ಕೊರಟಗೆರೆ: ಕೊರಟಗೆರೆ ಕ್ಷೇತ್ರದಲ್ಲಿ ಮತದಾರರ ಪಟ್ಟಿ ವಿಶೇಷ ಸಮಗ್ರ ಪರಿಷ್ಕರಣೆ ಕಾರ್ಯ ಭರದಿಂದ ಸಾಗುತ್ತಿದ್ದು, ಕ್ಷೇತ್ರದ ಒಟ್ಟು 2,09,495 ಮತದಾರರಿಗೆ ಗಣಕೀಯ ನಮೂನೆ ಪತ್ರಗಳನ್ನು ತಲುಪಿಸುವ ಮೂಲಕ ಶೇಕಡಾ 100 ರಷ್ಟು ಪ್ರಗತಿ ಸಾಧಿಸಲಾಗಿದೆ. ಈಗಾಗಲೇ 1,68,482 (ಶೇ.82.25) ಮತದಾರರ ಡಿಜಿಟಲ್ ಸೇರ್ಪಡೆ ಪೂರ್ಣಗೊಂಡಿದೆ ಎಂದು ಮತದಾನ ನೋಂದಣಾಧಿಕಾರಿ ಸೋಮಪ್ಪ ಕಡಕೋಳ ತಿಳಿಸಿದ್ದಾರೆ.
ಕೊರಟಗೆರೆ ಪಟ್ಟಣದ 3ನೇ ವಾರ್ಡಿನಲ್ಲಿ ನಡೆಯುತ್ತಿರುವ ಮನೆ ಮನೆ ಬಿಎಲ್ ಓ (BLO) ಭೇಟಿ ಕಾರ್ಯಕ್ರಮಕ್ಕೆ ಗುರುವಾರ ದಿಢೀರ್ ಭೇಟಿ ನೀಡಿ ಪರಿಶೀಲನೆ ನಡೆಸಿದ ನಂತರ ಅವರು ಮಾತನಾಡಿದರು.
8 ದಿನಗಳಲ್ಲಿ 100% ಡಿಜಿಟಲೀಕರಣದ ವಿಶ್ವಾಸ:
ಕ್ಷೇತ್ರದ ಗ್ರಾಮೀಣ ಹಾಗೂ ಪಟ್ಟಣ ಪ್ರದೇಶಗಳಲ್ಲಿ ಪರಿಷ್ಕರಣೆ ಕಾರ್ಯ ವೇಗವಾಗಿ ನಡೆಯುತ್ತಿದೆ. ಕೆಲಸ ನಿಧಾನವಾಗಿರುವ ಅಥವಾ ಗೊಂದಲವಿರುವ ಭಾಗಗಳಲ್ಲಿ ಹೆಚ್ಚುವರಿ ಬಿಎಲ್ಓ ಹಾಗೂ ಸಿಬ್ಬಂದಿಯನ್ನು ನೇಮಿಸಲಾಗಿದೆ. ಮುಂದಿನ 8 ದಿನಗಳ ಒಳಗಾಗಿ ಶೇ.100 ರಷ್ಟು ಡಿಜಿಟಲ್ ಸೇರ್ಪಡೆ ಕಾರ್ಯ ಪೂರ್ಣಗೊಳ್ಳಲಿದೆ ಎಂದು ನೋಂದಣಾಧಿಕಾರಿಗಳು ವಿಶ್ವಾಸ ವ್ಯಕ್ತಪಡಿಸಿದರು.
ಸ್ಥಳೀಯರ ಸಹಕಾರ ಅಗತ್ಯ: ತಹಶೀಲ್ದಾರ್ ಮಂಜುನಾಥ್.ಕೆ
ಕೊರಟಗೆರೆ ತಹಶೀಲ್ದಾರ್ ಮಂಜುನಾಥ್.ಕೆ ಮಾತನಾಡಿ, “ಮತದಾರರ ಪಟ್ಟಿ ಶುದ್ಧೀಕರಣ ಮತ್ತು ಪರಿಷ್ಕರಣೆಗೆ ಸ್ಥಳೀಯ ಜನಪ್ರತಿನಿಧಿಗಳು ಹಾಗೂ ಸಾರ್ವಜನಿಕರ ಸಹಕಾರ ಅತ್ಯಗತ್ಯ. ಮನೆ ಮನೆಗೆ ಬರುವ ಅಧಿಕಾರಿಗಳಿಗೆ ಮೃತರ, ಸ್ಥಳಾಂತರಗೊಂಡವರ ಹಾಗೂ ನಕಲಿ ಮತದಾರರ ಸರಿಯಾದ ಮಾಹಿತಿ ನೀಡಬೇಕು” ಎಂದು ಮನವಿ ಮಾಡಿದರು.
7,448 ಮತದಾರರ ಮಾಹಿತಿ ಪತ್ತೆ:
ಪ್ರಸ್ತುತ ನಡೆಸಿದ ಪರಿಶೀಲನೆಯಲ್ಲಿ ಕೊರಟಗೆರೆ ಪಟ್ಟಣ ಮತ್ತು ಗ್ರಾಮೀಣ ಭಾಗ ಸೇರಿ ಒಟ್ಟು 7,448 ಬದಲಾವಣೆಗಳ ಮಾಹಿತಿ ಲಭ್ಯವಾಗಿದೆ:
• ಸಾವು: 3,398
• ಶಾಶ್ವತ ಸ್ಥಳಾಂತರ: 3,180
• ನಕಲಿ ನಮೂದು: 40
• ಪತ್ತೆಯಾಗದವರು: 72
• ಹೊಸ ಸೇರ್ಪಡೆ: 758
ಈ ಮಾಹಿತಿಗೆ ಸಂಬಂಧಿಸಿದಂತೆ ಏನಾದರೂ ಆಕ್ಷೇಪಣೆಗಳಿದ್ದಲ್ಲಿ, ಮರು ಪರಿಶೀಲನೆಗೆ ಅವಕಾಶ ಕಲ್ಪಿಸಲಾಗಿದೆ ಎಂದು ತಹಶೀಲ್ದಾರ್ ಸ್ಪಷ್ಟಪಡಿಸಿದರು.
ಸಾರ್ವಜನಿಕರ ನೆರವಿಗೆ ಸಹಾಯವಾಣಿ ಕೇಂದ್ರ:
“ಮತದಾರರ ಪಟ್ಟಿ ಪರಿಷ್ಕರಣೆ ಮತ್ತು ದೂರುಗಳಿಗಾಗಿ ಕೊರಟಗೆರೆಯಲ್ಲಿ ಸಹಾಯವಾಣಿ ತೆರೆಯಲಾಗಿದೆ. ಪ್ರತಿದಿನ ಬೆಳಿಗ್ಗೆ 10 ರಿಂದ ಸಂಜೆ 6 ರವರೆಗೆ ಕರೆ ಮಾಡಿ ಮಾಹಿತಿ ಪಡೆಯಬಹುದು.”
— ಮಂಜುನಾಥ್.ಕೆ, ತಹಶೀಲ್ದಾರ್, ಕೊರಟಗೆರೆ
• ಗ್ರಾಮೀಣ ಭಾಗದ ಸಹಾಯವಾಣಿ: 08138-232153
• ಪಟ್ಟಣ ಭಾಗದ ಸಹಾಯವಾಣಿ: 08138-295546
ಈ ಪರಿಶೀಲನೆ ವೇಳೆಯಲ್ಲಿ ಪಟ್ಟಣ ಪಂಚಾಯಿತಿ ಸಿಇಓ ಉಮೇಶ್, ಚುನಾವಣಾ ಶಿರಸ್ತೇದಾರ್ ಮಂಜುನಾಥ್, ಬಸವರಾಜು, ನಕುಲ್, ಅರುಣ್, ಕಾಂಗ್ರೆಸ್ ಮುಖಂಡ ಅರವಿಂದ್, ಜೆಡಿಎಸ್ನ ಲಕ್ಷ್ಮಣ್, ಚಿಕ್ಕರಂಗಯ್ಯ, ರಂಗಣ್ಣ, ಬಿಜೆಪಿಯ ಮಾರುತಿ ಹಾಗೂ ಜನಪ್ರತಿನಿಧಿಗಳಾದ ಕಲೀಂವುಲ್ಲಾ, ಸೈಯದ್ ಸೈಪುಲ್ಲಾ ಸೇರಿದಂತೆ ಇತರರು ಉಪಸ್ಥಿತರಿದ್ದರು.
ವರದಿ: ಮಂಜುಸ್ವಾಮಿ ಎಂ.ಎನ್.
