುದನ್ನು ಖಂಡಿಸಲಾಯಿತು. ಕೂಡಲೇ ಎಲ್ಲಾ ಬಾಕಿ ವೇತನವನ್ನು ಬಿಡುಗಡೆ ಮಾಡಬೇಕೆಂದು ಆಗ್ರಹಿಸಲಾಯಿತು. ದಿನನಿತ್ಯ ವಿವಿಧ ಅವಶ್ಯಕ ಆರೋಗ್ಯ ಸೇವೆ ತೆಗೆದುಕೊಳ್ಳುವ ಇಲಾಖೆ ಇತ್ತೀಚೆಗೆ ಮತ್ತೊಂದು ಆದೇಶವನ್ನು ಹೊರಡಿಸಿ 9 ಚಟುವಟಿಕೆಗಳ ಕೇಂದ್ರದ ಪ್ರೋತ್ಸಾಹ ಧನವನ್ನು ಸ್ಥಗಿತಗೊಳಿಸಿದೆ. ಇದರಿಂದಾಗಿ ಒಬ್ಬ ಆಶಾ ಕಾರ್ಯಕರ್ತೆಗೆ ಸರಿಸುಮಾರು 500 ರಿಂದ 1000ರೂಪಾವರೆಗೂ ನಷ್ಟವಾಗುತ್ತದೆ ಎಂದು ಆಶಾ ಸಂಘದ ಜಿಲ್ಲಾ ಸಂಚಾಲಕಿ ಮಂಜುಳ ಗೋನವಾರ ತಿಳಿಸಿದರು.
ಆಶಾ ಕಾರ್ಯಕರ್ತೆಯರ ಬಾಕಿ ವೇತನ ಬಿಡುಗಡೆಗೆ ಆಗ್ರಹಿಸಿ ಸೋಮವಾರ ಕರ್ನಾಟಕ ರಾಜ್ಯ ಸಂಯುಕ್ತ ಆಶಾ ಕಾರ್ಯಕರ್ತರ ಸಂಘಟನೆಯ ನೇತೃತ್ವದಲ್ಲಿ ಪ್ರತಿಭಟನೆ ನಡೆಸಲಾಯಿತು. ತುಮಕೂರಿನ ಟೌನ್ ಹಾಲ್ ವೃತ್ತದಿಂದ ಡಿಸಿ ಕಚೇರಿಯವರೆಗೆ ಮೆರವಣಿಗೆ ನಡೆಸಿ ಜಿಲ್ಲಾಧಿಕಾರಿಗಳ ಮೂಲಕ ರಾಷ್ಟ್ರೀಯ ಆರೋಗ್ಯ ಅಭಿಯಾನದ ಆಯುಕ್ತರಿಗೆ ಮನವಿ ಕಳುಹಿಸಲಾಯಿತು.
ಆಶಾ ಕಾರ್ಯಕರ್ತೆಯರಿಗೆ ಅವರು ಮಾಡಿದಷ್ಟು ಕೆಲಸಕ್ಕೆ ಹಣ ಬರುತ್ತಿಲ್ಲ. ಡಾಟಾ ಎಂಟ್ರಿ ಸಮಸ್ಯೆ ಒಂದು ಕಡೆಯಾದರೆ ಎಷ್ಟೋ ಕಡೆ ಎಂಟ್ರಿ ಮಾಡಿದರೂ ಹಣ ಬರುವುದಿಲ್ಲ. ಆದ್ದರಿಂದ ಮಾಡಿದ ಕೆಲಸಕ್ಕೆ ಮಾಡಿದ ಚಟುವಟಿಕೆಗಳಿಗೆ ಪೂರ್ಣ ಪ್ರೋತ್ಸಾಹ ಧನದ ಹಣ ಬರುವಂತೆ ಕ್ರಮ ವಹಿಸಬೇಕು. ಕೇಂದ್ರ ಹಾಗೂ ರಾಜ್ಯ ಸರ್ಕಾರ ಸೇರಿ ಗ್ಯಾರಂಟಿ ವಾಗ್ದಾನ ಹತ್ತು ಸಾವಿರ ನಿಗದಿ ಮಾಡಬೇಕು ಎಂದು ಹೇಳಿದರು.
ಪ್ರತಿಭಟನಾ ಸ್ಥಳಕ್ಕೆ ಆಗಮಿಸಿದ ಅಪರ ಜಿಲ್ಲಾಧಿಕಾರಿ ತಿಪ್ಪೇಸ್ವಾಮಿಯವರು ಪ್ರತಿಭಟನಾಕಾರರನ್ನು ಉದ್ದೇಶಿಸಿ ಮಾತನಾಡಿ, ಜಿಲ್ಲಾ ಹಂತದಲ್ಲಿ ಬಗೆಹರಿಸುವ ಸಮಸ್ಯೆಗಳಿಗೆ ಕ್ರಮ ವಹಿಸಲಾಗುವುದು ಎಂದು ಹೇಳಿದರು. ಇದೇ ಸಂದರ್ಭದಲ್ಲಿ ಸ್ಥಳದಲ್ಲಿ ಹಾಜರಿದ್ದ ಜಿಲ್ಲಾ ಆರೋಗ್ಯ ಅಧಿಕಾರಿಗಳಾದ ಚಂದ್ರಶೇಖರ್ ಅವರು ಮಾತನಾಡಿ, ಬಾಕಿ ವೇತನದ ಬಗ್ಗೆ ವಿಷಯ ತಿಳಿಸಿದರು ಒಂದೆರಡು ದಿನಗಳಲ್ಲಿ ನಿಶ್ಚಿತ ಗೌರವ ಧನ ಬಿಡುಗಡೆಯಾಗುವುದು ಕೇಂದ್ರದ ಕೆಲವು ಪ್ರೋತ್ಸಾಹ ಧನಗಳು ಇನ್ನು ಹದಿನೈದು ದಿನಗಳಾಗಬಹುದು ಬಿಡುಗಡೆಯಾಗಲು ಎಂದು ತಿಳಿಸಿದರು.
ಆಶಾ ಸಂಘದ ಜಿಲ್ಲಾ ಸಲಹೆಗಾರರಾದ ಎಂ.ವಿ.ಕಲ್ಯಾಣಿ, ಜಿಲ್ಲಾಧ್ಯಕ್ಷ ಎಂ. ಆರ್.ನಿರ್ಮಲ್ ಅವರು ಹೋರಾಟವನ್ನು ಉದ್ದೇಶಿಸಿ ಮಾತನಾಡಿದರು. ಈ ಪ್ರತಿಭಟನೆಯ ನೇತೃತ್ವವನ್ನು ತಾಲೂಕು, ಜಿಲ್ಲಾ ಮುಖಂಡರು ವಹಿಸಿದ್ದರು. ಜಿಲ್ಲಾ ಸಮಿತಿಯ ನಾಯಕಿಯರಾದ ಶಾರದಮ್ಮ, ಯಶೋದಮ್ಮ, ವಸಂತ ಕುಣಿಗಲ್, ವಸಂತ, ಸುನಂದ, ಮೀನಾಕ್ಷಿ, ಗೌರಮ್ಮ, ಮಹದೇವಮ್ಮ, ಆಶಾ, ಕಲಾ, ಯಶೋದಮ್ಮ, ಮುದ್ದಮ್ಮ, ಸಿದ್ದಗಂಗಮ್ಮ, ಕಮಲಮ್ಮ, ಲೀಲಾ, ಸೇರಿದಂತೆ ನೂರಾರು ಜನ ಕಾರ್ಯಕರ್ತೆಯರು ಭಾಗವಹಿಸಿದ್ದರು.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/ISmeQjik4LbG9KvWhKlbCC