ಕನ್ನಡಿಗರ ಅಡುಗೆ ಮನೆಯಲ್ಲಿ ಕರಿಬೇವು ಇಲ್ಲದೆ ಯಾವುದೇ ಅಡುಗೆಯನ್ನು ಊಹಿಸಿಕೊಳ್ಳಲು ಸಾಧ್ಯವಿಲ್ಲ. ಅಷ್ಟು ಪ್ರಾಮುಖ್ಯತೆ ಇರುವ ಕರಿಬೇವನ್ನು ಫ್ರಿಡ್ಜ್ ನಲ್ಲಿಟ್ಟರೂ ಕೆಲವೇ ದಿನಗಳಲ್ಲಿ ಬಾಡಿಹೋಗುವುದು ಅಥವಾ ಕೊಳೆತುಹೋಗುವುದು ಸಾಮಾನ್ಯ. ಇದನ್ನು ದೀರ್ಘಕಾಲ ತಾಜಾವಾಗಿ ಮತ್ತು ಹಸಿರಾಗಿಡಲು ಇಲ್ಲಿದೆ ಕೆಲವು ಅತ್ಯುತ್ತಮ ಸಲಹೆಗಳು:
ಮಾರುಕಟ್ಟೆಯಿಂದ ತಂದ ತಕ್ಷಣ ಕರಿಬೇವನ್ನು ಹಾಗೇ ಫ್ರಿಡ್ಜ್ ನಲ್ಲಿಡುವುದು ದೊಡ್ಡ ತಪ್ಪು. ಮೊದಲಿಗೆ ಅವುಗಳನ್ನು ಚೆನ್ನಾಗಿ ನೀರಿನಲ್ಲಿ ತೊಳೆದು, ಒಣ ಬಟ್ಟೆಯ ಮೇಲೆ ಹಾಕಿ ತೇವಾಂಶವಿಲ್ಲದಂತೆ ಒಣಗಿಸಬೇಕು. ಬಳಿಕ ಟಿಶ್ಯು ಪೇಪರ್ ನಲ್ಲಿ ಸುತ್ತಿ ಪ್ಲಾಸ್ಟಿಕ್ ನಲ್ಲಿ ಕಟ್ಟಿ ಫ್ರಿಡ್ಜ್ ನಲ್ಲಿಟ್ಟರೆ ಸುಮಾರು ಒಂದು ವಾರಗಳವರೆಗೆ ಹಾಳಾಗದಂತೆ ಇಡಬಹುದು.
ಕರಿಬೇವಿನ ಎಲೆಗಳನ್ನು ಹಾಗೆ ಇಡಲು ಕಷ್ಟವಾಗುವವರು ಐಸ್ ಕ್ಯೂಬ್ ಟ್ರೇ ಅನ್ನು ಬಳಸಬಹುದು. ತೊಳೆದು ಒಣಗಿಸಿದ ಎಲೆಗಳನ್ನು ಐಸ್ ಕ್ಯೂಬ್ ಟ್ರೇನಲ್ಲಿ ಹಾಕಿ ಸಂಗ್ರಹಿಸಿಡಬಹುದು. ಅಡುಗೆಗೆ ಬೇಕಾದಾಗ ಬಿಸಿ ನೀರಿಗೆ ಹಾಕಿ ಬಳಸಿದರೆ, ಎಲೆಗಳು ಸಂಪೂರ್ಣ ಫ್ರೆಶ್ ಆಗಿ ಸಿಗುತ್ತವೆ.
ಕೆಡದಂತೆ ದೀರ್ಘಕಾಲದವರೆಗೆ ಇಡಲು ತೊಳೆದು ಒಣಗಿಸಿದ ಎಲೆಗಳನ್ನು ಗಾಳಿಯಾಡದ ಪಾತ್ರೆಯಲ್ಲಿ ಮುಚ್ಚಿಡಬಹುದು. ಈ ರೀತಿ ಇಟ್ಟರೆ ತಿಂಗಳುಗಳವರೆಗೆ ಕರಿಬೇವು ಫ್ರೆಶ್ ಆಗಿರುತ್ತದೆ. ಆದರೆ ಫ್ರಿಡ್ಜ್ ನಲ್ಲಿಡುವಾಗ ಪಾತ್ರೆಗೆ ಗಾಳಿ ಹೋಗದಂತೆ ಬಿಗಿಯಾಗಿ ಮುಚ್ಚಬೇಕು.
ಮಾರುಕಟ್ಟೆಯಿಂದ ತಂದ ಕರಿಬೇವನ್ನು ಚೆನ್ನಾಗಿ ತೊಳೆದು, ಒಣಗಿಸಿ ಶುದ್ಧವಾದ ಬಟ್ಟೆಯಲ್ಲಿ ಸುತ್ತಿ ಫ್ರಿಡ್ಜ್ ನಲ್ಲಿಟ್ಟರೂ ಒಂದು ವಾರಕ್ಕೂ ಹೆಚ್ಚು ಕಾಲ ಹಾಳಾಗದಂತೆ ಕಾಪಾಡಬಹುದು.
ಫ್ರಿಡ್ಜ್ ನಲ್ಲಿಡಲು ಇಷ್ಟವಿಲ್ಲದಿದ್ದರೆ, ಕರಿಬೇವಿನ ಸಣ್ಣ ಕೊಂಬೆಗಳನ್ನು ಕತ್ತರಿಸಿ, ದೊಡ್ಡದಾದ ಬಾಯಿ ಇರುವ ಜಾರ್ ನಲ್ಲಿ ನೀರು ತುಂಬಿ ಅದರಲ್ಲಿ ಇಡಬಹುದು. ಇದು ಬಹಳ ದಿನಗಳವರೆಗೆ ತಾಜಾವಾಗಿರಲು ಸಹಾಯ ಮಾಡುತ್ತದೆ.
ಕರಿಬೇವು ಬೇಗನೆ ಕೊಳೆತುಹೋಗಲು ಮುಖ್ಯ ಕಾರಣ ಅದರಲ್ಲಿರುವ ತೇವಾಂಶ. ಎಲೆಗಳನ್ನು ತೊಳೆದ ಬಳಿಕ ಫ್ರಿಡ್ಜ್ ನಲ್ಲಿ ಅಥವಾ ಪಾತ್ರೆಗಳಲ್ಲಿ ಇಡುವಾಗ ಸ್ವಲ್ಪವೂ ತೇವಾಂಶವಿಲ್ಲದಂತೆ ನೋಡಿಕೊಳ್ಳುವುದು ಅತ್ಯಂತ ಮುಖ್ಯ.
ನಮ್ಮತುಮಕೂರಿನ ಕ್ಷಣ ಕ್ಷಣದ ಸುದ್ದಿಗಳನ್ನು ನಿರಂತರವಾಗಿ ಪಡೆಯಲು ನಿಮ್ಮ ವಾಟ್ಸಾಪ್ ಗ್ರೂಪ್ ಗೆ 8123382149 ಸಂಖ್ಯೆಯನ್ನು ಸೇರಿಸಿ.
ಗ್ರೂಪ್ ಗೆ ಜಾಯಿನ್ ಆಗಿ: https://chat.whatsapp.com/CtZPUt7bwkaJkX2T6hAwZI