ಅಡುಗೆಮನೆಯಲ್ಲಿ ಬಳಸುವ ಪಾತ್ರೆಗಳ ಆಯ್ಕೆ ಕೇವಲ ಅನುಕೂಲ ಅಥವಾ ಅಂದದ ವಿಚಾರವಲ್ಲ. ನಾವು ತಯಾರಿಸುವ ಆಹಾರದ ಗುಣಮಟ್ಟ, ಅಡುಗೆ ಮಾಡುವ ಸುಲಭತೆ, ಪಾತ್ರೆಗಳ ಬಾಳಿಕೆ ಹಾಗೂ ನಿರ್ವಹಣೆಯ ಮೇಲೂ ಇದು ಪರಿಣಾಮ ಬೀರುತ್ತದೆ. ಭಾರತೀಯ ಅಡುಗೆ ಪದ್ಧತಿಯಲ್ಲಿ ಸಾರು, ಸಾಂಬಾರ್, ಪಲ್ಯ, ದೋಸೆ, ರೊಟ್ಟಿ, ಚಪಾತಿ ಮತ್ತು ಕರಿದ ತಿಂಡಿಗಳನ್ನು ತಯಾರಿಸಲು ಬೇರೆಬೇರೆ ರೀತಿಯ ಪಾತ್ರೆಗಳು ಅಗತ್ಯವಾಗುತ್ತವೆ.
ಮಾರುಕಟ್ಟೆಯಲ್ಲಿ ಹಲವು ಬಗೆಯ ಕುಕ್‌ವೇರ್‌ಗಳು ಲಭ್ಯವಿದ್ದರೂ, ನಾನ್‌ಸ್ಟಿಕ್, ಸ್ಟೇನ್‌ ಲೆಸ್ ಸ್ಟೀಲ್ ಮತ್ತು ಕ್ಯಾಸ್ಟ್ ಐರನ್ ಪಾತ್ರೆಗಳು ಹೆಚ್ಚು ಬಳಕೆಯಲ್ಲಿವೆ. ಈ ಮೂರರ ವೈಶಿಷ್ಟ್ಯಗಳು ಮತ್ತು ಬಳಸುವಾಗ ಪಾಲಿಸಬೇಕಾದ ಮುನ್ನೆಚ್ಚರಿಕೆಗಳು ಇಲ್ಲಿವೆ.
ನಾನ್‌ ಸ್ಟಿಕ್ ಪಾತ್ರೆಗಳು (Nonstick)
ಕಡಿಮೆ ಎಣ್ಣೆಯಲ್ಲಿ ಅಡುಗೆ ಮಾಡಲು ಬಯಸುವವರಿಗೆ ನಾನ್‌ಸ್ಟಿಕ್ ಪಾತ್ರೆಗಳು ಅನುಕೂಲಕರ. ದೋಸೆ, ಆಮ್ಲೆಟ್, ಚೀಲಾ, ಪ್ಯಾನ್‌ಕೇಕ್‌ನಂತಹ ಆಹಾರ ಪದಾರ್ಥಗಳನ್ನು ಸುಲಭವಾಗಿ ತಯಾರಿಸಬಹುದು. ಆಹಾರ ಪಾತ್ರೆಗೆ ಅಂಟಿಕೊಳ್ಳುವ ಸಾಧ್ಯತೆ ಕಡಿಮೆ ಇರುವುದರಿಂದ ಸ್ವಚ್ಛಗೊಳಿಸುವುದೂ ಸುಲಭ.ಆದರೆ ಈ ಪಾತ್ರೆಗಳನ್ನು ಅತಿಯಾದ ಉರಿಯಲ್ಲಿ ಬಳಸಬಾರದು. ಖಾಲಿ ಪಾತ್ರೆಯನ್ನು ಹೆಚ್ಚು ಹೊತ್ತು ಬಿಸಿ ಮಾಡುವುದರಿಂದ ಕೋಟಿಂಗ್ ಹಾನಿಯಾಗಬಹುದು. ವಿಶೇಷವಾಗಿ ಟೆಫ್ಲಾನ್‌ನಂತಹ ಕೋಟಿಂಗ್ ಇರುವ ಪಾತ್ರೆಗಳನ್ನು ಅತಿಯಾಗಿ ಬಿಸಿ ಮಾಡಿದಾಗ ಹಾನಿಕಾರಕ ಹೊಗೆ ಹೊರಬರುವ ಅಪಾಯವಿದೆ. ಸ್ಟೀಲ್ ಸೌಟು ಅಥವಾ ಗಟ್ಟಿಯಾದ ಸ್ಕ್ರಬ್ಬರ್ ಬಳಸುವುದರಿಂದ ಮೇಲ್ಮೈಗೆ ಗೀರು ಬೀಳಬಹುದು. ಕೋಟಿಂಗ್ ಕಿತ್ತುಹೋಗಿದ್ದರೆ ಅಥವಾ ಹೆಚ್ಚು ಹಾನಿಯಾಗಿದ್ದರೆ ಪಾತ್ರೆಯನ್ನು ಬದಲಾಯಿಸುವುದು ಉತ್ತಮ.
ಸ್ಟೇನ್‌ ಲೆಸ್ ಸ್ಟೀಲ್ ಪಾತ್ರೆಗಳು (Stainless Steel)
ಭಾರತೀಯ ಅಡುಗೆಮನೆಗಳಲ್ಲಿ ಸ್ಟೇನ್‌ ಲೆಸ್ ಸ್ಟೀಲ್ ಪಾತ್ರೆಗಳು ಬಹುಪಯೋಗಿ ಆಯ್ಕೆಯಾಗಿವೆ. ಸಾರು, ಸಾಂಬಾರ್, ಅನ್ನ, ಪಲ್ಯ ಹಾಗೂ ವಿವಿಧ ಬಗೆಯ ಅಡುಗೆಗಳಿಗೆ ಇವು ಸೂಕ್ತ. ಸಾಮಾನ್ಯವಾಗಿ ಇವುಗಳಿಗೆ ನಾನ್‌ ಸ್ಟಿಕ್ ನಂತಹ ರಾಸಾಯನಿಕ ಮೇಲ್ಮೈ ಕೋಟಿಂಗ್ ಇರುವುದಿಲ್ಲ. ಸರಿಯಾದ ನಿರ್ವಹಣೆ ಮಾಡಿದರೆ ದೀರ್ಘಕಾಲ ಬಾಳಿಕೆ ಬರುತ್ತವೆ.
ಸ್ಟೀಲ್ ಪಾತ್ರೆಯಲ್ಲಿ ಆಹಾರ ಅಂಟಿಕೊಳ್ಳದಂತೆ ಮಾಡಲು ಅಡುಗೆ ಮಾಡುವ ಮೊದಲು ಪಾತ್ರೆಯನ್ನು ಸೂಕ್ತವಾಗಿ ಕಾಯಿಸಿ, ನಂತರ ಎಣ್ಣೆ ಹಾಕಬೇಕು. ಶಾಖ ಸಮಾನವಾಗಿ ಹರಡಲು ಅನುಕೂಲವಾಗುವಂತೆ ತಳದಲ್ಲಿ ಹಲವು ಪದರಗಳನ್ನು ಹೊಂದಿರುವ ಟ್ರೈ-ಪ್ಲೈ ಅಥವಾ ಮಲ್ಟಿ–ಪ್ಲೈ ಪಾತ್ರೆಗಳನ್ನು ಆಯ್ಕೆ ಮಾಡಬಹುದು.
ಕ್ಯಾಸ್ಟ್ ಐರನ್ ಅಥವಾ ಎರಕಹೊಯ್ದ ಕಬ್ಬಿಣದ ಪಾತ್ರೆಗಳು (Cast Iron)
ಕ್ಯಾಸ್ಟ್ ಐರನ್ ಪಾತ್ರೆಗಳು ಶಾಖವನ್ನು ದೀರ್ಘಕಾಲ ಉಳಿಸಿಕೊಳ್ಳುವ ಗುಣ ಹೊಂದಿವೆ. ದೋಸೆ, ರೊಟ್ಟಿ, ಚಪಾತಿ ಮತ್ತು ಕರಿದ ತಿಂಡಿಗಳನ್ನು ತಯಾರಿಸಲು ಇವು ಉತ್ತಮ ಆಯ್ಕೆ. ಸರಿಯಾಗಿ ಎಣ್ಣೆ ಸವರಿ ಹದಗೊಳಿಸುವ ಪ್ರಕ್ರಿಯೆ (Seasoning) ಮಾಡಿದರೆ ಆಹಾರ ಅಂಟಿಕೊಳ್ಳುವುದನ್ನು ಕಡಿಮೆ ಮಾಡಬಹುದು.ಆದರೆ ಈ ಪಾತ್ರೆಗಳು ತೂಕದಲ್ಲಿ ಸ್ವಲ್ಪ ಭಾರವಾಗಿರುತ್ತವೆ. ತೊಳೆದ ನಂತರ ತೇವಾಂಶ ಉಳಿಯದಂತೆ ಒರೆಸಬೇಕು. ತುಕ್ಕು ಹಿಡಿಯುವುದನ್ನು ತಡೆಯಲು ತೆಳುವಾಗಿ ಅಡುಗೆ ಎಣ್ಣೆ ಸವರಿ ಇಡುವುದು ಉತ್ತಮ. ಹದಗೊಳಿಸಿದ ಪಾತ್ರೆಯಲ್ಲಿ ಹುಳಿ ಪದಾರ್ಥಗಳನ್ನು ದೀರ್ಘಕಾಲ ಬೇಯಿಸುವುದನ್ನು ತಪ್ಪಿಸಬೇಕು. ಇದರಿಂದ ಪಾತ್ರೆಯ ಹದ ಹಾಳಾಗುವ ಅಥವಾ ಆಹಾರಕ್ಕೆ ಲೋಹದ ರುಚಿ ಬರುವ ಸಾಧ್ಯತೆ ಇರುತ್ತದೆ.
ಯಾವ ಅಡುಗೆಗೆ ಯಾವ ಪಾತ್ರೆ ಸೂಕ್ತ?
ದಿನನಿತ್ಯದ ಸಾರು, ಸಾಂಬಾರ್, ಅನ್ನ ಮತ್ತು ಪಲ್ಯಗಳಿಗೆ ಸ್ಟೇನ್‌ಲೆಸ್ ಸ್ಟೀಲ್ ಪಾತ್ರೆಗಳನ್ನು ಬಳಸಬಹುದು. ಕಡಿಮೆ ಎಣ್ಣೆಯಲ್ಲಿ ದೋಸೆ, ಆಮ್ಲೆಟ್ ಮತ್ತು ಚೀಲಾ ತಯಾರಿಸಲು ನಾನ್‌ಸ್ಟಿಕ್ ಪ್ಯಾನ್ ಅನುಕೂಲಕರ. ದೋಸೆ, ರೊಟ್ಟಿ, ಚಪಾತಿ ಹಾಗೂ ಕರಿದ ತಿಂಡಿಗಳಿಗೆ ಕ್ಯಾಸ್ಟ್ ಐರನ್ ಪಾತ್ರೆ ಉತ್ತಮ ಆಯ್ಕೆಯಾಗಬಹುದು.ಆದ್ದರಿಂದ ಒಂದೇ ಬಗೆಯ ಪಾತ್ರೆಗಳ ಸೆಟ್ ಖರೀದಿಸುವ ಬದಲು, ಅಡುಗೆ ಮಾಡುವ ಅಗತ್ಯಕ್ಕೆ ಅನುಗುಣವಾಗಿ ಈ ಮೂರೂ ಬಗೆಯ ಪಾತ್ರೆಗಳನ್ನು ಹೊಂದಿರುವುದು ಜಾಣತನ. ಶೆಫ್ ಮುಸ್ಕಾನ್ ಅಜ್ಮಾನಿ ಅವರ ಸಲಹೆಯಂತೆ, ಅಡುಗೆಯ ವಿಧಕ್ಕೆ ತಕ್ಕ ಪಾತ್ರೆ ಬಳಸುವುದರಿಂದ ಅಡುಗೆ ಸುಲಭವಾಗುವುದರ ಜೊತೆಗೆ ಪಾತ್ರೆಗಳ ಬಾಳಿಕೆಯನ್ನೂ ಹೆಚ್ಚಿಸಬಹುದು.
ನಾನ್‌ ಸ್ಟಿಕ್ ಪಾತ್ರೆಗಳ ನಿರ್ವಹಣೆಗೆ ಕೆಲವು ಸಲಹೆಗಳು
ನಾನ್‌ಸ್ಟಿಕ್ ಪಾತ್ರೆಯನ್ನು ಖಾಲಿಯಾಗಿ ಒಲೆಯ ಮೇಲಿಟ್ಟು ಹೆಚ್ಚು ಹೊತ್ತು ಬಿಸಿ ಮಾಡಬಾರದು. ಅಡುಗೆ ಮಾಡುವಾಗ ಮರದ ಅಥವಾ ಸಿಲಿಕಾನ್ ಸೌಟುಗಳನ್ನು ಬಳಸುವುದು ಉತ್ತಮ. ಸ್ಟೀಲ್ ಚಮಚ ಮತ್ತು ಗಟ್ಟಿಯಾದ ಸ್ಕ್ರಬ್ಬರ್‌ಗಳಿಂದ ಕೋಟಿಂಗ್‌ಗೆ ಹಾನಿಯಾಗಬಹುದು.
ಬಿಸಿಯಾಗಿರುವ ಪಾತ್ರೆಯನ್ನು ತಕ್ಷಣವೇ ತಣ್ಣೀರಿನಲ್ಲಿ ಹಾಕಬಾರದು. ಹಠಾತ್ ಉಷ್ಣಾಂಶ ಬದಲಾವಣೆಯಿಂದ ಪಾತ್ರೆಯ ಆಕಾರ ಬದಲಾಗಬಹುದು ಅಥವಾ ಕೋಟಿಂಗ್ ಹಾನಿಗೊಳಗಾಗಬಹುದು. ಪಾತ್ರೆ ಸ್ವಲ್ಪ ತಣ್ಣಗಾದ ಬಳಿಕ ತೊಳೆಯುವುದು ಉತ್ತಮ.
ಸ್ಟೇನ್‌ ಲೆಸ್ ಸ್ಟೀಲ್ ಪಾತ್ರೆಗಳ ಬಳಕೆಗೆ ಟಿಪ್ಸ್
ಸ್ಟೀಲ್ ಪಾತ್ರೆಯಲ್ಲಿ ಆಹಾರ ಅಂಟಿಕೊಳ್ಳುವುದನ್ನು ಕಡಿಮೆ ಮಾಡಲು ‘ವಾಟರ್ ಡ್ರಾಪ್ ಟೆಸ್ಟ್’ ವಿಧಾನ ಅನುಸರಿಸಬಹುದು. ಪಾತ್ರೆಯನ್ನು ಮಧ್ಯಮ ಉರಿಯಲ್ಲಿ ಕಾಯಿಸಿ ಕೆಲವು ಹನಿ ನೀರನ್ನು ಚಿಮುಕಿಸಬೇಕು. ನೀರಿನ ಹನಿಗಳು ಸಣ್ಣ ಮುತ್ತುಗಳಂತೆ ಪಾತ್ರೆಯ ಮೇಲೆ ಚಲಿಸಿದರೆ ಅದು ಸರಿಯಾಗಿ ಬಿಸಿಯಾಗಿದೆ ಎಂದರ್ಥ. ಬಳಿಕ ಎಣ್ಣೆ ಹಾಕಿ ಅಡುಗೆ ಮಾಡಬಹುದು. ಈ ವಿಧಾನವನ್ನು ಬಳಸುವಾಗ ಪಾತ್ರೆಯನ್ನು ಅತಿಯಾಗಿ ಬಿಸಿ ಮಾಡದಂತೆ ಎಚ್ಚರಿಕೆ ವಹಿಸಬೇಕು.
ನೀರು ಕಾಯಿಸುವಾಗ ಉಪ್ಪನ್ನು ಮೊದಲೇ ಹಾಕಿ ಪಾತ್ರೆಯ ತಳದಲ್ಲಿ ದೀರ್ಘಕಾಲ ಉಳಿಯಲು ಬಿಡಬಾರದು. ಉಪ್ಪು ಸಂಪೂರ್ಣ ಕರಗದೆ ಉಳಿದರೆ ಸ್ಟೀಲ್ ಪಾತ್ರೆಯ ಮೇಲ್ಮೈಯಲ್ಲಿ ಸಣ್ಣ ಗುಂಡಿಗಳು ಅಥವಾ ಕಲೆಗಳು ಉಂಟಾಗಬಹುದು. ಆದ್ದರಿಂದ ನೀರು ಕುದಿಯಲು ಆರಂಭಿಸಿದ ಬಳಿಕ ಉಪ್ಪು ಸೇರಿಸುವುದು ಉತ್ತಮ.
ಪಾತ್ರೆಯ ತಳದಲ್ಲಿ ಕಪ್ಪು ಕಲೆಗಳು ಅಥವಾ ಆಹಾರದ ಅವಶೇಷಗಳು ಅಂಟಿಕೊಂಡಿದ್ದರೆ ಅಡುಗೆ ಸೋಡಾ ಮತ್ತು ನೀರನ್ನು ಬಳಸಿ ಸ್ವಚ್ಛಗೊಳಿಸಬಹುದು. ಅಗತ್ಯವಿದ್ದರೆ ವಿನೆಗರ್ ಬಳಸಬಹುದು. ನಂತರ ಚೆನ್ನಾಗಿ ತೊಳೆದು ಒರೆಸಬೇಕು.
ಕ್ಯಾಸ್ಟ್ ಐರನ್ ಪಾತ್ರೆಗಳ ಆರೈಕೆ ಹೇಗೆ?
ಕಬ್ಬಿಣದ ಪಾತ್ರೆಗಳಲ್ಲಿ ಟೊಮ್ಯಾಟೊ, ಹುಣಸೆಹಣ್ಣು, ನಿಂಬೆಹಣ್ಣಿನಂತಹ ಹುಳಿ ಅಂಶವಿರುವ ಪದಾರ್ಥಗಳನ್ನು ದೀರ್ಘಕಾಲ ಬೇಯಿಸುವುದನ್ನು ತಪ್ಪಿಸುವುದು ಉತ್ತಮ. ವಿಶೇಷವಾಗಿ ಹೊಸದಾಗಿ ಹದಗೊಳಿಸಿದ ಪಾತ್ರೆಗಳಲ್ಲಿ ಇಂತಹ ಅಡುಗೆ ಮಾಡಿದರೆ ಮೇಲ್ಮೈಯ ಹದಕ್ಕೆ ಹಾನಿಯಾಗಬಹುದು.ಪಾತ್ರೆಯನ್ನು ತೊಳೆದ ಬಳಿಕ ಒಲೆಯ ಮೇಲಿಟ್ಟು ಸ್ವಲ್ಪ ಬಿಸಿ ಮಾಡಿ ತೇವಾಂಶವನ್ನು ಸಂಪೂರ್ಣವಾಗಿ ತೆಗೆಯಬೇಕು. ನಂತರ ತೆಳುವಾಗಿ ಅಡುಗೆ ಎಣ್ಣೆ ಸವರಿ ಇಟ್ಟರೆ ತುಕ್ಕು ಹಿಡಿಯುವುದನ್ನು ತಡೆಯಬಹುದು. ಸ್ವಚ್ಛಗೊಳಿಸಲು ಬಿಸಿ ನೀರು ಮತ್ತು ಮೃದುವಾದ ಬ್ರಷ್ ಬಳಸಬಹುದು. ಅಗತ್ಯವಿದ್ದರೆ ಸ್ವಲ್ಪ ಸೌಮ್ಯವಾದ ಸೋಪ್ ಬಳಸುವುದೂ ತಪ್ಪಲ್ಲ.
ಗೋಲ್ಡನ್ ರೂಲ್:
ದೋಸೆ, ರೊಟ್ಟಿ ಮತ್ತು ಚಪಾತಿಗೆ ಕ್ಯಾಸ್ಟ್ ಐರನ್; ನಿತ್ಯದ ಸಾರು, ಸಾಂಬಾರ್, ಅನ್ನ ಮತ್ತು ಪಲ್ಯಗಳಿಗೆ ಸ್ಟೇನ್‌ಲೆಸ್ ಸ್ಟೀಲ್; ಕಡಿಮೆ ಎಣ್ಣೆಯಲ್ಲಿ ತಯಾರಿಸುವ ಆಮ್ಲೆಟ್ ಮತ್ತು ಚೀಲಾದಂತಹ ತಿಂಡಿಗಳಿಗೆ ನಾನ್‌ಸ್ಟಿಕ್ ಪಾತ್ರೆ ಬಳಸಬಹುದು. ಸರಿಯಾದ ಪಾತ್ರೆಯ ಆಯ್ಕೆ ಮತ್ತು ಸೂಕ್ತ ನಿರ್ವಹಣೆ ಅಡುಗೆಯನ್ನು ಸುಲಭಗೊಳಿಸುವುದರ ಜೊತೆಗೆ ಪಾತ್ರೆಗಳ ಬಾಳಿಕೆಯನ್ನೂ ಹೆಚ್ಚಿಸುತ್ತದೆ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI