ಕಾರು ಬಾಡಿಗೆ ಉದ್ಯಮ ಆರಂಭಿಸಲು ಬಯಸುವ ಸಣ್ಣ ಉದ್ಯಮಿಗಳು ಹಾಗೂ ಸ್ಟಾರ್ಟ್‌ಅಪ್‌ ಗಳಿಗೆ ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ (MoRTH) ಮಹತ್ವದ ಸಿಹಿಸುದ್ದಿ ನೀಡಿದೆ. ಸ್ವಯಂ ಚಾಲಿತ (Self–drive) ಮತ್ತು ಚಾಲಕ ಸಹಿತ ಕಾರು ಬಾಡಿಗೆ ಸೇವೆ ಆರಂಭಿಸಲು ಅಗತ್ಯವಿರುವ ಕನಿಷ್ಠ ವಾಹನಗಳ ಸಂಖ್ಯೆಯನ್ನು 50ರಿಂದ 5ಕ್ಕೆ ಇಳಿಸುವ ಪ್ರಸ್ತಾವನೆಯನ್ನು ಸಚಿವಾಲಯ ಮುಂದಿಟ್ಟಿದೆ.
ಸಚಿವಾಲಯ ಬಿಡುಗಡೆ ಮಾಡಿರುವ ‘ದಿ ರೆಂಟ್-ಎ-ಕ್ಯಾಬ್ ಸ್ಕೀಮ್ 2026’ ಕರಡು ನಿಯಮಗಳ ಪ್ರಕಾರ, ಈ ಉದ್ಯಮ ಆರಂಭಿಸಲು ಅರ್ಜಿದಾರರು ಒಟ್ಟಾರೆಯಾಗಿ ಕನಿಷ್ಠ ಐದು ಮೋಟಾರ್ ಕ್ಯಾಬ್‌ಗಳನ್ನು ಹೊಂದಿರಬೇಕು. ಅಲ್ಲದೆ, ಪ್ರತಿಯೊಂದು ಕಾರ್ಯಾಚರಣೆಯ ಸ್ಥಳದಲ್ಲಿ ಕನಿಷ್ಠ ಎರಡು ಮೋಟಾರ್ ಕ್ಯಾಬ್ ಗಳನ್ನು ಹೊಂದಿರುವುದು ಕಡ್ಡಾಯವಾಗಿದೆ.
ಪ್ರಸ್ತುತ ಇರುವ 50 ವಾಹನಗಳ ಕನಿಷ್ಠ ಮಿತಿಯನ್ನು ಐದಕ್ಕೆ ಇಳಿಸುವ ಪ್ರಸ್ತಾವನೆ ಜಾರಿಗೆ ಬಂದರೆ, ಕಡಿಮೆ ಬಂಡವಾಳ ಹೊಂದಿರುವ ಉದ್ಯಮಿಗಳಿಗೂ ಕಾರು ಬಾಡಿಗೆ ಕ್ಷೇತ್ರದಲ್ಲಿ ಅವಕಾಶ ದೊರೆಯಲಿದೆ. ಸಣ್ಣ ಉದ್ಯಮಿಗಳು ಮತ್ತು ಸ್ಟಾರ್ಟ್‌ಅಪ್‌ಗಳು ಈ ಉದ್ಯಮಕ್ಕೆ ಪ್ರವೇಶಿಸಲು ಇದು ಅನುಕೂಲ ಮಾಡಿಕೊಡಲಿದೆ ಎಂದು ನಿರೀಕ್ಷಿಸಲಾಗಿದೆ.
ಕಾರು ಬಾಡಿಗೆ ಉದ್ಯಮ ಆರಂಭಿಸಲು ದೊಡ್ಡ ಪ್ರಮಾಣದ ವಾಹನಗಳನ್ನು ಹೊಂದಿರಬೇಕೆಂಬ ಅಡ್ಡಿಯನ್ನು ಸಡಿಲಿಸುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರದ ಈ ಪ್ರಸ್ತಾವನೆ ಮಹತ್ವದ ಹೆಜ್ಜೆಯಾಗಿದೆ. ಆದರೆ, ಇದು ಸದ್ಯ ಕರಡು ನಿಯಮಗಳಲ್ಲಿನ ಪ್ರಸ್ತಾವನೆಯಾಗಿದ್ದು, ಅಂತಿಮ ಅಧಿಸೂಚನೆ ಹಾಗೂ ಜಾರಿಗೆ ಸಂಬಂಧಿಸಿದ ವಿವರಗಳನ್ನು ಗಮನಿಸಬೇಕಿದೆ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI