ಕೊರಟಗೆರೆ (ತುಮಕೂರು): ಅಧಿಕಾರಿಗಳು ಕರ್ತವ್ಯ ನಿಮಿತ್ತ ಬರುತ್ತಾರೆ, ಕಾರ್ಯ ನಿರ್ವಹಿಸಿ ವರ್ಗಾವಣೆಯಾಗಿ ತೆರಳುತ್ತಾರೆ. ಆದರೆ ತಮ್ಮ ಸರಳ ನಡೆ, ಆತ್ಮೀಯತೆ ಹಾಗೂ ಪ್ರಾಮಾಣಿಕ ಸೇವೆಯಿಂದ ಜನರ ಮನಸ್ಸಿನಲ್ಲಿ ಶಾಶ್ವತ ಸ್ಥಾನ ಗಿಟ್ಟಿಸಿಕೊಳ್ಳುವ ಅಧಿಕಾರಿಗಳು ಬಹಳ ವಿರಳ. ಅಂತಹ ಅಪರೂಪದ ಮಾನವೀಯ ಬಾಂಧವ್ಯಕ್ಕೆ ಕೊರಟಗೆರೆ ತಾಲೂಕು ಸಾಕ್ಷಿಯಾಗಿದೆ.
ಹಿಂದೆ ಕೊರಟಗೆರೆಯಲ್ಲಿ ತಹಶೀಲ್ದಾರರಾಗಿ ಸೇವೆ ಸಲ್ಲಿಸಿ, ಪ್ರಸ್ತುತ ತುಮಕೂರು ಉಪವಿಭಾಗಾಧಿಕಾರಿಯಾಗಿ (AC) ಕಾರ್ಯನಿರ್ವಹಿಸುತ್ತಿರುವ ನಾಹೀದ್ ಜಮ್ ಜಮ್ ಅವರಿಗೆ ಕೊರಟಗೆರೆಯ ಸಾರ್ವಜನಿಕರೇ ಮುಂದೆ ನಿಂತು ಅದ್ದೂರಿ ಸೀಮಂತ ಕಾರ್ಯಕ್ರಮ ಆಯೋಜಿಸುವ ಮೂಲಕ ತಮ್ಮ ಅಪಾರ ಅಭಿಮಾನವನ್ನು ಮೆರೆದಿದ್ದಾರೆ.
ಪಟ್ಟಣದ ಕನ್ನಿಕಾ ಕಲ್ಯಾಣ ಮಂಟಪದಲ್ಲಿ ಆಯೋಜಿಸಲಾಗಿದ್ದ ಈ ಸಮಾರಂಭದಲ್ಲಿ ತಾಲೂಕಿನ ವಿವಿಧ ಭಾಗಗಳಿಂದ ಸಾರ್ವಜನಿಕರು, ಗಣ್ಯರು ಹಾಗೂ ನಾಹೀದ್ ಜಮ್ ಜಮ್ ಅವರ ಕುಟುಂಬಸ್ಥರು ಭಾಗವಹಿಸಿದ್ದರು. ಪ್ರಸ್ತುತ ಒಂಬತ್ತು ತಿಂಗಳ ಗರ್ಭಿಣಿಯಾಗಿರುವ ಅಧಿಕಾರಿಯನ್ನು “ನಮ್ಮ ಊರಿನ ಮನೆ ಮಗಳು” ಎಂದೇ ಭಾವಿಸಿರುವ ಕೊರಟಗೆರೆ ಜನತೆ, ಸಾಂಪ್ರದಾಯಿಕ ವಿಧಿ-ವಿಧಾನಗಳಂತೆ ಹೂವು, ಹಣ್ಣು, ಸೀರೆ ಹಾಗೂ ಬಾಗಿನ ನೀಡಿ ತಾಯಿ ಮತ್ತು ಹುಟ್ಟಲಿರುವ ಮಗುವಿನ ಉತ್ತಮ ಆರೋಗ್ಯಕ್ಕಾಗಿ ಹಾರೈಸಿದರು.
“ಕೊರಟಗೆರೆಯಲ್ಲಿ ತಹಶೀಲ್ದಾರರಾಗಿ ಕೆಲಸ ಮಾಡಿದ ದಿನಗಳನ್ನು ಜೀವನದಲ್ಲಿ ಎಂದಿಗೂ ಮರೆಯಲು ಸಾಧ್ಯವಿಲ್ಲ. ಅಂದು ಗೃಹ ಸಚಿವರಾದ ಡಾ.ಜಿ.ಪರಮೇಶ್ವರ್ ಅವರು ನನ್ನನ್ನು ಕೊರಟಗೆರೆಗೆ ನೇಮಕ ಮಾಡದಿದ್ದರೆ, ಇಲ್ಲಿನ ಜನರ ಜೊತೆ ಈ ರೀತಿಯ ಆತ್ಮೀಯ ಬಾಂಧವ್ಯ ಬೆಳೆಸಿಕೊಳ್ಳಲು ಸಾಧ್ಯವಾಗುತ್ತಿರಲಿಲ್ಲ. ಜನತೆ ನೀಡಿರುವ ಈ ಆಶೀರ್ವಾದ ಹಾಗೂ ಅಭಿಮಾನವನ್ನು ಎಂದಿಗೂ ಮರೆಯುವುದಿಲ್ಲ.”
— ನಾಹೀದ್ ಜಮ್ ಜಮ್, ತುಮಕೂರು ಎಸಿ
ಸಮಾರಂಭದಲ್ಲಿ ಭಾಗವಹಿಸಿದ್ದ ಅಧಿಕಾರಿಯ ತಂದೆಯವರು ಮಾತನಾಡಿ, “ನನ್ನ ಮಗಳು ಕೆಲಸ ಮಾಡಿದ ಊರಿನ ಜನರು ಈ ರೀತಿ ಮುಂದೆ ನಿಂತು ಸೀಮಂತ ಮಾಡುತ್ತಿದ್ದಾರೆ ಎಂದರೆ ಅದು ನಮಗೆ ಸಿಕ್ಕ ಅತಿದೊಡ್ಡ ಗೌರವ. ಗೃಹ ಸಚಿವರು ಅಂದು ನನ್ನ ಮಗಳನ್ನು ಇಲ್ಲಿಗೆ ಕಳುಹಿಸಿಕೊಡಲು ಹೇಳಿದ್ದರಿಂದ ಈ ಅಪಾರ ಪ್ರೀತಿಯನ್ನು ಕಾಣುವ ಭಾಗ್ಯ ಸಿಕ್ಕಿದೆ” ಎಂದರು.
ಬ್ಲಾಕ್ ಕಾಂಗ್ರೆಸ್ ಅಧ್ಯಕ್ಷ ಅರಕೆರೆ ಶಂಕರ್ ಮಾತನಾಡಿ, “ಅಧಿಕಾರಿಯಾಗಿ ಬಂದು ವರ್ಗಾವಣೆಯಾದ ಮೇಲೆಯೂ ಜನರ ಮನಸ್ಸಿನಲ್ಲಿ ಉಳಿಯುವುದು ಸುಲಭದ ಮಾತಲ್ಲ. ನಾಹೀದ್ ಜಮ್ ಜಮ್ ಅವರ ಸರಳತೆ, ಆತ್ಮೀಯ ಮಾತು ಹಾಗೂ ಜನರ ಸಮಸ್ಯೆಗಳಿಗೆ ತಕ್ಷಣ ಸ್ಪಂದಿಸುವ ಗುಣವೇ ಜನರೇ ಮುಂದೆ ನಿಂತು ಈ ಸೀಮಂತ ಕಾರ್ಯಕ್ರಮ ಆಯೋಜಿಸಲು ಕಾರಣ” ಎಂದು ಶ್ಲಾಘಿಸಿದರು.
ಸಮಾರಂಭದಲ್ಲಿ ನಾಹೀದ್ ಜಮ್ ಜಮ್ ಅವರ ಪತಿ ಹಾಗೂ ಕುಟುಂಬಸ್ಥರು, ಕೊರಟಗೆರೆಯ ಹಲವು ಗಣ್ಯರು, ಸಾರ್ವಜನಿಕರು ಮತ್ತು ಅಭಿಮಾನಿಗಳು ಭಾಗವಹಿಸಿ ಶುಭ ಹಾರೈಸಿದರು.
ವರದಿ: ಮಂಜುಸ್ವಾಮಿ ಎಂ.ಎನ್.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI